Read Ariun Bible 2013 – Ариун Библи 2013 Гэтлэл 37 Bible Online

Гэтлэл 37 - Ariun Bible 2013 – Ариун Библи 2013 bible

Гэтлэл 37

¹Безалел хуайс модоор авдар хийсэн бөгөөд урт нь хоёр тохой хагас, өргөн нь нэг тохой хагас, өндөр нь нэг тохой хагас байв.

²Тэр түүнийг дотор гаднагүй шижир алтаар бүрээд, түүнийг тойруулан алтан эмжээр хийжээ.

³Тэрээр үүнд зориулж дөрвөн алтан гархи цутгаад, авдрын дөрвөн хөл дээр байрлуулав. Нэг талд нь хоёр гархи, нөгөө талд нь хоёр гархи байлаа.

⁴Тэгээд хуайс модоор дамнуургууд хийж, алтаар бүрэв.

⁵Авдрыг зөөхийн тулд авдрын хажуу талын гархинуудад дамнуургуудыг шургуулав.

⁶Тэрээр эвлэрүүлгийн тагийг шижир алтаар хийсэн бөгөөд урт нь хоёр тохой хагас, өргөн нь нэг тохой хагас ажээ.

⁷Тэрээр давтсан алтан хоёр херубыг хийлээ. Тэдгээрийг эвлэрүүлгийн тагны хоёр өнцөгт хийв.

⁸Нэг херубыг нэг өнцөгт, нөгөө херубыг нөгөө өнцөгт буюу херубуудыг хоёр өнцөгт эвлэрүүлгийн тагтайгаа нэгэн цул байхаар хийв.

⁹Херубууд далавчаа дээгүүр дэлгэсэн бөгөөд эвлэрүүлгийн тагийг далавчаараа бүрхсэн байв. Тэд өөд өөдөөсөө харсан агаад херубуудын нүүр нь эвлэрүүлгийн таг уруу харсан байв.

¹⁰Тэгээд тэр хуайс модоор хоёр тохой урттай нэг тохой өргөнтэй, нэг тохой хагас өндөртэй ширээ хийв.

¹¹Тэрээр түүнийг шижир алтаар бүрж, тойруулан алтан эмжээр хийжээ.

¹²Мөн ширээг тойруулаад алганы энгээр хөвөө хийж хөвөөг нь тойруулан алтаар эмжив.

¹³Тэр түүнд дөрвөн алтан гархи цутгаад, тэднийг дөрвөн хөлийнх нь дөрвөн өнцөгт байрлууллаа.

¹⁴Гархинууд нь ширээг зөөх дамнуургуудын тогтоогч болж хөвөөнд ойр байрлажээ.

¹⁵Тэрээр ширээг зөөх дамнуургуудыг хуайс модоор хийж, алтаар бүрэв.

¹⁶Ширээн дээрх шижир алтан хэрэгслүүд буюу утлагад зориулсан таваг, хундага, ундаан өргөлд зориулсан хул аяга, ваар сав мэтийг тэрээр шижир алтаар хийжээ.

¹⁷Тэгээд тэрээр давтсан шижир алтаар дэнлүүний суурь хийв. Дэнлүүний суурь ба ишийг давтаж хийсэн бөгөөд үүний хундага, болцуу ба цэцгүүд нь үүнтэйгээ нэгэн цул байв.

¹⁸Дэнлүүний суурийн хажуугаас нь зургаан салаа гарсан бөгөөд нэг хажуугаас нь гурван салаа, нөгөө хажуугаас нь гурван салаа гарсан байв.

¹⁹Нэг салаанд гүйлсийн цэцгийн хэлбэртэй гурван хундага байсан ба тусбүрдээ болцуу ба дэлбээтэй байв. Нөгөө салаанд ч гүйлсийн цэцгийн хэлбэртэй гурван хундага байсан ба тусбүрдээ болцуу ба дэлбээтэй байв. Дэнлүүний суурийн зургаан салаа бүгд ийм байв.

²⁰Дэнлүүний сууринд мөн гүйлсийн цэцгийн хэлбэртэй дөрвөн хундага байсан бөгөөд тусбүрийг болцуу ба дэлбээтэй хийжээ.

²¹Дэнлүүнээс гарсан зургаан салааны хувьд үүний эхний хос салааны доор нэг болцуу, дараагийн хос салааны доор нэг болцуу, гурав дахь хос салааны доор нэг болцуу байв.

²²Болцуу ба салаанууд нь дэнлүүний суурьтайгаа нэгэн цул бөгөөд бүхэлдээ шижир алтаар давтаж хийгдсэн нэг бүтээл байжээ.

²³Тэрээр долоон дэнлүүг үүний хямсаа ба тавиуруудтай нь шижир алтаар хийв.

²⁴Дэнлүүний суурийг бүх хэрэгслийнх нь хамт тэрээр нэг талант шижир алтаар хийв.

²⁵Тэгээд тэр хуайс модоор утлагат тахилын ширээг хийсэн ба урт нь нэг тохой, өргөн нь нэг тохой бөгөөд дөрвөлжин, өндөр нь хоёр тохой мөн эврүүд нь түүнтэй нэгэн цул байв.

²⁶Тэрээр үүний оройг нь, бүх хажуу талыг нь тойруулан мөн эврүүдийг нь шижир алтаар бүрэв. Мөн ширээг тойруулан алтан эмжээр хийв.

²⁷Мөн эмжээрийнх нь доор, хоёр эсрэг хажуу дээр нь хоёр алтан гархийг хийжээ. Энэ нь тахилын ширээг зөөх дамнуургуудыг тогтоогч болов.

²⁸Тэрээр хуайс модоор дамнуургуудыг хийж, алтаар бүрэв.

²⁹Тэрээр ариун тослох тос болон сүрчиг найруулагчдын бүтээл болох цэвэр утлагыг анхилуун үнэртнээр хийв.