Read Ariun Bible 2013 – Ариун Библи 2013 Гэтлэл 8 Bible Online

Гэтлэл 8 - Ariun Bible 2013 – Ариун Библи 2013 bible

Гэтлэл 8

¹ЭЗЭН, Мосед —Фараонд очиж, түүнд “ЭЗЭН ийнхүү айлдаж байна. «Миний ард түмнийг явуул. Тэд Надад үйлчилнэ.

²Хэрэв чи тэднийг явуулахаас татгалзвал, үзэгтүн, Би бүх нутаг дэвсгэрийг чинь мэлхийгээр цохино.

³Нил мэлхийгээр язганаж, тэдгээр нь гарч ирээд ордонд чинь, унтлагын өрөөнд чинь, орон дээр чинь, чиний албат нар ба ард түмний чинь гэр оронд, чиний зууханд, гурилын саванд чинь ч орно.

⁴Чамд, чиний ард түмэн болон бүх албат нар дээр чинь мэлхий гарч ирнэ»” гэж хэл хэмээн айлдав.

⁵ЭЗЭН, Мосед —“Таягтай гараа гол мөрөн, салаа, цөөрмүүдийн дээгүүр сунгаж, Египетийн нутагт мэлхий оруул” гэж Ааронд хэл хэмээв.

⁶Аарон гараа Египетийн усан дээгүүр сунгасанд мэлхийнүүд гарч ирээд Египет нутгийг бүрхэв.

⁷Илбэчид ч илбээрээ түүн шиг үйлдэж, Египетийн нутагт мэлхий орууллаа.

⁸Мосе Аарон нарыг Фараон дуудаж —Надаас бас миний ард түмнээс мэлхийг зайлуулаач гэж ЭЗЭНээс гуй! Тэгвэл би ард түмнийг явуулж ЭЗЭНд тахил өргүүлье гэж хэлэв.

⁹Мосе, Фараонд —Таны төлөө болон таны албат нар, таны ард түмний төлөө, та нараас бас гэрүүдээс чинь мэлхийг зайлуулан зөвхөн Нилд үлдээхийн тулд хэзээ гуйхыг минь хэлж өгнө үү гэв.

¹⁰Тэр —Маргааш гэж хэлэв. Мосе —Бидний Бурхан ЭЗЭН шиг нь үгүй гэдгийг танд мэдүүлэхийн тулд таны хэлснээр болог.

¹¹Танаас, ордноос чинь, албатууд ба ард түмнээс чинь мэлхий зайлж, зөвхөн Нилд л үлдэнэ гэж хариулав.

¹²Мосе Аарон нар Фараоныхаас гараад, Фараонд учруулсан мэлхийн талаар Мосе, ЭЗЭНээс хашхиран гуйв.

¹³ЭЗЭН, Мосегийн үгийн дагуу үйлдэв. Мэлхийнүүд гэр, хашаа ба талбайнуудаас гарч үхэцгээв.

¹⁴Хүмүүс тэднийг цуглуулж овоолсонд газар өмхийрчээ.

¹⁵Гэвч амар амгалан болсныг Фараон үзээд зүрхээ хатууруулж, ЭЗЭНий айлдсанчлан тэднийг сонссонгүй.

¹⁶ЭЗЭН, Мосед —Ааронд “Таягаа сунган газрын тоос шороог цохь! Тэгэхэд тэр нь Египетийн нутаг даяар дэлэнч болох болно” гэж хэл хэмээв.

¹⁷Тэд тийнхүү үйлдэв. Аарон таяг барьсан гараа сунган газрын тоос шороог цохиход хүн малд дэлэнч шавав. Египетийн нутаг даяар газрын бүх тоос шороо нь дэлэнч болон хувирчээ.

¹⁸Илбэчид илбээрээ дэлэнч гаргах гэж оролдсон боловч тэд үүнийг чадсангүй. Дэлэнч хүн малд шавав.

¹⁹Илбэчид Фараонд —Энэ нь Бурханы хуруу байна гэж хэлжээ. Фараоны зүрх хатуурч, ЭЗЭНий айлдсанчлан тэр тэднийг сонссонгүй.

²⁰ЭЗЭН, Мосед —Чи өглөө эрт босож, харагтун, Фараоныг усанд ирэхэд өмнө нь очоод, түүнд “ЭЗЭН ийнхүү айлдаж байна. «Миний ард түмнийг явуул. Тэд Надад үйлчилнэ.

²¹Хэрвээ чи Миний ард түмнийг явуулахгүй бол, үзэгтүн, Би чамд болон чиний албатууд, ард түмэнд чинь бас танай гэрүүдэд бөөн ялаа явуулна. Египетчүүдийн гэр орон мөн тэдний газар нь бөөн ялаагаар дүүрнэ.

²²Харин тэр өдөр Би ард түмнийхээ байгаа Гошен нутгийг тусгаарлаж, тэнд ямар ч бөөн ялаа байлгахгүй. Ингэснээр ЭЗЭН Би энэ газар нутгийн дунд байгаа гэдгийг чамд мэдүүлэх болно.

²³Би Өөрийн ард түмэн ба чиний ард түмний хооронд зааг[10] тавина. Энэ тэмдэг маргааш болох болно»” гэж хэл хэмээн айлдав.

²⁴ЭЗЭН тийнхүү үйлджээ. Тоо томшгүй бөөн ялаа Фараоны ордон болон албат нарынх нь гэр, Египетийн бүх газарт ирж, бөөн ялаанаас болж газар сүйдэв.

²⁵Фараон, Мосе Аарон нарыг дуудан —Явж, энэ газарт Бурхандаа тахил өргө гэж хэлэв.

²⁶Мосе —Тэгж болохгүй. Бид египетчүүдийн жигшдэг юмсыг Бурхан ЭЗЭНдээ тахих болно. Хэрэв бид египетчүүдийн жигшдэг юмсыг нүдэн дээр нь өргөвөл тэд биднийг чулуугаар шидэх биш үү?

²⁷Бид цөл уруу гурван өдрийн аянд явж, Бурхан ЭЗЭНдээ тушаасных нь дагуу тахил өргөе гэж хэлэв.

²⁸Фараон —Би та нарыг явуулна. Та нар цөлд Бурхан ЭЗЭНдээ тахилгал. Харин та нар битгий их хол яваарай! Миний төлөө гуйгаарай гэв.

²⁹Мосе —Үзэгтүн, би танайхаас гармагцаа ЭЗЭНээс гуйна. Тэгвэл маргааш бөөн ялаа Фараон ба түүний албат нар, түүний ард түмнээс зайлна. Харин Фараон, ард түмнийг ЭЗЭНд тахил өргүүлэхээр явуулалгүй дахин бүү мэхлээрэй гэж хэлэв.

³⁰Мосе, Фараоныхаас явж, ЭЗЭНээс гуйв.

³¹ЭЗЭН, Мосегийн хэлсэн ёсоор үйлдэж, бөөн ялааг Фараон болон түүний зарц нар, түүний ард түмнээс зайлуулж, нэгийг ч эс үлдээв.

³²Гэвч Фараон энэ удаа ч мөн зүрхээ хатууруулан ард түмнийг явуулсангүй.