Read Ariun Bible 2013 – Ариун Библи 2013 Иов 33 Bible Online

Иов 33 - Ariun Bible 2013 – Ариун Библи 2013 bible

Иов 33

¹Ямар ч байсан, Иов оо, Яриаг минь сонсож, бүх үгийг минь чагнаач.

²Харагтун, би одоо амаа нээсэн, Хэл минь миний аман дотор ярьдаг.

³Зүрхний минь шулуун шударгыг үгс минь тунхаглаж, Чин үнэнээр ярихыг уруул минь мэддэг.

⁴Намайг Бурханы Сүнс бүтээсэн бөгөөд Надад амийг Төгс Хүчит Нэгэний амьсгал өгдөг билээ.

⁵Чаддаг юм бол надад хариул. Миний өмнө өөрийгөө бэлдээд зогс.

⁶Үзэгтүн, Бурханд би чамтай адил билээ Бас л адилхан шаврын өөдөснөөс бүтээгдсэн билээ.

⁷Үзэгтүн, надаас айх хэрэггүй, Үнэндээ би чамайг эс дарна.

⁸Үнэхээр чи миний чихэнд ярьсан үгсийг би сонссон билээ.

⁹“Би цэвэр, гэмт үйлдэлгүй, Би гэм халгүй, дотор минь хилэнц алга.

¹⁰Харагтун, Тэр л миний эсрэг далим олж, Хөөрхий намайг дайснаа гэж тооцдог.

¹¹Хөлийг минь Тэрээр хэвэнд оруулж, Хамаг харгуйг минь харуулддаг.” гэж хэллээ.

¹²Үзэгтүн, гэвч чиний зөв биш ээ. Үнэхээр би чамд хариулъя. Учир нь хүмүүнээс Бурхан аугаа билээ.

¹³Юм бүхэнд минь хариулдаггүй гэж юунд чи Түүний эсрэг гомдоллоно вэ?

¹⁴Бурхан нэг удаа мөн хоёр удаа хэлдэг боловч хэн ч үүнийг ойшоодоггүй юм.

¹⁵Хүмүүсийг гүн нойр хучин, хэвтэр дээрээ дугхийх зуур зүүд буюу шөнийн үзэгдэл дотор,

¹⁶Хүний чихийг тэгэхэд л Тэр нээж, Хатуу анхааруулж айлгадаг нь

¹⁷Саар явдлаас нь хүнийг эргүүлж, Сайрхал бардамналыг нь үгүй хийхийн тулд билээ.

¹⁸Ийнхүү Тэрээр хүний сэтгэлийг нүхнээс аварч, тэдний амийг Үхэгсдийн орноос гэтэлгэдэг.

¹⁹Өвчин шаналлаар тэд орондоо хэвтэж Үргэлжийн тэмцэлдээнд яс нь янгинан шийтгэгддэг.

²⁰Ингэснээр амь гол нь талхыг Дуршил хүсэл нь хоолыг жигшдэг.

²¹Тэгэхэд бие махбод хатан хорчийж, үзэгдэхгүй болж, харагддаггүй байсан яс нь ил гарч ирдэг.

²²Ийнхүү тэрээр нүхэндээ, амь нь үхэл учруулагсдад ойртдог ажээ.

²³Хэрэв тэр хүнийг зөвт болохыг нь бидэнд тунхаглах, Түүний төлөө зуучлагч тэнгэрэлч мянгын дунд нэг байгаад

²⁴Тэр нь өнөөх хүнийг нигүүлсэж, “Түүнийг нүхэнд унахаас авар. Төлөөсийг нь би олов” гэвэл

²⁵Махбод нь идэр үеийнх шигээ сэргэг болог. Залуугийнхаа өдрүүдэд байсан хүч нь эргэж ирэг.

²⁶Тэгээд Бурханд тэр залбирахад Түүнийг Бурхан хүлээн авна. Түүний нүүр уруу баяртайгаар харна, тэрээр, Тэр ч зөвт байдлыг нь дүүрэн хариулна.

²⁷Тэрээр хүмүүст дуулж, тунхаглахдаа “Нүгэл хийж, зөвийг гажуудуулахад минь Надад хариу эс ирэв.

²⁸Нүхэнд унаж үхэх амийг минь Тэр золин, амьдралд минь гэрэл үзүүлэв” гэх болно.

²⁹Үзэгтүн, Бурхан үүнийг хүнд гурвантаа үйлддэг нь

³⁰Амийг нь булшны нүхнээс буцаан авчрахын тулд агаад Амийн гэрлийг түүнд үзүүлэхийн тулд болой.

³¹Иов оо! Намайг анхааран сонс. Дуугүй байж, намайг яриул.

³²Хэлэх зүйл чамд байвал надад хариул. Чамайг зөвтгөхийг би хүсэж байгаа учир хэлэх зүйл байвал хэл.

³³Хэрэв байхгүй бол дуугүй байж намайг сонс. Мэргэн ухааныг танд би сургая гэв.