Read Ariun Bible 2013 – Ариун Библи 2013 Иов 3 Bible Online

Иов 3 - Ariun Bible 2013 – Ариун Библи 2013 bible

Иов 3

¹Үүний дараа Иов ам нээж, төрсөн өдрөө хараав.

²Тэгээд Иов:

³—Сөнөг, төрсөн өдөр минь, “Хүү мэндлэв” гэсэн шөнө ч сөнөг!

⁴Харанхуйлаг, тэр өдөр! Дээр буй Бурхан түүнийг бүү хараг. Тэр өдөр гэрэл ч бүү гэрэлтэг.

⁵Харанхуй ба үхлийн харанхуй түүнийг залгиг. Үүл түүнийг бүрхэг. Өдөр харанхуй болж түгшүүлэг.

⁶Түнэр харанхуй тэр шөнийг эзлэг. Жилийн өдрүүд дунд тэр өдөр бүү баясаг. Тэр нь саруудын тоонд ч бүү орог.

⁷Тийм ээ, тэр шөнө үр ч үгүй, Баярын уухай ч үгүй байг.

⁸Левиатаныг[6] сэрээгч, өдрийг хараагч нар түүнийг харааг.

⁹Үдшийн бүрийд түүний одод бөхөг. Хүлээсэн гэрэл нь эс ирэг, Үүрийн гэгээг эс үзэг.

¹⁰Учир нь эхийн минь хэвлийн амыг тэр өдөр эс хаажээ, Эл нүднээс минь зовлонг үл нуужээ.

¹¹Төрөхдөө юунд эс үхэв, би Хэвлийнээс гарахдаа юунд үл эндэв, би?

¹²Тосох өвдгүүд дээр юунд унав, би Угжих гэж эхийн хөх юунд угтав, намайг!

¹³Учир нь би анир ч үгүй хэвтээд, Амран нойрсож байх байсан сан.

¹⁴Нурангийг дахин босгосон Дэлхийн хаад, зөвлөгч нарын дунд ч юмуу,

¹⁵Мөнгөөр гэрээ,[7] Алтаар өөрийгөө дүүргэсэн Ноёдын дунд ч юмуу байх байсан сан.

¹⁶Эсвэл би төрөөгүй зулбадас, Гэрэл үзээгүй нялхсын адил байх минь ч яалаа.

¹⁷Тэнд гэм буруутнууд эс түйвээдэг, Тэнд туйлдаж зүдрэгсэд амарцгаадаг.

¹⁸Хоригдлууд хамтдаа тайвныг эдэлж, Харгалзагчийн хашхирах дууг тэд үл сонсдог.

¹⁹Тэнд их багагүй байцгааж, Эзнээсээ боолчууд чөлөөлөгддөг.

²⁰Гачлант нэгэнд гэрэл, Гашуудах нэгэнд амь яагаад өгөгдөө вэ?

²¹Тэрээр үхлийг хүсэвч тэр нь эс ирэх агаад Нууц эрдэнэсээс илүүгээр үхлийг хайж ухна.

²²Булш юугаа олвол, хөөрөн баярлах бус уу?

²³Бурханаар хашигдсан, замаа эс харах хүмүүнд Гэрэл юунд өгөгдөө вэ?

²⁴Гаслаан минь миний хоол хүнс болов Ёолоон минь ус мэт асгарав

²⁵Эмээсэн минь над дээр ирж, Айсан минь надад тохиов.

²⁶Би тайвширсангүй, Би тайтгарсангүй, Би амарсангүй, Харин түйвээн нөмрөв.