Read Ariun Bible 2013 – Ариун Библи 2013 Иов 39 Bible Online

Иов 39 - Ariun Bible 2013 – Ариун Библи 2013 bible

Иов 39

¹Янгир төрөх цагийг чи мэддэг үү? Буга тугаллахыг чи үзсэн үү?

²Хээлээ тээх цагийг нь чи тоолж чадах уу? Эсвэл төрөх хугацааг нь чи мэдэх үү?

³Тэд доош сөхрөн байж, үр төлөө гаргаж, төрөлтийн бэрхээс салнам.

⁴Үр төл нь эрүүл чийрэг өсөж, хээр талд торнидог. Тэгээд оддог бөгөөд буцаж ирдэггүй.

⁵Хэн хуланг сул чөлөөтэй явуулдаг вэ? Хэн хулангийн чөдрийг тайлдаг вэ?

⁶Хээр талыг Би түүнд гэрийг нь болгож, Хужиртай газрыг орших нутгийг нь болгосон билээ.

⁷Хотын шуугианыг тэр жигшдэг. Харгалзан туугчийн орилоон дууг ч сонсдоггүй.

⁸Тэрээр бэлчээр хайн уулсыг шинждэг. Ногоон ургамал бүрийг эрдэг.

⁹Зэрлэг үхэр чамд үйлчлэхийг хүсэх үү? Эсвэл тэвшний чинь хажууд хоноглох уу?

¹⁰Чи зэрлэг үхрийг шан татуулахаар олсоор хүлж чадах уу? Тэр нь араас чинь дагаад хөндий газрыг хагалах уу?

¹¹Хүч нь агуу учир чи түүнд найдах уу? Хүч хөдөлмөрөө түүнд даатган үлдээх үү?

¹²Тэр буудайн үрийг чинь эргүүлэн авчирч Үтрэмд чинь хураана гэдэгт чи итгэх үү?

¹³Тэмээн хяруул далавчаа түргэн дэвдэг, Гэвч өрөвтасын жигүүртэй зүйрлэхийн аргагүй.[57]

¹⁴Өндгөө газарт тэр орхидог. Өнөөдүүлийг нь хөрс шороо л дулаацуулдаг.

¹⁵Харин тэдгээрийг нь хөл няцалж, зэрлэг араатнууд бяцлаад гарч болзошгүйг тэр мартдаг.

¹⁶Үр зулзгандаа тэр өөрийнх нь биш мэт харгис ханддаг. Хүч хөдөлмөр нь хэрэггүй болох хэдий ч тэр ердөө зовдоггүй.

¹⁷Учир нь Бурхан түүнийг мэргэн ухаанаар дутааж, Ойлголтын хувийг түүнд өгөөгүй билээ.

¹⁸Өөрийгөө өндийлгөн цовхчих үед Хүлэг болоод морьтонг нь тэр жигшиж инээдэг.

¹⁹Хүлэг моринд чи чадлыг өгдөг үү? Хүзүүг нь чи дэлээр халхалдаг уу?

²⁰Түүнийг чи царцаа адил харайлгадаг уу? Түүний сүртэйгээр тургих нь аймшигтай билээ.

²¹Тэр нь эрчтэйгээр газар ухаж, хүч чадалдаа эрдэж, Хуяг зэвсэгтэй тулгарахаар явдаг.

²²Айдас хүйдсийг жигшин инээдэг зүрх шантардаггүй. Тэрээр илднээс ч эргэж буцдаггүй.

²³Дээр нь сумны саадаг шажигнаж, жад ба хануур жад гялалзана.

²⁴Чичирч, салганан газар дээгүүр давхиж, бүрээн дуунд ч зогсохгүй агсамнадаг.

²⁵Бүрээн дуунаар “Иин хо хо” цангинуулдаг. Тулааныг, жанжингуудын нүргэлэх дууг, дайны уухайг алсаас үнэртдэг билээ.

²⁶Өмнө зүг уруу жигүүрээ дэлгэн шонхор чиний ухаанаар элин хальдаг уу?

²⁷Өндөрт халин бүргэд чиний тушаалаар нисэж, Өндөр оргилд үүрээ засдаг уу?

²⁸Тэр нь хавцалд амьдарч, чулуун цохио, бэхлэлт газарт амарч хоноглодог.

²⁹Тэндээсээ тэр олзоо хайдаг. Түүний нүд алс холоос хардаг.

³⁰Үр зулзаганууд нь цус хөхдөг. Үхдэлүүд хаана байна, тэр тэнд байдаг бөлгөө гэж айлдав.