Read Ariun Bible 2013 – Ариун Библи 2013 Иов 30 Bible Online

Иов 30 - Ariun Bible 2013 – Ариун Библи 2013 bible

Иов 30

¹Надаас бага залуу нь гэтэл одоо Намайг элэглэх болжээ. Хоньч нохдынхоо дайтай ч би Хардаггүй байсан, тэдний эцгүүдийг

²Надад тэдний гарын хүчнээс олох юу байлаа даа Насны танаг нь нэгэнт тасарсан улс байсан хойно.

³Үгүйрэл өлсгөлөнгөөс болж доройтсон Эзгүйрч хоосорсон хуурай газрыг тэд хэмэлж,

⁴Элдэв бутны хажуугаас гашуун ногоо түүж Тац модны үндсийг хоол хүнсээ тэд болгодог байсан.

⁵Хүний дундаас тэд хөөгдсөн, Хулгайч мэт араасаа хашхируулсан

⁶Хөндийн хажуу хавцлуудад, газрын ангал болон асганд тэд амьдардаг байсан.

⁷Бутнуудын дор тэд хашхиран сууж Хогийн өвсөн дунд тэд хамтдаа цугладаг байв.

⁸Тэнэгүүдийн хүүхдүүд Нэр хүндгүй хүмүүсийн хүүхдүүд, Тэд газар нутгаасаа хэдийнээ зайлуулагджээ.

⁹Өдгөө тэд намайг элэглэл дуу болгожээ Өөрөө би тэдний явган үг болжээ.

¹⁰Намайг тэд жигшиж, надаас дөлцгөөжээ. Нүүр уруу минь нулимахаас ч цээрлэдэггүй болжээ.

¹¹Миний оосрыг Тэр тайлж, намайг дорд болгосон тул Мөнөөх хэд ч миний өмнө ах захаа алдав.

¹²Баруун гар талд минь тэдний үрс босож хөлийг минь түлхэн, Гамшгийн замуудаа миний эсрэг байгуулж байна.

¹³Зам жимийг минь алдагдуулж, Хорлогдлоос минь ашиг олоход Хэн ч тэднийг эс хориглоно.

¹⁴Өргөн цөмөрхийгөөр тэд орж ирэх мэт Балгасан дунд тэд давалгаа адил дайрна.

¹⁵Аймшиг хөнөөл над уруу эргэжээ. Алдар хүндийг минь салхи мэт мөшгөж байна. Дэвжил бадрал минь үүл мэт нүүн одов.

¹⁶Сэтгэл минь миний дотор асгарчээ. Зовлон зүдүүр надаас зууран авчээ.

¹⁷Шөнө миний ясыг зовоож Өвчин намайг амраахгүй мэрнэ.

¹⁸Хувцас хунарыг минь базан авч, хүрэмний минь зах мэт намайг боож байна.

¹⁹Тэрээр намайг шаварт хаясан бөгөөд Тийнхүү би шороо үнс мэт болов.

²⁰Тусламж эрэн Тан уруу хашхирах боловч, та надад хариулахгүй юм. Намайг босоход Та харж анхаарахгүй юм.

²¹Харгис ханддаг болжээ, Та надад Хүчит мутраараа намайг хавчих юм.

²²Салхиар намайг Та өргөн хийсгэж, Шуурганд намайг уруудуулнам.

²³Үхэлтэй намайг золгуулж, амьд бүхний уулзах гэрт аваачихыг чинь би мэдэж байна.

²⁴Гэлээ ч нурангин доорх нэгэн гараа сунган Гамшиг зовлон дундаасаа хашхирдаг шүү дээ.[47]

²⁵Хүнд цаг тохиосон нэгний төлөө би уйлаагүй гэж үү? Гачигдагсдын араас сэтгэл минь өвдөөгүй гэж үү?

²⁶Би сайныг горилж байхад муу нь ирлээ. Би гэрлийг хүлээж байхад харанхуй ирлээ.

²⁷Гэдэс дотор минь халуу шатаад намжихгүй байна. Зовлон зүдүүрийн өдрүүд надад айсуй.

²⁸Би гэрэлгүй бүүдгэр газар очлоо. Энд зогсоод би чуулган дотор хашхирлаа.

²⁹Би цөөвөр чонын ах дүү, Би тэмээн хяруулын анд нөхөр.

³⁰Арьс минь харлаж, Яс минь халуу төөнөнө.

³¹Ингээд ятга минь уй гашуу, Лимбэ минь уйлагсдын дуу хоолой болов.