Read Ariun Bible 2013 – Ариун Библи 2013 Иов 24 Bible Online

Иов 24 - Ariun Bible 2013 – Ариун Библи 2013 bible

Иов 24

¹Яагаад Хүчит Нэгэн цагуудыг эс хадгалж, Яагаад Түүнийг таньж мэддэг хүмүүст Түүний өдрүүд үл харагдана вэ?

²Зарим нь газрын шав тэмдгүүдийг хөдөлгөж, Тэд мал сүргийг булаан авч, бэлчээртээ аваачдаг.

³Өнчин нэгний илжигнүүдийг туун одож, Бэлэвсэн эмийн үхрийг барьцаанд тэд авдаг.

⁴Дорой нэгнийг замаас зайлуулдаг. Ядуус бүгд нэг дор нуугдах болсон.

⁵Үзэгтүн, зэрлэг илжиг цөлд идэш эрэхийн адил Үр хүүхдүүддээ талх хайхаар ажилд гардаг.

⁶Тэд өөрсдийн бус талбайгаас түүж, Буруу хүний усан үзмийн цэцэрлэгүүдээс үлдэгдэл хайн цуглуулдаг.

⁷Тэд өмсөх хувцасгүйгээр шөнийг нүцгэн өнгөрүүлж, хүйтэнд нөмрөх юмгүй өнжинө.

⁸Тэд уулын бороонд норж, хоргодох газаргүй хад чулуу тэвэрдэг.

⁹Бусад нь өнчин хүүхдүүдийг хөхнөөс нь салгаж, ядуусаас барьцаа авдаг бөлгөө.

¹⁰Тэд ядуусыг хувцасгүй, нүцгэн явуулж, өлсөгчдөөс юүжилсэн тариагаа булаадаг.

¹¹Ханан дунд тэд тос үйлдвэрлэдэг. Тэд дарс шахуургуудыг гишгэдэг боловч ундаасдаг.

¹²Хотоос хүмүүс ёолж, шархадсан хүмүүсийн амь гол хашхирч байна. Гэсэн ч Бурхан үүнд анхаарал тавьдаггүй.

¹³Бусад нь гэрлийн эсрэг тэрслэгчидтэй хамт байсан билээ. Тэд гэрлийн замыг мэдэхийг ч, түүний жимээр явахыг ч хүсдэггүй.

¹⁴Алуурчин үүрээр босдог. Тэрээр ядуусыг хийгээд үгээгүйчүүдийг алдаг бөгөөд шөнө нь хулгайч шиг байдаг.

¹⁵Завхайрагчийн нүд үдшийн бүрийг хүлээн “Намайг нэг ч нүд харахгүй” гэж нүүрээ тагладаг.

¹⁶Харанхуйд тэд байшингуудыг ухаж, Өдөр тэд өөрсдийгөө түгжиж, Гэрлийг тэд үл мэднэ.

¹⁷Үхлийн харанхуй тэдний хувьд өглөөтэй адил Тэдний нөхөд нь үхлийн харанхуйн аймшиг билээ.

¹⁸Усны мандал дээр тэд хөнгөн, Хувь газар нь хүртэл хараагдсан байдаг. Усан үзмийн талбайнууд уруу тэд дахин зүглэдэггүй.[38]

¹⁹Ган ба халуун нь цас усыг хайлуулан ширгээх мэт нүгэл үйлдэгсдийг Үхэгсдийн орон залгидаг.

²⁰Тээсэн хэвлийнүүд нь тэднийг мартаж, Өт хорхой тэднийг амтархана. Дахин тэрээр дурсагдахгүй болж, Хорон муу байдал мод мэт таслагдана.

²¹Тэд хүүсэр эмэгтэйг буруушааж, бэлэвсэн эмд сайныг үйлддэггүй билээ,

²²Харин Бурхан хүчтэний амийг хүчээрээ чирдэг. Тэд босдог ч амийн баталгаа үгүй.

²³Тэр тэдэнд аюулгүй байдлыг өгч, тэд дэмжлэг авсан байдаг. Түүний мэлмий тэдний замууд дээр байдаг.

²⁴Тэд багахан хугацаанд өргөмжлөгдөөд, дараа нь алга болдог. Үүнээс гадна, тэд доош буулгагддаг бөгөөд бусдын хамт авагдаж, өөрсдийн хадаж байсан тариан түрүү мэт огтлогддог.

²⁵Хэрэв энэ бүхэн тийм бус байх аваас хэн намайг худалч гэж нотлон хэн миний үгсийг хоосон болгохыг харуулах вэ? гэв.