Read Ariun Bible 2013 – Ариун Библи 2013 Иов 14 Bible Online

Иов 14 - Ariun Bible 2013 – Ариун Библи 2013 bible

Иов 14

¹Эмэгтэйгээс төрдөг хүн гэгчийн Өдрүүд цөөн, үймээн бэрхшээлээр дүүрэн

²Соёолоод хатаж хорчийдог цэцэг мэт Үлдэж хоцордоггүй сүүдэр мэт.

³Та ийм нэгэн дээр мэлмийгээ тогтоох уу? Та намайг шүүлт уруу хамт авч явах уу?

⁴Хэн бузраас цэврийг бий болгож чадах вэ? Хэн ч үгүй.

⁵Түүний өдрүүд тодорхой, Саруудынх нь тоог ч Та мэддэг, Та түүнд давж үл чадах хязгааруудыг тогтоосон.

⁶Та түүнийг амраахаар Харцаа түүнээс эргүүлээч.[19] Хөлсний хүн мэт өдрүүдээ тэр гүйцээг.[20]

⁷Огтлоход дахин соёолж, Нахианууд нь устахгүй байх найдвар модонд бий.

⁸Хэдийгээр түүний үндсүүд газар доор хөгширч, Хожуул нь хуурай хөрсөнд үхдэг ч,

⁹Чийг мэдрэгдэх төдийд л тэрээр сайн ургаж, Ургамал мэт мөчирлөдөг.

¹⁰Харин хүн гэгч нь үхэж, унаад өгнө. Тэрээр дуусна, Тэгээд хаана байдаг вэ?

¹¹Нуураас ус татарч Гол мөрөн хатаж ширгэдэг шиг

¹²Нуран унаад хүн гэгч дахин эс босно. Тэнгэрс үгүй болох хүртэл тэрээр босохгүй, Нойрноосоо ч сэрэхгүй.

¹³Өө, Та намайг Үхэгсдийн оронд нуудаг ч болоосой, Уур хилэнгээ өнгөртөл Та намайг хадгалаад, Та надад цаг товлон өгөөд, Намайг санаасай!

¹⁴Хэрэв хүн үхвэл дахин тэрээр амилах уу? Зүтгэлийнхээ бүх өдөрт Халаа минь ирэх хүртэл би хүлээнэ.

¹⁵Та дуудах бөгөөд Танд би хариулна. Та мутрынхаа бүтээл уруу тэмүүлэх болно.

¹⁶Одоо Та алхам бүрийг минь эс тоолж Та нүглийг минь үл харна.

¹⁷Гэмт үйлдлүүд минь шуудай дотор лацдуулж, Хилэнцийг минь Та халхлаасай.

¹⁸Гэвч уул ч хүртэл нурж эвдэрдэг. Хад чулуу ч байрнаасаа ховхордог.

¹⁹Чулуунуудыг ус элээж, Урсгалууд нь газрын шороог угаадаг. Ийнхүү Та хүний найдварыг тасалдаг.

²⁰Та түүнийг үргэлж дийлж тэр ч халин оддог. Дүр төрхийг нь Та өөрчилж, түүнийг хол илгээдэг билээ.

²¹Хөвгүүд нь нэр хүндтэй болсон ч тэр үл мэднэ, Тэд нь өчүүхэн дорд болсон ч тэр эс анзаарна.

²²Зөвхөн биеийнхээ хөндүүрлэлийг л тэр мэдэрч Зөвхөн өөрийнхөө л төлөө тэр гашууддаг гэв.