Read Ariun Bible 2013 – Ариун Библи 2013 Иов 22 Bible Online

Иов 22 - Ariun Bible 2013 – Ариун Библи 2013 bible

Иов 22

¹Дараа нь теман хүн Елифаз хариулж,

²—Хүн гэдэг Бурханд нэмэр болж чадах уу? Хамгийн цэцэн нь ч Түүнд үйлчилж чадах уу?

³Чи зөвийг үйлдлээ гэхэд Түүнд ямар ашиг болох вэ? Чи замаа төгс болголоо гээд Түүнд ямар нэмэр болох вэ?

⁴Чамайг зэмлэдэг нь чиний төлөө бус уу? Чиний эсрэг шүүлт явуулахын тулд гэж үү?

⁵Хар санаа чинь үлэмж их, Хилэнц чинь төгсөшгүй бус уу?

⁶Учир нь чи ах дүүсээсээ шалтгаангүйгээр барьцаа авч, нүцгэний хувцсыг хуу татсан.

⁷Ядарсан хүнд чи уух ус өгөөгүй, өлссөн хүнээс талх харамласан.

⁸Гэвч газар дэлхий чадалтай хүнд харьяалагддаг бөгөөд алдар хүндтэй хүн энд оршин суудаг.

⁹Өөрөө чи бэлэвснүүдийг хоосон буцаасан, Өнчидийн гарыг няцаасан.

¹⁰Тиймээс урхи чамайг хүрээлж, гэнэтийн айдас чамайг түгшээж

¹¹эсвэл чи харж чадахгүй болох харанхуй, үерийн ус чамайг нөмөрдөг билээ.

¹²Бурхан, тэнгэрийн өндөрт байгаа бус уу? Алсын оддыг хар, Тэд ямар өндөр юм бэ!

¹³Чи “Бурхан юу мэддэг билээ? Тэрээр гүн харанхуйг нэвтлэн шүүж чадах уу?

¹⁴Үүлс Түүний нуугдах газар тул Тэрээр харж чаддаггүй. Тэрээр тэнгэрийн тойрогт алхдаг” гэдэг.

¹⁵Цөвт муу хүмүүсийн явж өнгөрсөн эртний жимийг чи дагах уу?

¹⁶Тэд цагаасаа өмнө авагдаж, Тэдний үндэс нь гол мөрнөөр угаагдаж устсан.

¹⁷Тэд Бурханд “Биднээс холд!” “Төгс Хүчит Нэгэн тэдэнд юу хийж чадах юм бэ?” гэж хэлсэн.

¹⁸Гэсэн хэдий ч Тэр тэдний гэрүүдийг сайнаар дүүргэсэн билээ. Харин гэм буруутнуудын зөвлөгөө надаас хол байг!

¹⁹Зөв шударга хүмүүс хараад, баярладаг бөгөөд гэмгүй хүмүүс тэднийг тохуурхаж,

²⁰“Бидний өстнүүд үнэхээр таслагдаж, тэдний үлдэгсдийг гал залгив” гэцгээдэг.

²¹Одоо Түүнийг таньж, Түүнтэй эвтэй байгтун. Тэгвэл чамд сайн нь ирэх болно.

²²Түүний амнаас зааврыг хүлээн авч, Түүний үгсийг зүрхэндээ үндэслүүлээч.

²³Хэрэв чи Төгс Хүчит Нэгэн уруу[34]эргэвэл, Чи дахин сэргэнэ, Хэрэв чи шударга бус байдлыг майхнаасаа хол зайлуулаад,

²⁴Алтыг шороонд булж, Офирын алтыг горхины чулуудын дунд орхих аваас

²⁵Төгс Хүчит Нэгэн чиний алт болон шилмэл мөнгө болох болно.

²⁶Учир нь тэгэх аваас чи Төгс Хүчит Нэгэний таалалд оршиж, Нүүрээ Бурхан өөд өргөх болно.

²⁷Чи Түүнд залбирах бөгөөд Тэр чамайг сонсох болно. Чи ам өчгөө ч биелүүлэх болно.

²⁸Чи ямар нэг хэрэг таслахад тэр нь чиний төлөө бүтэмжтэй байж, зам дээр чинь гэрэл гийх болно.

²⁹Тэд чамайг дорд болгоход Чи итгэлтэйгээр ярих болно.[35] Тэрээр даруу хүнийг аврах болно.

³⁰Тэрээр гэмгүйг аврах бөгөөд Гарын чинь цэврээр дамжин тэр аврагдах болно гэв.[36]