Read Ariun Bible 2013 – Ариун Библи 2013 Иов 36 Bible Online

Иов 36 - Ariun Bible 2013 – Ариун Библи 2013 bible

Иов 36

¹Тэгээд Елиху үргэлжлүүлэн

²—Намайг жаахан хүлээгээч, Бурханы төлөөх үгс надад их буйг харуулъя.

³Би мэдлэгээ алс холоос авчирч, Бүтээгчээ зөвт гэдгийг нь харуулна.

⁴Үнэхээр миний үгс худал биш юм. Мэдлэгээр төгс нэгэн өмнө чинь байна шүү дээ.

⁵Харагтун, Бурхан хүчирхэг бас ухаалаг хүчтэй гээд хэнийг ч жигшдэггүй.

⁶Тэрээр гэм буруутнуудыг амьд үлдээдэггүй харин зовж зүдрэгсдэд шударга шийдвэрийг өгдөг.

⁷Тэрээр зөвт нэгнээс мэлмийгээ салгадаггүй. Харин тэднийг сэнтий дэх хаадтай үүрд залдаг бөгөөд тэд өргөмжлөгддөг билээ.

⁸Тэд гинжинд нухлуулж, зовлонгийн урхинд баригдах үед

⁹Ихэрхүү загнасан үйлсийг нь, гэмт үйлдлийг нь Тэрээр тэдэнд мэдүүлж өгдөг.

¹⁰Тэр чихийг нь сургамжид нээж, тэднийг цөв муугаас эргэхийг тушаадаг.

¹¹Хэрэв тэд сонсоод үйлчилбэл тэд өдөр хоногуудаа амжилт цэцэглэлд, он жилүүдээ дэвшил дунд өнгөрөөх болно.

¹²Харин сонсохгүй аваас тэд илдэнд мөхөж, мэдлэггүйгээр үхэх болно.

¹³Сүсэг бишрэлгүйчүүд Түүний эсрэг уур уцаар хураадаг. Тэрээр тэднийг хүлэх үед Тэд тусламж эрэн хашхирдаггүй.

¹⁴Сэтгэл нь залуугаараа тэд үхэж, амьдрал нь шүтээний янхан эрчүүдийн дунд шившигтэйгээр төгсдөг.

¹⁵Харин зовж зүдрэгсдийг Зовлон зүдүүрээр нь Тэр аварч, дарлагдлаар чихийг нь нээдэг.

¹⁶Тэр чамайг ч гэсэн нэгэнтээ зовлон шаналлын амнаас гачаалгүй өргөн уудам газарт гаргаж Ширээн дээр чинь тос нүнжигтэйг тавиагүй гэж үү.

¹⁷Гэтэл өдгөө буруутны хэрэг чамаар дүүрч Шийтгэл болон шударга шүүлт чамайг барьж авахаар айсуй.

¹⁸Уур хилэн чинь жигшүүр уруу чамайг уруу татах вий. Тэгвэл агуу төлөөс ч чамайг эргүүлж чадахгүй.

¹⁹Чиний баялгууд эсвэл бүх хүч чадал Чамайг зовлон шаналлаас хамгаалж чадах уу?

²⁰Байгаа газраа хүмүүс таслагддаг шөнийг бүү хүсэмжил.

²¹Болгоомжтой бай, ёс бус уруу бүү эргэ. Учир нь чи үүнийг зовлон зүдүүрээс илүүгээр эрхэмлэсэн билээ.

²²Харагтун, Бурхан хүч дотроо өргөмжлөгджээ. Харин Түүн шиг багш хэн бэ?

²³Хэн Түүнд замыг нь тогтоон өгч, Хэн Түүнд “Та буруу үйлдэж байна?” гэж хэлж чадах юм бэ?

²⁴Түүний ажлыг чи өргөх учиртайгаа сана. Тэрний тухай хүмүүс дуулсан билээ.

²⁵Бүх хүн үүнийг харсан бөгөөд Бүгд үүнийг алсаас үздэг.[50]

²⁶Харагтун, Бурхан өргөмжлөгдсөн бөгөөд бид мэддэггүй. Түүний он жилүүдийн тоог ухварлашгүй.

²⁷Учир нь Тэрээр усны дуслуудыг дээш дэгдээдэг бөгөөд Манан будангаас бороог бий болгодог.

²⁸Үүнийг үүлс доош асган Үлэмж арвинаар хүмүүн дээр цавддаг.

²⁹Үүлсийн тархахыг хийгээд Түүний асрын нижигнэх дууг Үнэндээ хэн ойлгож чадах вэ?

³⁰Үзэгтүн, Тэр эргэн тойрондоо аянгаа цацрааж, Тэнгисийн ёроолыг ч бүрхдэг.

³¹Тэрээр эдгээрээрээ хүмүүсийг шүүдэг.[51] Тэрээр хоол хүнсийг ч элбэг хангалуунаар өгдөг.

³²Тэрээр мутраараа аянгыг атгаад Хаана ниргэхийг түүнд тушаадаг.

³³Түрхрээн нь Түүнийг тунхаглах агаад Мал сүрэг ч юу болж буйг мэдэрдэг билээ.