Read Ariun Bible 2013 – Ариун Библи 2013 Гэтлэл 36 Bible Online

Гэтлэл 36 - Ariun Bible 2013 – Ариун Библи 2013 bible

Гэтлэл 36

¹Ариун газрын үйлчлэлийн бүх төрлийн ажлыг хэрхэн гүйцэтгэхийг мэдэх мэргэн ухаан, ойлголтыг ЭЗЭНээс авсан Безалел, Охолиаб, мөн ур авьяаст хүн болгон ЭЗЭНий тушаасан бүхнийг ёсоор гүйцэтгэхээр болов.

²Тэгээд Безалел, Охолиаб болон ЭЗЭН зүрхэнд нь мэргэн ухаан өгсөн хүн болгоныг буюу зүрх нь хөдөлсөн бүхнийг урлал хийхээр ир хэмээн Мосе дуудав.

³Тэгээд ариун газрыг хийх үйлчлэлийн ажлыг гүйцэтгэхэд зориулж Израилийн хөвгүүдийн авчирсан бүх хандивыг тэд Мосегээс хүлээн авлаа. Өглөө бүр хүмүүс түүнд сайн дурын өргөлүүд авчирсаар байлаа.

⁴Ариун газрын бүх ажлыг хийж байсан урчууд бүгд тусбүр хийж байсан ажлаасаа ирцгээж,

⁵Мосетэй ярин —Хийгтүн гэж ЭЗЭНий тушаасан ажил үйлчлэлд хүрэх хэрэгцээнээс илүүг ард түмэн авчирч байна гэв.

⁶Тиймээс Мосе тушаасан ба хуаран даяар —Эрэгтэй ч бай, эмэгтэй ч бай ямар ч хүн цаашид ариун газрын хандивт юу ч бүү хийтүгэй гэж тунхаглав. Ийнхүү ард түмний авчрахыг нь болиулав.

⁷Учир нь тэдэнд байсан зүйлс нь хүрэлцээтэй бөгөөд бүх ажлыг дуусгахад хангалттай илүү байв.

⁸Асрын ажлыг гүйцэтгэж байсан бүгдийн дундаас ур авьяаст хүмүүс нарийн нэхсэн маалинга болон хөх, ягаан, час улаан даавуугаар арван бүрээстэй асар хийв. Үүн дээр тэрээр уран хийц болох херубуудыг хийжээ.

⁹Бүрээс бүрийн урт нь хорин найман тохой, өргөн нь дөрвөн тохой бөгөөд бүх бүрээс ижил хэмжээтэй байв.

¹⁰Тэр таван бүрээсийг хооронд нь холбоод, нөгөө тавыг нь хооронд нь холбов.

¹¹Тэрээр холбогдсон эхний хэсгийн бүрээсний ирмэгт хөх өнгийн гогцоо хийж, нөгөө хэсгийн бүрээсний ирмэгт тэр мөн түүнчлэн хийлээ.

¹²Тэрээр нэг бүрээсэнд тавин гогцоо, хоёр дахь хэсгийн нөгөө бүрээсний захад мөн тавин гогцоо хийв. Гогцоонууд нь нэг нэгнийхээ харалдаа байв.

¹³Тэгээд тэр тавин алтан дэгээ хийж, уг дэгээнүүдээр бүрээснүүдийг хооронд нь холбов. Ингэснээр асар нь нэг болов.

¹⁴Мөн тэрээр ямааны хялгасаар асрын дээгүүр бүтээх майхны бүрээснүүд хийв. Тэрээр арван нэгэн бүрээс хийжээ.

¹⁵Бүрээс бүрийн урт нь гучин тохой бүрээс бүрийн өргөн нь дөрвөн тохой байсан бөгөөд арван нэгэн бүрээс нь ижил хэмжээтэй байв.

¹⁶Тэр таван бүрээсийг хооронд нь холбож, нөгөө зургаан бүрээсийг ч хооронд нь холбов.

¹⁷Тэрээр эхний хэсгийн бүрээсний ирмэгийн холбоосон дээр тавин гогцоо, хоёр дахь хэсгийн бүрээсний ирмэгийн холбоосон дээр тавин гогцоо хийв.

¹⁸Тэрээр тавин хүрэл дэгээ хийж, дэгээнүүдийг гогцоонд оруулан майхныг хооронд нь холбож нэг болгов.

¹⁹Улаанаар будсан хуцын арьсаар асрын бүтээлгийг тэрээр хийв. Дээгүүр нь далайн гахайн арьсан бүтээлгийг тавив.

²⁰Тэгээд тэрээр асарт зориулан дүнзнүүдийг хуайс модоор босоогоор нь хийв.

²¹Дүнз бүрийн урт нь арван тохой, дүнз бүрийн өргөн нь нэг тохой хагас байв.

²²Дүнз бүрд хооронд нь холбосон нэг нь нөгөөгийнхөө харалдаа хоёр углуурга байсан агаад асрын бүх дүнзийг тэрээр тийнхүү хийв.

²³Тэрээр асарт зориулж өмнө зүгт, асрын баруун талд нь хорин дүнзийг хийв.

²⁴Хорин дүнзэн доор дөчин мөнгөн углуур, нэг дүнзэн доорх хоёр углуургад зориулж хоёр углуурыг мөн нөгөө дүнзэн доорх хоёр углуургад зориулж хоёр углуурыг хийв.

²⁵Тэгээд асрын нөгөө тал буюу хойд зүгт нь тэр хорин дүнзийг

²⁶дөчин мөнгөн углуурын хамт, нэг дүнзэн доор хоёр углуур, нөгөө дүнзэн доор хоёр углуур хийв.

²⁷Асрын ар талд нь буюу баруун зүгт зориулан тэрээр зургаан дүнз хийжээ.

²⁸Асрын ар талын булангуудад тэр хоёр дүнз хийв.

²⁹Тэдгээр нь доогуураа салангид боловч дээгүүрээ эхний гархинд холбогдсон бөгөөд тэрээр хоёр буланд зориулан хоёр дүнзийг ийнхүү хийв.

³⁰Тэнд арван зургаан мөнгөн углуур бүхий найман дүнз байсан ба дүнз бүрийн доор хоёр углуур байв.

³¹Дараа нь тэр хуайс модоор асрын нэг талын дүнзнүүдэд зориулан таван хөндөл хийж

³²асрын нөгөө талын дүнзнүүдэд зориулан таван хөндөл мөн баруун зүгт буюу асрын ар талд зориулан таван хөндлийг хийв.

³³Тэр дүнзнүүдийн дундуур нэг захаас нөгөө зах хүртэл үргэлжлэх голын хөндөл хийв.

³⁴Тэгээд тэр дүнзнүүдийг алтаар бүрээд, хөндлүүдийг тогтоох алтан гархинуудыг нь хийж, хөндлүүдийг алтаар бүрэв.

³⁵Дараа нь тэр хөх, ягаан, час улаан даавуугаар болон нарийн нэхсэн маалингаар хөшиг хийв. Үүний дээр уран хийц болох херубуудыг тэрээр хийв.

³⁶Түүнд зориулаад тэрээр хуайс модоор дөрвөн багана хийгээд алтаар бүржээ. Дэгээнүүд нь алтан байв. Баганануудад зориулан тэрээр дөрвөн мөнгөн углуурыг цутгав.

³⁷Тэр асрын үүдэнд хөх, ягаан, час улаан даавуугаар болон нарийн нэхсэн маалингаар нэхмэл дэлгэц хийв.

³⁸Мөн таван баганыг нь гадаснуудтай нь хамт хийж, тэдгээрийн орой болон холбоосуудыг нь алтаар бүрсэн агаад таван углуурыг хүрлээр хийжээ.