Read Ariun Bible 2013 – Ариун Библи 2013 Иов 27 Bible Online

Иов 27 - Ariun Bible 2013 – Ариун Библи 2013 bible

Иов 27

¹Тэгээд Иов яриагаа үргэлжлүүлж,

²—Эдлэх эрхийг минь хорьсоор байгаа Бурхан болоод сэтгэлийг минь гашуудуулсан Төгс Хүчит Нэгэн амьд!

³Миний дотор амь хийгээд хамарт минь Бурханы амьсгаа байсаар байх хугацаанд

⁴уруул минь шударга бусыг бүү яриг. Хэл минь ч хуурмагийг бүү дамжуулаг.

⁵Та нарыг зөвт гэж тунхаглах нь надаас хол байг! Үхэн үхтлээ би хоёргүй үнэнчээ Өөрөөсөө үл холдуулна.

⁶Өөрийн зөв шударгыг би баримталж, эс буцна. Өдрүүдийн минь нэгээхнийг ч зүрх минь үл зэмлэнэ.

⁷Миний дайснууд буруутан мэт, Миний эсрэг босогч зөвт бус мэт байг.

⁸Бурхан амийг нэхэн таслахаар шийдсэн бол Сүсэг бишрэлгүй хүний найдлага нэгэнт өнгөрдөг бус уу?

⁹Түүнд зовлон шаналан тохиолдоход Түүний хашхирах дууг Бурхан сонсох уу?

¹⁰Тэрээр Төгс Хүчит Нэгэний тааллыг олох уу? Тэрээр бүх үеийн турш Бурханыг дуудах уу?

¹¹Бурханы хүчээр би чамд зааварлана. Төгс Хүчит Нэгэний тухай би юу ч нуугаагүй.

¹²Үзэгтүн, та бүгд харлаа. Тэгвэл яагаад та нар мунхаг үйл хийнэ вэ?

¹³Энэ нь чухамдаа буруутнуудад ногддог Бурханы хувь бөгөөд харгис хэрцгий хүмүүсийн Төгс Хүчит Нэгэнээс авдаг өв юм.[43]

¹⁴Түүний хөвгүүд олон ч гэсэн тэд илдэнд заяагджээ. Түүний үр удам талхаар цадахгүй ажээ.

¹⁵Түүний үлдэгсдийг тахлаас болж хөдөөлүүлэн бэлэвсэн эмс нь уйлах ч чадалгүй болно.

¹⁶Хэдийгээр тэрээр мөнгийг шороо мэт хурааж, Хувцас хунарыг шавар мэт овоолдог ч,

¹⁷тэр бэлтгэдэг байхад харин зөвт нэгэн түүнийг өмсөж, Гэмгүй хүн мөнгийг хуваана.

¹⁸Хивэн эрвээхэй гэрээ,[44] манаач шовгороо босгох адил гэрээ тэр барьсан.

¹⁹Тэрээр[45] баян хэвтдэг боловч тиймээрээ хэзээ ч байхгүй. Тэрээр нүдээ нээдэг бөгөөд тэр нь байхгүй болсон байдаг.

²⁰Аймшиг түүнийг үер адил нөмөрдөг. Хуйлрах салхи шөнөөр түүнийг хулгайлан оддог.

²¹Дорнын салхи хуйлран ирж түүнийг авч оддог. Эргэлдэх салхи түүнийг байрнаас нь ховхлон авч явдаг.

²²Учир нь тэр өршөөлгүйгээр түүн уруу дайрахад Тэр хүн зугтахыг бодно.

²³Түүнд алга ташиж, Орон байрнаас нь түүн уруу шогширно.