Read Ariun Bible 2013 – Ариун Библи 2013 Иов 28 Bible Online

Иов 28 - Ariun Bible 2013 – Ариун Библи 2013 bible

Иов 28

¹[46] Мөнгөний уурхай болон алтыг цэвэршүүлдэг газар зайлшгүй байдаг.

²Төмрийг шорооноос авдаг бөгөөд зэсийг хүдрээс гаргадаг.

³Тэрээр харанхуйг эцэслэж, харанхуй ба үхлийн харанхуй дунд хүдрийг хамгийн зах хязгаараас хайдаг.

⁴Тэрээр хүмүүсийн оршин суух газраас хол уурхайн нүх ухдаг бөгөөд Тэр нь хүний хөлд мартагдсан байдаг. Тэд хүнээс хол цааш нааш дүүжлэгдэн савладаг.

⁵Газраас хоол хүнс гарч ирдэг бөгөөд Галаар мэт дор доторх нь хуйлралдана.

⁶Түүний чулуунууд индранилын эх булаг бөгөөд шороо нь алт бөлгөө.

⁷Жимийг нь махчин шувууд мэддэггүй, тасын нүд ч түүнийг хараагүй юм.

⁸Бардам араатнууд түүний дээгүүр гишгээгүй, Арслангууд ч түүгээр явж өнгөрөөгүй юм.

⁹Тэрээр гараа цахиур чулуун дээр тавьдаг. Тэрээр уулсыг сууриар нь эргүүлдэг.

¹⁰Тэрээр чулуунууд дундуур суваг цавчин гаргадаг бөгөөд түүний нүд ямар ч үнэт зүйлийг хардаг.

¹¹Тэрээр урсгалуудыг урсгахгүй далангаар хааж, нууцлагдсан юмсыг тэрээр гэрэлд гаргадаг.

¹²Харин мэргэн ухаан хаанаас олддог вэ? Ухаарал орших газар хаана байна вэ?

¹³Хүн түүний үнэ цэнийг мэддэггүй бөгөөд тэр нь амьд хүмүүсийн нутгаас ч олдоогүй.

¹⁴Оёоргүй гүн нь “Тэр чинь миний дотор байхгүй” мөн далай ч “Тэр чинь надад байхгүй” гэж хэлдэг.

¹⁵Түүнийг цэвэр алтаар ч сольж чаддаггүй бөгөөд үнэнд нь мөнгийг ч хэмжин өгч чаддаггүй юм.

¹⁶Тэр нь Офирын алтаар, үнэт судалт гартаамаар эсвэл индранилаар ч үнэлэгддэггүй.

¹⁷Алт ба шил түүнтэй эн зэрэгцдэггүй бөгөөд түүнийг үнэт алтан эдлэлүүдээр ч сольдоггүй.

¹⁸Шүр болон болрыг бол дурдах ч хэрэггүй. Мэргэн ухааны үнэ сувднаас ч өндөр болой.

¹⁹Етиопийн молор эрдэнэ ч түүнтэй эн зэрэгцдэггүй бөгөөд тэр нь шижир алтаар ч үнэлэгдэх боломжгүй юм.

²⁰Тэгвэл мэргэн ухаан хаанаас ирдэг юм бэ? Ухаарал орших газар хаана байна вэ?

²¹Тэр нь ийнхүү амьтай бүхний нүднээс нууцлагдсан бөгөөд Тэнгэрийн шувуудаас далдлагдсан ажгуу.

²²Сүйрлийн газар ба Үхэл нь “Өөрсдийн чихээр бид түүний тухай сонссон” гэцгээдэг.

²³Бурхан түүний замыг ойлгодог бөгөөд түүний оршдог газрыг ч мэддэг.

²⁴Учир нь зөвхөн Тэрээр газар дэлхийн хязгаарыг ширтэж, Тэнгэрийн доорх бүгдийг хардаг билээ.

²⁵Салхины жин, усны хэмжээ,

²⁶бороонд журам, аянга цахилгаанд зам тогтооход

²⁷Тэр үүнийг хараад, үүнийг тунхаглажээ. Тэр үүнийг тогтоосон бөгөөд бас үүнийг шалган үзсэн билээ.

²⁸Тэрээр хүнд хандан “Үзэгтүн, Эзэнээс эмээх нь мэргэн ухаан бөгөөд Нүгэл муугаас хол явах нь ухаарал юм” хэмээн айлдав гэлээ.