Read Ariun Bible 2013 – Ариун Библи 2013 Гэтлэл 38 Bible Online

Гэтлэл 38 - Ariun Bible 2013 – Ариун Библи 2013 bible

Гэтлэл 38

¹Тэгээд тэр хуайс модоор шатаалт тахилын ширээг хийв. Урт нь таван тохой, өргөн нь таван тохой дөрвөлжин бөгөөд өндөр нь гурван тохой ажээ.

²Тэрээр үүний дөрвөн буланд нь эврүүд хийв. Эврүүд нь ширээтэйгээ нэгэн цул байсан ба тэр үүнийг хүрлээр бүрэв.

³Тэгээд тэр тахилын ширээний бүх л хэрэгсэл болох сав, утгуур, угаагуур, сэрээ болон бойпруудыг нь хийв. Бүх л хэрэгслийг хүрлээр үйлдэв.

⁴Тэрээр тахилын ширээнд зориулж доод амсрынх нь доор тахилын ширээний өндрийн дундад хүргэж тавих хүрэл сараалжин торыг хийв.

⁵Мөн хүрэл торны дөрвөн өнцөгт дамнуургуудыг тогтоохоор дөрвөн гархи цутгажээ.

⁶Тэрээр хуайс модон дамнуургууд хийж, тэдгээрийг хүрлээр бүрэв.

⁷Тахилын ширээг зөөхийн тулд дамнуургуудыг түүний хажуу тал дахь гархинуудад тэрээр шургуулав. Тахилын ширээг банзаар, дотор талдаа хөндий хийжээ.

⁸Дараа нь тэр, хүрэл суурьтай угаалгын хүрэл савыг уулзалтын майхны үүдэнд үйлчилдэг үйлчлэгч эмэгтэйчүүдийн толиор хийлээ.

⁹Тэгээд тэр хашааг хийжээ. Өмнө зүгт буюу тэр талынх нь хашааны хөшигнүүд нарийн нэхсэн маалингаар хийгдсэн бөгөөд зуун тохой урттай байв.

¹⁰Багананууд нь хорь байсан бөгөөд хорин хүрэл углууртай байв. Баганануудын дэгээ ба холбоос нь мөнгөн ажээ.

¹¹Үүнчлэн умард зүгт ч зуун тохой урт хөшиг байсан ба хорин багана, хорин хүрэл углууртай бөгөөд баганануудын дэгээ, холбоос нь мөнгөн аж.

¹²Баруун зүгт нь арван багана, арван углууртай тавин тохой хөшиг хийв. Баганануудын дэгээ, холбоос нь мөнгөн байв.

¹³Зүүн зүгт буюу урд талд нь тавин тохойг хийв.

¹⁴Нэг талын хөшиг нь арван таван тохой бөгөөд гурван багана, гурван углууртай байв.

¹⁵Хашааны хаалганы нөгөө талд тусбүрд нь арван таван тохой хөшиг ба гурван багана, гурван углуур байлаа.

¹⁶Хашааны эргэн тойрон дахь бүх хөшгийг нарийн нэхсэн маалингаар хийжээ.

¹⁷Баганануудад зориулсан углуур нь хүрэл бөгөөд баганануудын дэгээ, холбоос нь мөнгөн ажээ. Оройнуудыг нь мөнгөөр бүрж, хашааны бүх багана мөнгөн холбоосуудаар тоноглогдсон байв.

¹⁸Хашааны хаалганы дэлгэц нь хөх, ягаан, час улаан даавуу болон нарийн нэхсэн маалингаар хийгдсэн нэхмэлчдийн урлал байв. Урт нь хорин тохой бөгөөд өндөр буюу өргөн нь хашааны хөшигнүүдтэй адил таван тохой байв.

¹⁹Дөрвөн баганатай, тэдгээрийн дөрвөн углуур нь хүрэл бөгөөд дэгээ, холбоос нь мөнгөн ажээ. Оройнуудыг нь мөнгөөр бүржээ.

²⁰Асрын болон эргэн тойрон дахь хашааны бүх гадас хүрэл байв.

²¹Гэрчлэлийн асар буюу асрын эд зүйлсийн тоо энэ юм. Мосегийн тушаасан ёсоор левичүүдийн үйлчлэлд зориулан, тэргүүн тахилч Аароны хөвгүүн Итамарын гараар эдгээр нь тоологдсон билээ.

²²Иуда овгийн Хурын ач, Урийн хүү Безалел нь Мосед ЭЗЭНий тушаасан бүхнийг хийв.

²³Түүнтэй хамт сийлбэрчин, урлаач ба хөх, ягаан, час улаан даавуу, нарийн маалингын нэхмэлчин болох Охолиаб гэгч Дан овгийн Ахисамахын хөвгүүн байв.

²⁴Ариун газрын бүх гүйцэтгэлийн ажилд зарцуулагдсан бүх алт буюу даллах өргөлийн алт нь ариун газрын шекелээр хорин есөн талант, долоон зуун гучин шекел байв.

²⁵Хотол түмний тоологдсон хүмүүсээс гарсан мөнгө ариун газрын шекелээр зуун талант, мянга долоон зуун далан таван шекел байв.

²⁶Энэ нь хорь болон түүнээс дээш насны зургаан зуун гурван мянга таван зуун тавиас буюу тоологдсон хүн нэгбүрээс ариун газрын шекелээр хагас шекел болох нэг бека байв.

²⁷Зуун талант мөнгөөр ариун газрын углуур болон хөшигний углууруудыг цутгасан бөгөөд зуун талант нь зуун углуурт буюу нэг талант нь нэг углуурт зарцуулагджээ.

²⁸Мянга долоон зуун далан таван шекелээр тэрээр баганануудын дэгээг хийж, оройнуудыг нь бүрж, тэдэнд холбоос хийв.

²⁹Даллах өргөлийн хүрэл нь далан талант, хоёр мянга дөрвөн зуун шекел байв.

³⁰Түүгээр тэр уулзалтын майхны үүдэнд углууруудыг мөн хүрэл тахилын ширээг, хүрэл торыг нь болон тахилын ширээний бүх хэрэгслийг хийжээ.

³¹Мөн эргэн тойрон дахь хашааны углуурууд, хашааны хаалганы углуурууд, асрын гадас болон эргэн тойрон дахь хашааны бүх гадсыг хийв.