Read Ariun Bible 2013 – Ариун Библи 2013 Гэтлэл 35 Bible Online

Гэтлэл 35 - Ariun Bible 2013 – Ариун Библи 2013 bible

Гэтлэл 35

¹Дараа нь Мосе, Израилийн хөвгүүдийн даяар хотол түмнийг хуралдуулан, тэдэнд —ЭЗЭН та нарт эдгээр зүйлийг хий гэж тушаасан.

²Зургаан өдөр ажил хийгээд, харин долоо дахь өдрийг ЭЗЭНд бүрэн амрах Амралтын өдөр буюу ариун өдөр болго. Энэ өдөр ажил хийдэг хэн боловч үхэх ёстой.

³Амралтын өдөр та нар гэр орондоо гал асааж болохгүй гэв.

⁴Тэгээд Мосе Израилийн хөвгүүдийн даяар хотол түмэнд ярин —ЭЗЭН энэ зүйлийг тушаан айлдахдаа

⁵“Дундаасаа ЭЗЭНд хандив ав. Өгөхийг зүрхнээсээ хүссэн хүн бүр ЭЗЭНд хандив авчраг. Тэдгээр нь алт, мөнгө, хүрэл,

⁶хөх, ягаан, час улаан даавуу, нарийн нэхсэн маалинга, ямааны хялгас,

⁷улаанаар будсан хуцын арьс, далайн гахайн арьс, хуайс мод,

⁸гэрэлтүүлгийн тос, тослох тос ба анхилуун утлагад зориулсан үнэртэн,

⁹судалт гартаам чулуунууд мөн ефод болон цээживчинд суулгах чулуунууд болой.

¹⁰Та нарын дундаас ур авьяаст хүн болгон ирж, ЭЗЭНий тушаасан бүхнийг хийтүгэй.

¹¹Үүнд: асар ба майхан нь мөн үүний бүтээлэг, дэгээ, дүнз, хөндөл, багана болон углуурууд нь,

¹²авдар ба үүний дамнуургууд мөн эвлэрүүлгийн таг, дэлгэцийн хөшиг,

¹³ширээ ба дамнуургууд нь, үүний бүх хэрэгсэл, тавиг талх

¹⁴мөн гэрэлтүүлгэд зориулсан дэнлүүний суурь ба хэрэгсэл нь, дэнлүүнүүд ба гэрэлтүүлгийн тос

¹⁵мөн утлагат тахилын ширээ ба үүний дамнуургууд, тослох тос, анхилуун утлага болон асрын үүдний дэлгэц

¹⁶мөн шатаалт тахилын ширээ хүрэл тортойгоо, үүний дамнуурга ба бүх хэрэгсэл нь, угаагуур ба үүний суурь,

¹⁷хашааны хөшигнүүд ба үүний багана, углуурууд мөн хашааны хаалганы дэлгэц,

¹⁸асрын гадас ба хашааны гадаснууд ба тэдгээрийн оосрууд,

¹⁹ариун газарт үйлчлэхэд зориулж сүлжмэл хувцас, тахилчийн албанд үйлчлэлд зориулж тахилч Ааронд болон хөвгүүдэд нь ариун хувцаснууд байна” гэв гэжээ.

²⁰Тэгээд Израилийн хөвгүүдийн даяар хотол түмэн Мосегийн өмнөөс холдоцгоов.

²¹Зүрх нь хөдөлсөн хүн бүр, сэтгэлээсээ хүссэн бүхэн ирж, уулзалтын майхны ажилд болон бүх үйлчлэлд нь мөн ариун хувцаснуудад зориулж ЭЗЭНд хандив авчрав.

²²Өгөх сэтгэлтэй эрэгтэй, эмэгтэй хэн боловч бүгд ирж, зүүлт, ээмэг, бөгж, бугуйвч зэрэг бүх алтан эдлэлээ буюу хүн бүр ЭЗЭНд алтаар даллан өргөх даллах өргөлөө авчрав.

²³Түүнчлэн хөх, ягаан, час улаан даавуу, нарийн нэхсэн маалинга, ямааны хялгас, улаанаар будсан хуцын арьс, далайн гахайн арьс эзэмшдэг хүн болгон авчрав.

²⁴Мөнгө, хүрлээр хандив өргөх хүн болгон ЭЗЭНд хандивыг авчрав. Үйлчлэлийн ямар нэгэн ажилд зориулах хуайс модтой хүн бүр авчрав.

²⁵Үйлэнд уран эмэгтэйчүүд гараараа ээрч, ээрсэн болгоноо буюу хөх, ягаан, час улаан даавуу, нарийн нэхсэн маалингыг авчрав.

²⁶Зүрх нь мэргэн ухаанаар хөдөлсөн эмэгтэй бүхэн ямааны хялгасыг ээрэв.

²⁷Бүх удирдагч судалт гартаам чулуу мөн ефод болон цээживчинд суулгах чулуунууд,

²⁸гэрэлтүүлэгд зориулан тосыг мөн тослох тосонд болон анхилуун утлагад зориулан үнэртнийг авчрав.

²⁹ЭЗЭНээс хийгтүн гэж Мосегоор дамжуулан тушаасан бүх төрлийн ажилд зориулан зүрхэндээ хөтлөгдсөн Израилийн хөвгүүд болох эрэгтэй мөн эмэгтэй бүхэн ЭЗЭНд сайн дурын өргөлийг авчрав.

³⁰Тэгээд Мосе, Израилийн хөвгүүдэд —Үзэгтүн, Иуда овгийн Хурын ач, Урийн хүү Безалелыг ЭЗЭН нэрээр нь дуудав.

³¹Тэр түүнийг мэргэн ухаан, ойлголт, мэдлэг болон бүх талын ур чадварт Бурханы Сүнсээр дүүргэсэн нь

³²уран хийцтэй зүйлсийг сэдэж, алт, мөнгө, хүрлээр урлан,

³³суулгах чулуунуудыг засаж, мод сийлэх ба бүх талын урлалыг хийлгэхийн тулд юм.

³⁴Тэрээр заах чадварыг түүнд болон Дан овгийн Ахисамахын хүү Охолиабын зүрхэнд ч бас өгчээ.

³⁵Сийлбэр, урлал, хөх, ягаан, час улаан даавуу болон нарийн нэхсэн маалинган дээрх хатгамал, нэхмэл зэрэг бүх төрлийн ажлыг гүйцэтгэх, уран хийцийг сэддэг аливаа ажлыг хийх зүрхний мэргэн ухаанаар ЭЗЭН тэднийг дүүргэв.