Read Ariun Bible 2013 – Ариун Библи 2013 Иов 10 Bible Online

Иов 10 - Ariun Bible 2013 – Ариун Библи 2013 bible

Иов 10

¹Амьдралаа би үзэн яднам. Гомдолоо би бүрэн гаргана. Сэтгэлийнхээ уй гашуу дотор би ярих болно.

²Би Бурханд “Намайг бүү буруушаагаач. Та яагаад надтай тэмцээд байгаагаа надад мэдүүлээч” гэж хэлэх болно.

³Гарынхаа хүч хөдөлмөрийг нухчин хэрэгсэхгүй болгож, Гэм буруутнуудын хуйвалдааныг таашаан үзэх нь Таны хувьд үнэхээр зөв хэрэг юм уу?

⁴Танд хүнийх шиг махбодын нүд байдаг гэж үү? Эсвэл Та хүний хардаг шиг хардаг уу?

⁵Таны өдрүүд мөнх бус нэгний өдрүүдийн адил учраас, Таны жилүүд хүний он жилүүдийн адил учраас

⁶Та миний хилэнцийг хайж, Нүглийг минь ухаж төнхдөг үү?

⁷Намайг буруугүй гэдгийг Та мэддэг ч гэсэн Таны мутраас мултрах аврал алга.

⁸Таны мутар надад хэлбэр дүрс оруулж, Намайг бүхэлд нь бүтээсэн атлаа Одоо эргээд Та намайг залгих гэж үү?

⁹Намайг шавар мэт[17] бүтээснээ одоо Та санаач. Намайг буцаагаад Та шороо болгох гэж үү?

¹⁰Та намайг сүү адил юүлж, Бяслаг адил барьцалдуулж,

¹¹Арьс махбодоор хучиж, Яс шөрмөсөөр холбоогүй гэж үү?

¹²Та надад амьдрал болон хайр энэрлийг бэлэглэсэн билээ. Таны халамж сүнсийг минь хамгаалсан билээ.

¹³Гэсэн ч эдгээр зүйлийг Та зүрхэндээ нуужээ. Тэр нь Таны дотор байгааг би мэднэ.

¹⁴Хэрэв би нүгэл үйлдвэл, Та намайг ажиглан хараад, Хилэнцээс минь болж намайг эс зөвтгөх байсан.

¹⁵Хэрэв би бурууг үйлдсэн бол, би золгүй еэ! Хэрэв би шударга зөв бол Толгойгоо өндийлгөж чадахгүй. Учир нь би ичгүүрээр дүүрсэн, Зовлон зүдүүрийг[18] минь хараач.

¹⁶Арслан мэт үүнийг өндийлгөвөл Та хариуд нь намайг агнаж, Та хүч чадалаа миний эсрэг дахин харуулах байсан.

¹⁷Та гэрч нараа миний эсрэг сэргээж, Над уруу чиглэсэн уураа ихэсгэдэг. Зовлон зүдүүрийн цаана зовлон зүдүүр л надтай хамт байна.

¹⁸Юунд Та намайг хэвлийгээс гаргасан юм бэ? Би үхэж, хэний ч нүд намайг хараагүй байх нь яав даа!

¹⁹Би огт байгаагүй мэт хэвлийгээс булш уруу хүргэгдсэн байсан ч болоосой.

²⁰Би хэр удаан амьдрах вэ? Намайг орхиоч, би түр ч болов тайтгарал олохсон,

²¹Харанхуйн ба үхлийн харанхуйн орон уруу Хэзээ ч эргэж ирэхгүй явахаас минь өмнө орхиоч!

²²Тэр нь харанхуй мэт үхлийн харанхуй, Эмх цэгцгүй гүн сүүдрийн орон бөгөөд Гэрэл нь ч тэнд харанхуй мэт билээ гэв.