Read Ariun Bible 2013 – Ариун Библи 2013 Иов 13 Bible Online

Иов 13 - Ariun Bible 2013 – Ариун Библи 2013 bible

Иов 13

¹Харагтун, нүд минь бүхнийг харж, Чих минь сонсож, үүнийг ойлгосон юм.

²Та нарын мэддэгийг би ч бас мэднэ. Та нараас дордох юм надад үгүй.

³Харин би Төгс Хүчит Нэгэнтэй ярилцахсан. Бурхантай өөрийн хэргийг би хэлэлцэхсэн.

⁴Харин та нар худал хуурмагаар шохойддог Бүгдээрээ олиггүй эмч нар юм.

⁵Хэрэв та нар ердөө л амаа хамхивал, Энэ нь та нарын мэргэн ухаан болно!

⁶Тайлбаруудыг минь одоо сонс, Уруулын минь эсэргүүцлийг чагна.

⁷Бурханы төлөө гээд шударга бусыг, Түүний тулд гээд хуурмагийг ярих уу, та нар?

⁸Та нар Түүнд тал засах уу? Та нар Бурханы төлөө хэрэг хэлэлцэх үү?

⁹Тэр та нарыг шалгавал Сайн юм болох уу? Эсвэл хүнийг хуурдаг шиг Түүнийг та нар хуурчих уу?

¹⁰Хэрэв та нар нууцаар тал засдаг бол Тэр та нарыг гарцаагүй зэмлэнэ.

¹¹Түүний сүр хүч та нарыг айлгаж, Түүнээс айх явдал та нарт учрахгүй гэж үү?

¹²Сануулгууд чинь үнсэн төдий ёгт үгс Хамгаалалтууд чинь шавран хамгаалалтууд ажээ.

¹³Өмнө минь дуугүй бай, өөрөө би ярья. Үүний дараа надад юу л болбол болог.

¹⁴Мах юугаан шүдэндээ зуух учир юун, Амьдрал юугаан гартаа авах утга юун?

¹⁵Хар, Тэр намайг алах гэж байна. Надад найдвар алга. Гэсэн ч Түүний өмнө би Өөрийн замуудаа өмгөөлөх л болно.

¹⁶Сүсэг бишрэлгүй нь Түүний өмнө үл ирэх тул Миний аврал энэ л болмуй.

¹⁷Үгсийг минь анхааралтай сонс. Учирлах зүйл минь та нарын чихэнд байг.

¹⁸Хар, би өөрийн хэргийг бэлтгэсэн юм. Зөвдөнө гэдгээ би мэдэж байна.

¹⁹Хэн надтай тэмцэлдэнэ вэ? Тийм аваас би дуугүй байж, үхье.

²⁰Зөвхөн хоёр зүйлийг л надад бүү хий, Тэгвэл би Таны нүүрнээс нуугдахгүй.

²¹Мутраа надаас холдуулж, Аюумшиг юугаараа намайг бүү айлгаач.

²²Тэгээд дууд, би ч хариулна. Эсвэл намайг яриулаад, Тэгээд надад хариулаач.

²³Миний хилэнц ба нүгэл хичнээн юм бэ? Миний гэмт үйлдэл ба нүглийг Надад мэдүүлээч.

²⁴Та юунд нүүрээ нууж, Намайг дайснаа гэж үзнэ вэ?

²⁵Та хийсэж буй навчийг цочирдуулах уу? Эсвэл Та хатсан сүрлийг мөшгөх үү?

²⁶Учир нь миний эсрэг Гашуун зүйлсийг Та бичиж, Залуу үеийн минь хилэнцийг Надад өвлүүлдэг.

²⁷Хөлийг минь Та хэвэнд оруулж, Хамаг харгуйг минь харуулддаг. Хөлийн минь тавхайд Хүрээ хөвөөг Та тогтоодог.

²⁸Энэ зуур би хивэн эрвээхэйд идүүлсэн хувцас мэт, Муудсан зүйл мэт ялзарч байна.