Read Ariun Bible 2013 – Ариун Библи 2013 Иов 29 Bible Online

Иов 29 - Ariun Bible 2013 – Ариун Библи 2013 bible

Иов 29

¹Иов яриагаа үргэлжлүүлэн хэлэхдээ:

²—Ай даа, өнгөрөн одсон сарууд минь байсан ч болоосой Үнэндээ Бурханаар хамгаалуулсан тэр л өдрүүдийнх шигээ байсан ч болоосой.

³Дэнлүү нь толгой дээр минь гийж байхад Тэр гэрлээр нь би түнэр харанхуй дундуур явдаг байж дээ,

⁴Майхан дээр минь Бурханы андлал оршсон тэр үед Би оргил үедээ байж дээ.

⁵Төгс Хүчит Нэгэн нь надтай хамт байсан тэр үед Төрсөн хүүхдүүдээрээ би хүрээлүүлж байлаа

⁶Алхам минь цөцгийгөөр булхагдаж, Хад чулуу надад тос цутгадаг байлаа.

⁷Хотын гулдан хаалга уруу гарч очих тэр үед Хуран цугладаг талбай дээр суудлаа эзлэх тэр цагт

⁸Өсвөр залуус намайг хараад нуугддаг байлаа. Өвгөд нь хүртэл миний өмнө босоод зогсдог байлаа.

⁹Ноёд алгаараа амаа тагласан мэт үг яриагаа зогсоодог,

¹⁰Дээдсүүд хэлээ тагнайндаа наалдуулсан мэт дуугаа хураадаг байлаа.

¹¹Чих бүр намайг сонсоод ерөөн ярьдаг байсан Нүд бүр намайг хараад магтан гэрчилдэг байсан.

¹²Тэр үед, гуйн хашхирсан ядуусыг, Туслах хүнгүй өнчдийг Би авардаг байлаа.

¹³Тэгээд мөхлийн ирмэгт байгсдын ерөөл Надад ирдэг байж дээ. Бэлэвсэн эмэгтэйчүүдийн зүрхийг баярлуулан Би дуулуулдаг байсан.

¹⁴Шударга зөвийг сахин Түүнийгээ хувцас мэт өмсөж, Шүүлт нь миний гадуур хувцас, малгай болж байсан.

¹⁵Хараагүй нэгэнд нь нүд Хазгар доголонд нь хөл

¹⁶Үгээгүйчүүлд эцэг нь болж байв, би. Харийн хүний төлөө хэргийг нь нягталдаг байлаа.

¹⁷Үл бүтэх нэгний эрүү амыг хэмхэлж, Үмхэж зуусан олзыг нь хураан авч байлаа, би.

¹⁸Тэр үед би “Үүрэндээ би үхнэ, Өдрүүдээ би элс мэт олшруулна.

¹⁹Уг үндэс нь минь усанд салбарлаж Шүүдэр шөнөжин бөнжигнөсөн мөчрүүд болно.

²⁰Алдар хүнд минь үргэлжид шинэчлэгдэн нэмэгдэж Атган дахь нум минь өдөр бүр хүчирхэгжинэ” гэж боддог байж дээ.

²¹Тэр үед намайг сонсоод тэд хүлээцгээдэг байлаа Тус зөвлөгөөг минь чимээгүй авдаг байлаа.

²²Үгсийн минь араас тэд ахин хэлэлцдэггүй, Үг яриа минь тэдэнд шүүдэр мэт дусалж байж дээ.

²³Хур бороо хүсэх мэт намайг тэд хүлээдэг байсан, хаврын бороо тосох мэт над уруу амаа ангайлгадаг байлаа.

²⁴Итгэлээ алдсан үед нь би инээмсэглэдэг байлаа. Царайны минь гэрэлд тэд урамшдаг байлаа.

²⁵Тэдэнд замыг нь заан сонгож, Тэргүүнд нь залардаг байхдаа би Дайчдынхаа дунд заларсан хаан мэт Гашуудагсдыг тайтгаруулагч нэгэн мэт байж дээ.