Read Ariun Bible 2013 – Ариун Библи 2013 Иов 21 Bible Online

Иов 21 - Ariun Bible 2013 – Ариун Библи 2013 bible

Иов 21

¹Тэгэхэд Иов хариулан

²—Хэлэх үгийг минь анхааралтай сонс, энэ нь та нарын тайвшрал болог!

³Тэвч намайг, би ярья, Тэгээд ярьсны минь дараа тохуурхацгаа.

⁴Мөхөх хүмүүст би гомдоллоо юу? Мөн би тэвчээргүй байж эс болно уу?

⁵Хараач намайг, тэгээд цочирд, Гараараа амаа тагла!

⁶Бодох бүрдээ би айдас хүйдэст автаж, бие минь салганана.

⁷Яагаад гэм буруутнууд амьдарсаар, өндөр наслан эрх мэдэл нь юунд нэмэгдэж байна вэ?

⁸Үр удам нь бараа сүрэнд нь батжиж Үр хүүхдүүд нь нүднийх нь өмнө байцгаана.

⁹Гэр орон нь айдсаас ангид, Бурханы саваа ч тэдний дээр алга.

¹⁰Бух нь зогсолтгүй хээлтүүлж, Үнээ мал нь ч зулбалгүй тугаллана.

¹¹Тэд бяцхан үрсээ сүрэг мэт гадагш гаргана, Тэдний үр хүүхдүүд нь үсрэн цовхчино.

¹²Хуур, босоо ятганд тэд дуулж, лимбэний эгшигт цэнгэн баярлана.

¹³Тэд өдрүүдээ элбэг дэлбэг өнгөрүүлээд Амар тайвнаар Үхэгсдийн орон уруу оддог.

¹⁴Тэд Бурханд “Биднээс холд! Таны замыг мэдэх хүсэл ч бидэнд алга.

¹⁵Төгс Хүчит Нэгэн гэж юу болоод бид Түүнд үйлчлэх ёстой билээ? Түүнээс гуйвал бидэнд ямар ашигтай юм бэ?” гэцгээдэг.

¹⁶Харагтун, дэвжил бадрал нь тэдний амжилт бус уу? Тийм гэм буруутнуудын төлөвлөгөө миний хувьд жигшүүртэй!

¹⁷Гэм буруутны дэнлүү унтрах нь хэр олон бэ? Гай зовлон нь тэдний дээр хэр олон унадаг вэ? Бурхан уурандаа зовлон зүдүүрийг хэр олон өгдөг вэ?

¹⁸Тэд салхины өмнөх сүрэл мэт эсвэл шуурганд хийсэж үгүй болдог тарианы хальс мэт болох нь хэр олон бэ?

¹⁹“Бурханаас хүмүүний цөв мууг үр хүүхдүүдэд нь хураадаг” гэж чи хэлдэг. Өөрт нь харин мэдүүлэхийн тулд Бурхан түүнд буцааж тооцог!

²⁰Өөрийнх нь нүд ялзралаа харж, тэрээр Төгс Хүчит Нэгэний уур хилэнгээс ууг!

²¹Учир нь түүний саруудын тоо гүйцэхэд өөрийнхөө дараа тэрээр гэр орондоо яаж санаа тавих юм бэ?

²²Бурхан өндөрт байгсдыг шүүн шийтгэдэг байхад хэн Түүнд билэг ухааныг зааж чадах вэ?

²³Нэг нь бүрэн тэнхээтэй, маш уужуу болоод амгалан байхдаа өөд болдог.

²⁴Түүний гуя нь өөхтэй түүний яс нь чөмөгтэй хэвээр байдаг.

²⁵Өөр нэг нь сайныг огт амсалгүй, сэтгэлийн гашуундаа үхдэг.

²⁶Тэд хамтдаа шороон дотор хэвтэж, тэднийг өт шавна.

²⁷Харагтун, санаа бодлуудыг чинь болон намайг буруутгах гэсэн явуулгыг чинь би мэднэ.

²⁸Та нар “Сурвалжит хүний гэр орон хаа байна вэ? Гэм буруутны амьдрах майхан хаана байна вэ?” гэдэг.

²⁹Та нар аянчин хүмүүсээс асуугаагүй юм уу? Та нар тэдний гэрчлэлийг хүлээн аваагүй юу?

³⁰Хорон муу хүн гамшгийн өдөр хэлтэрч, хилэнгийн өдөрт тэд хамгаалагддаг гэдгийг!

³¹Хэн түүний замыг нүүрэн дээр нь хэлж, хэн үйлдсэн зүйлийг нь түүнтэй тооцох вэ?

³²Түүнийг булшинд хүргэгдэх үед нь ч Бунхан дээр нь харуул байх болно.

³³Хөндийн шавар ч түүнийг зөөлөн нөмөрнө. Түүний араас бүх хүн дагах агаад, Урд нь бас тоолшгүй олон нь алхалжээ.

³⁴Тэгэхээр та нар намайг хоосноор хэрхэн тайтгаруулах вэ? Тэнд худал хуурмагаас өөр үлдэх юм хариултад чинь алга гэв.