Read Ariun Bible 2013 – Ариун Библи 2013 Гэтлэл 29 Bible Online

Гэтлэл 29 - Ariun Bible 2013 – Ариун Библи 2013 bible

Гэтлэл 29

¹Надад тахилч болж үйлчлүүлэхийн тулд чи тэднийг ариусгахаар үүнийг тэдэнд үйлд. Үхрийн төл согоггүй залуу бух, хоёр хуц,

²буудайн дээд гурилаар хийсэн исгээгүй талх, тосонд багсарсан исгээгүй боов болон тос түрхсэн исгээгүй бин зэргийг авагтун.

³Эдгээрийг чи нэг сагсанд хийж, бух ба хоёр хуцын хамт авч ирэгтүн.

⁴Аарон болон хөвгүүдийг нь чи уулзалтын майхны үүдэнд авчирч, тэднийг усаар угаа.

⁵Чи хувцаснуудыг авч, Ааронд дотуур дээл, ефодын нөмрөг, ефод, цээживчийг өмсгөн, уран нэхсэн ефодын бүсээр бүслэгтүн.

⁶Толгойд нь толгойн ороолт тавьж, толгойн ороолт дээр ариун титмийг тогтоогтун.

⁷Дараа нь чи тослох тос авч, толгой дээр нь асган түүнийг тосол.

⁸Тэгээд чи Аароны хөвгүүдийг авчран тэдэнд дотуур дээл өмсгө.

⁹Тэдэнд чи бүс бүслүүлж, толгойн боолт углагтун. Тахилчийн алба үүрдийн зарлигаар тэднийх байх ёстой. Тийнхүү чи Аарон болон хөвгүүдэд нь сахил хүртээ.

¹⁰Тэгээд чи уулзалтын майхны өмнө залуу бухыг авчруулан Аарон болон хөвгүүд нь залуу бухын толгой дээр гараа тавина.

¹¹Тэгээд уулзалтын майхны үүдэнд ЭЗЭНий өмнө чи бухыг нядлагтун.

¹²Чи залуу бухын цуснаас авч, тахилын ширээний эврүүдэд хуруугаараа түрх. Үлдсэн бүх цусыг тахилын ширээний суурь уруу асгагтун.

¹³Мөн бүх дотор өөх, өнчин элэг, хоёр бөөрийг өөхтэй нь авч, тахилын ширээн дээр шатаагтун.

¹⁴Харин бухын мах, арьс, сэвсийг хуарангийн гадна галд шатаагтун. Энэ нь нүглийн тахил юм.

¹⁵Чи бас нэг хуцыг авч, Аарон болон хөвгүүд нь хуцын толгой дээр гараа тавина.

¹⁶Чи хуцыг төхөөрч, цусыг нь аваад, тахилын ширээг тойруулан сүрчигтүн.

¹⁷Дараа нь өнөөх хуцыг эвдэн гэдэс дотор болон гуяыг нь угааж, бусад хэсэг болон толгойтой нь хамт тавигтун.

¹⁸Хуцыг бүхэлд нь тахилын ширээн дээр шатаагтун. Энэ нь ЭЗЭНд өргөх шатаалт тахил буюу ЭЗЭНд өргөх тааламжит үнэр, галан тахил юм.

¹⁹Дараа нь чи хоёр дахь хуцыг авч, Аарон болон хөвгүүд нь хуцын толгой дээр гараа тавина.

²⁰Чи хуцыг төхөөрч, цуснаас нь авч, Аароны баруун чихний гэдэс, хөвгүүдийнх нь баруун чихний гэдэс, тэдний баруун гарынх нь эрхий хуруу болон баруун хөлийнх нь эрхий хуруунд хүргэж, цусыг тахилын ширээг тойруулан цацагтун.

²¹Дараа нь чи тахилын ширээн дээрх цус мөн тослох тосноос авч, Аарон ба түүний хувцас, түүний хөвгүүд ба тэдний хувцаснууд дээр цац. Ингэснээр тэр ба түүний хувцас, түүний хөвгүүд ба тэдний хувцаснууд ариусгагдана.

²²Чи бас хуцын өөх, сүүл, дотор өөх, өнчин элэг, хоёр бөөр болон тэдгээрийн өөх, баруун гуяыг авч (Учир нь энэ бол томилгооны ёслолын хуц юм.)

²³мөн ЭЗЭНий өмнө байх исгээгүй талхны сагснаас нэг дугуй талх, тосонд багсарсан нэг боов ба нэг бинг авч,

²⁴энэ бүгдийг Аарон ба түүний хөвгүүдийн гарт тавьж, ЭЗЭНий өмнө даллах өргөл болгон далла.

²⁵Чи тэдгээрийг гараас нь авч, ЭЗЭНий өмнө тааламжит үнэр, ЭЗЭНд өргөх галан тахил буюу шатаалт тахил болгон тахилын ширээн дээр шатаа.

²⁶Дараа нь чи Аароны томилгооны ёслолд зориулсан хуцын өвчүүг авч, ЭЗЭНий өмнө даллах өргөл болгон далла. Энэ нь чиний хувь болой.

²⁷Ааронд болон хөвгүүдэд нь зориулсан томилгооны ёслолын хуцаас даллах өргөлд далласан өвчүү ба хандив болгон өргөсөн гуяыг чи ариусга.

²⁸Энэ нь хандив учраас Аарон болон түүний хөвгүүдэд зориулан Израилийн хөвгүүдээс өгөх үүрдийн зарлиг болно. Энэ нь Израилийн хөвгүүдээс эвийн тахилын нядлах тахилаас авах хандив байх бөгөөд ЭЗЭНд өргөх хандив нь байх юм.

²⁹Аароны ариун хувцаснууд нь түүний дараах хөвгүүдэд нь шилжих ба тэд түүнийг өмсөн тослогдох буюу сахил хүртэх болно.

³⁰Түүний оронд тахилч болж байгаа хөвгүүдийнх нь нэг нь ариун газарт үйлчлэхээр уулзалтын майханд орохдоо эдгээрийг долоо хоногийн турш өмсөх ёстой.

³¹Чи томилгооны ёслолын хуцыг авч, махыг нь ариун газарт чанагтун.

³²Аарон болон хөвгүүд нь хуцын мах, сагсан дахь талхыг уулзалтын майхны үүдэнд иднэ.

³³Тийнхүү өөрсдөд нь сахил хүртээж, өөрсдийг нь ариусгахын тулд эвлэрүүллийг хийхэд хэрэглэсэн тэр юмсыг тэд идэх ёстой. Харин тэдгээр нь ариун учраас гаднын хүн идэж болохгүй.

³⁴Хэрэв томилгооны ёслолын мах юмуу талхнаас өглөө болтол үлдвэл чи үлдэгдлийг нь галд шатаагтун. Тэр нь ариун учраас идэж болохгүй.

³⁵Тийнхүү Миний чамд тушаасан бүхний дагуу чи Ааронд болон хөвгүүдэд нь үйлд. Чи долоо хоногийн турш тэдэнд сахил хүртээ.

³⁶Өдөр бүр чи эвлэрүүлэлд зориулан нүглийн тахил болгон нэг залуу бух өргө. Тахилын ширээнд зориулан эвлэрүүллийг хийх үед түүнийг цэвэршүүлж, ариусгахаар тослогтун.

³⁷Долоо хоногийн турш чи тахилын ширээнд зориулан эвлэрүүллийг хийж ариусга. Тэгээд тахилын ширээ нь ариунаас ариун болох бөгөөд тахилын ширээнд хүрсэн аливаа юмс ариусна.[29]

³⁸Тахилын ширээн дээр өдөр бүр өргөх зүйл нь хоёр хурга болно.

³⁹Нэг хургыг чи өглөө өргөж, нөгөө хургыг үдшийн бүрийгээр өргөгтүн.

⁴⁰Нэг хурганд шахсан тосны хинийн дөрөвний нэгтэй хольсон ефагийн аравны нэг сайн гурил мөн ундаан өргөлд хинийн дөрөвний нэг дарс байна.

⁴¹Нөгөө хургыг чи үдшийн бүрийгээр өргөх бөгөөд үүнтэй хамт өглөөнийх шиг идээн өргөл, ундаан өргөлийг ЭЗЭНд тааламжит үнэр, галан тахил болгон өргөгтүн.

⁴²Энэ нь ЭЗЭНий өмнө уулзалтын майхны үүдэнд чамд үе уламжлан байнгын шатаалт тахил байх болно. Тэнд Би чамтай уулзаж ярилцах юм.

⁴³Би тэнд Израилийн хөвгүүдтэй уулзах бөгөөд энэ газар Миний цог жавхлангаар ариусгагдана.

⁴⁴Би уулзалтын майхан хийгээд тахилын ширээг ариусгана. Түүнчлэн Өөртөө тахилчийн албанд үйлчлүүлэхээр Аарон хийгээд түүний хөвгүүдийг Би ариусгана.

⁴⁵Би Израилийн хөвгүүдийн дунд оршиж, тэдний Бурхан болно.

⁴⁶Өөрсдийнх нь дунд оршихын тулд Египет газраас тэднийг авчирсан Бурхан ЭЗЭН бол Би байгаа юм гэдгийг тэд мэдэх болно. Би тэдний Бурхан ЭЗЭН.