Read Ariun Bible 2013 – Ариун Библи 2013 Гэтлэл 39 Bible Online

Гэтлэл 39 - Ariun Bible 2013 – Ариун Библи 2013 bible

Гэтлэл 39

¹Тэгээд Мосед ЭЗЭНий тушаасан ёсоор тэд ариун газарт үйлчлэхэд зориулан хөх, ягаан, час улаан даавуугаар сүлжмэл хувцас хийсэн бөгөөд Ааронд ч мөн ариун хувцас хийв.

²Тэгээд тэр алт болон хөх, ягаан, час улаан даавуу мөн нарийн нэхсэн маалингаар ефод хийв.

³Тэгээд хөх, ягаан, час улаан даавуу мөн нарийн нэхсэн маалингатай хамт сүлжиж уран хүний урлалыг хийхийн тулд тэд алтыг гөлөм болгож давтаад, нарийн утас зүсэж гаргав.

⁴Тэд ефодод холбогдох мөрөвчүүдийг хийсэн ба хоёр үзүүртэй нь холбожээ.

⁵Ефодын дээрх уран гоёмсог бүс нь Мосед ЭЗЭНий тушаасан ёсоор алт, хөх, ягаан, час улаан даавуу болон нарийн нэхсэн маалингаар ефодтой ижил хийгджээ.

⁶Тэд судалт гартаам чулуунуудыг засаж, алтан сууринд суулган, Израилийн хөвгүүдийн нэрсийг тамган сийлээсээр сийлэв.

⁷Мосед ЭЗЭНий тушаасан ёсоор тэр үүнийг Израилийн хөвгүүдийн төлөөх дурсгалын чулуу болгож ефодын мөрөвчин дээр тогтоов.

⁸Тэрээр уран хүний урлал болох цээживчийг ефодыг урласны адилаар алт, хөх, ягаан, час улаан даавуу болон нарийн нэхсэн маалингаар хийв.

⁹Тэр нь дөрвөлжин цээживч бөгөөд давхарласан, урт нь нэг сөөм, өргөн нь нэг сөөм байв.

¹⁰Тэд түүн дээр дөрвөн эгнээ чулуу шигтгэв. Бадмаараг, молор, маргадтай эгнээ нь эхний эгнээ,

¹¹хоёр дахь эгнээ нь оюу, индранил, очир алмаас,

¹²гурав дахь эгнээ нь нал, гартаам, ягаан болор,

¹³дөрөв дэх эгнээ нь биндэръяа, судалт гартаам, хаш бөгөөд эдгээрийг алтан хүрээтэй сууринд суулгажээ.

¹⁴Чулуунууд нь Израилийн хөвгүүдийн нэрсийн дагуу, арван хоёр нэрс бүхий бөгөөд тусбүр дээр нь арван хоёр овгийн нэрсийг нэг нэгээр нь тамган сийлээсээр сийлсэн байв.

¹⁵Тэд цээживчин дээр шижир алтаар сүлжмэл олс шиг урласан гинжүүд хийв.

¹⁶Тэд хоёр алтан суурь, хоёр алтан гархи хийгээд хоёр гархиа цээживчний хоёр үзүүрт холбов.

¹⁷Дараа нь тэд хоёр алтан оосрыг цээживчний үзүүрүүдэд байх хоёр гархинд холбов.

¹⁸Тэд оосрын хоёр үзүүрийг хоёр алтан сууринд холбож, ефодын урд талд мөрөвчтэй нь холбов.

¹⁹Тэд хоёр алтан гархи хийж, цээживчний хоёр үзүүрт, ефод уруу харсан дотоод ирмэгт нь хадав.

²⁰Дараа нь тэд хоёр алтан гархи хийж, ефодын урд доод талд, мөрөвчнийх нь залгаасны ойролцоо, ефодын уран гоёмсог бүсний дээд талд хадлаа.

²¹Мосед ЭЗЭНий тушаасан ёсоор тэд цээживчний гархинуудыг ефодын гархинуудтай хөх оосроор холбов. Ингэснээр цээживч нь ефодын уран гоёмсог бүсний дээр байж, ефодоос салахгүй болов.

²²Дараа нь тэр ефодын нөмрөгийг бүхэлд нь хөх өнгөөр нэхэв.

²³Нөмрөгийн оройн хэсгийн голд амсар гаргаж, сэмрүүлэхгүйн тулд хөө хуягны амсар шиг тойруулан нэхмэл урлалаар захлав.

²⁴Тэд нөмрөгийн хормойд хөх, ягаан, час улаан даавуу, нарийн нэхсэн маалингаар анарууд хийв.

²⁵Тэд бас шижир алтаар хонхнууд хийж, хонхнуудыг анаруудын завсраар, нөмрөгийн хормойг тойруулан хадав.

²⁶Мосед ЭЗЭНий тушаасан ёсоор үйлчлэлд зориулсан нөмрөгийн хормойг тойруулан хонх ба анар, хонх ба анар зэргээр сөөлжүүлэн хийв.

²⁷Тэд Аарон болон хөвгүүдэд нь нарийн нэхсэн маалингаар дотуур дээл нэхэн урлаж,

²⁸нарийн нэхсэн маалингаар толгойн ороолт, толгойд өмсдөг толгойн боолтууд мөн нарийн сүлжсэн маалинган дотуур өмд,

²⁹нэхмэлчний урлал болох хөх, ягаан, час улаан даавуу болон нарийн нэхсэн маалинган бүс зэргийг Мосед ЭЗЭНий тушаасны дагуу хийлээ.

³⁰Тэгээд тэд шижир алтаар ариун титмийн пайзыг хийж, түүн дээр тамган сийлээсээр “ЭЗЭНд ариун” гэсэн бичээс сийлэв.

³¹Мосед ЭЗЭНий тушаасан ёсоор тэд үүнийг толгойн ороолтны урд талд хөх уяагаар бэхлэв.

³²Ингэснээр уулзалтын майхан асрын бүх ажил дуусжээ. Израилийн хөвгүүд Мосед ЭЗЭНий тушаасан ёсоор хийв. Тэд тийнхүү хийжээ.

³³Тэд асрыг Мосед авчрав. Үүнд: майхан ба үүний бүх хэрэгсэл болох дэгээ, дүнз, хөндөл, багана болон углуурууд нь,

³⁴улаанаар будсан хуцын арьсан бүтээлэг, далайн гахайн арьсан бүтээлэг болон дэлгэцийн хөшиг,

³⁵гэрчлэлийн авдар ба үүний дамнуургууд мөн эвлэрүүлгийн таг,

³⁶ширээ ба үүний бүх хэрэгсэл, тавиг талх,

³⁷шижир алтан дэнлүүний суурь нь дэнлүүнүүдийн хамт, мөн үүний бүхий л хэрэгсэл ба гэрэлтүүлгийн тос,

³⁸алтан тахилын ширээ, тослох тос, анхилуун утлага болон асрын үүдний дэлгэц,

³⁹хүрэл тахилын ширээ, хүрэл тортойгоо, үүний дамнуурга ба бүх хэрэгсэл нь, угаагуур ба үүний суурь

⁴⁰хашааны хөшигнүүд ба үүний багана, углуурууд, хашааны хаалганы дэлгэц, үүний оосор ба гадаснууд мөн асрын үйлчлэлд буюу уулзалтын майханд зориулсан бүх хэрэгсэл

⁴¹ариун газарт үйлчлэхэд зориулж сүлжмэл хувцас, тахилчийн албанд үйлчлэхэд нь зориулж тахилч Ааронд болон хөвгүүдэд нь ариун хувцаснууд байв.

⁴²Тийнхүү Израилийн хөвгүүд бүх ажлыг Мосед ЭЗЭНий тушаасан бүхний дагуу хийжээ.

⁴³Мосе бүх ажлыг харж шалгав. Үзэгтүн, тэд үүнийг ЭЗЭНий тушаасан ёсоор түүнчлэн хийжээ. Тиймээс Мосе тэднийг ерөөв.