Read Ariun Bible 2013 – Ариун Библи 2013 Гэтлэл 40 Bible Online

Гэтлэл 40 - Ariun Bible 2013 – Ариун Библи 2013 bible

Гэтлэл 40

¹Тэгээд ЭЗЭН, Мосетэй ярин —

²Эхний сарын эхний өдөрт чи уулзалтын майхан асрыг босго.

³Чи тэнд гэрчлэлийн авдрыг байрлуулж, авдрыг хөшгөөр далдал.

⁴Чи ширээг дотогш оруулж, үүн дээрх цэгцлэх зүйлсийг цэгцэл. Чи дэнлүүний суурийг дотогш оруулаад, дэнлүүнүүдийг нь асаа.

⁵Чи утлагад зориулсан тахилын алтан ширээг гэрчлэлийн авдрын өмнө тавиад, асрын үүдний дэлгэцийг тат.

⁶Тэгээд уулзалтын майхан асрын үүдний өмнө шатаалт тахилын ширээг байрлуул.

⁷Угаалгын савыг уулзалтын ба тахилын ширээний хооронд тавьж, дотор нь ус хийгтүн.

⁸Чи эргэн тойрных нь хашааг барьж, хашааны хаалганд хөшиг өлгө.

⁹Тэгээд чи тослох тос авч, асар болоод түүний доторх бүх зүйлийг тослоод, түүнийг болон бүх хэрэгслийг нь ариусга. Тэр нь ариун байх болно.

¹⁰Чи шатаалт тахилын ширээ болон бүх хэрэгслийг нь тосолж, тахилын ширээг ариусга. Тахилын ширээ нь ариунаас ариун байх болно.

¹¹Чи угаах сав болон суурийг нь тосолж ариусга.

¹²Тэгээд чи Аарон болон хөвгүүдийг нь уулзалтын майхны үүдэнд авчран, усаар угаагтун.

¹³Надад тахилчийн албанд үйлчлүүлэхийн тулд чи Ааронд ариун хувцас өмсгөөд, тосолж ариусга.

¹⁴Дараа нь чи хөвгүүдийг нь авчирч, тэдэнд дотуур дээл өмсгө.

¹⁵Тэд Надад тахилчийн албанд үйлчлэхийн тулд эцгийг нь тосолсон шигээ чи тэднийг тосол. Учир нь тосолгоо нь тахилчийн албанд үе уламжлан үүрд байх болно гэж айлдав.

¹⁶Мосе ийн үйлдэв. ЭЗЭНий тушаасан бүхний дагуу Мосе тэгж үйлдэв.

¹⁷Хоёр дахь жилийн эхний сард, уг сарын анхны өдөр асрыг босгов.

¹⁸Мосе асрыг босгоод, углууруудыг нь суулгаж, дүнзнүүдийг нь босгон хөндлийг нь хийж, баганануудыг нь босголоо.

¹⁹Мосед ЭЗЭНий тушаасан ёсоор тэрээр асрын дээгүүр майхныг татаж, дээр нь майхны бүтээлгийг тавив.

²⁰Тэгээд тэр гэрчлэлийг авч авдарт хийгээд, дамнуургуудыг нь авдартай холбоод, авдран дээр эвлэрүүлгийн тагийг тавьжээ.

²¹Тэгээд Мосед ЭЗЭНий тушаасан ёсоор тэрээр авдрыг асар дотор оруулж, дэлгэц болгон хөшгийг өлгөөд, гэрчлэлийн авдрыг далдлав.

²²Дараа нь уулзалтын майхан дотор хөшигний гадна, асрын хойд зүгт тэрээр ширээг байрлуулав.

²³Мосед ЭЗЭНий тушаасан ёсоор тэрээр ширээн дээр ЭЗЭНий өмнө талхыг цэгцлэн өрлөө.

²⁴Дараа нь уулзалтын майхан дотор ширээний эсрэг харалдаа асрын өмнө зүгт дэнлүүний суурийг тавив.

²⁵Мосед ЭЗЭНий тушаасан ёсоор тэрээр ЭЗЭНий өмнө дэнлүүнүүдийг асаалаа.

²⁶Дараа нь тэрээр уулзалтын майхан дотор хөшигний өмнө алтан тахилын ширээг байрлуулав.

²⁷Мосед ЭЗЭНий тушаасан ёсоор тэрээр анхилуун утлагыг түүн дээр уугиулав.

²⁸Тэгээд тэр асрын үүдэнд дэлгэц татлаа.

²⁹Мосед ЭЗЭНий тушаасан ёсоор тэр уулзалтын майхан асрын үүдэнд шатаалт тахилын ширээг байрлуулж, түүн дээр шатаалт тахил болон идээн өргөлийг өргөжээ.

³⁰Тэгээд тэр угаалгын савыг уулзалтын майхан ба тахилын ширээний хооронд байрлуулж, угаалгад зориулан дотор нь ус хийв.

³¹Мосе, Аарон болон хөвгүүд нь гар, хөлөө түүн дотор угаав.

³²Тэд уулзалтын майханд орохдоо мөн тахилын ширээнд ойртохдоо Мосед ЭЗЭНий тушаасан ёсоор угаалга хийдэг байв.

³³Тэгээд асар болон тахилын ширээг бүхэлд нь тойруулан тэрээр хашаа босгож, хашааны хаалганд хөшиг өлгөв. Ингээд Мосе ажилаа дуусгалаа.

³⁴Тэгтэл уулзалтын майхныг үүл бүрхэн ЭЗЭНий цог жавхлан асрыг дүүргэлээ.

³⁵ЭЗЭНий цог жавхлан асрыг дүүргэж, дээр нь үүл багшран суусан тул Мосе уулзалтын майханд орж чадахгүй байв.

³⁶Асрын дээрээс үүл өргөгдөх бүрд Израилийн хөвгүүд аян замдаа хөдлөн,

³⁷харин үүл дээш өргөгдөхгүй бол дээш өргөгдөх өдрийг нь хүртэл тэд хөдөлдөггүй байлаа.

³⁸Учир нь бүх аян замынх нь туршид Израилийн бүх гэрийн нүдэн дээр ЭЗЭНий үүл өдөр нь асрын дээр байж, шөнө нь түүн дээр гал үзэгддэг байв.