Read Ariun Bible 2013 – Ариун Библи 2013 Иов 4 Bible Online

Иов 4 - Ariun Bible 2013 – Ариун Библи 2013 bible

Иов 4

¹Дараа нь теман хүн Елифаз хариулан:

²—Хэрэв хүн чамд үг хэлэхээр зоригловол, Тэвчээр чинь алдагдах уу? Хэн гэвч амаа хамхиж чадах билээ?

³Харагтун, олон хүнийг сургамжлан Сульдсан гарыг тэнхрүүлсэн нь чи билээ.

⁴Ганхагсдыг зогсоход нь Сөхрөгсдийг хүчирхэг болоход нь Чиний үг тусалсан билээ.

⁵Чамд одоо эдгээр нь ирэхэд Чи тэвчээргүй байна. Чамд эдгээр нь хүрэхэд Чи хиртхийжээ.

⁶Итгэл чинь Бурханаас эмээхүй, Найдвар чинь чиний гэмгүй замууд бус уу?

⁷Санатугай, гэмгүй атлаа мөхсөн хэн байна? Зөв шударга атлаа сөнөсөн нь хаана байна?

⁸Харснаар минь бол, Ёсон бусыг газар мэт хагалж, тариалагсад зовлон зүдүүрийг ургац мэт хурааж авдаг.

⁹Тэд Бурханы амьсгалаар мөхөж, Тэд Түүний уур хилэнгийн цохилтод идэгддэг юм.

¹⁰Арслангийн архираан, Эрслэнгийнх нь дуу, Идэрчүүдийнх нь шүд бүгд хугарчээ.

¹¹Идэшгүй болсон арслан үхэж, Эрслэнгийнх нь зулзаганууд таран бутарчээ.

¹²Над уруу нэгэн үг гэтэж ирэв. Чих минь үүний шивнээг сонордов.

¹³Хүмүүнийг гүн нойронд автах үед Шөнийн үзэгдлүүдээс хоромхон бодлууд ирэв

¹⁴Айдас чичрэл над дээр ирж, Бүх ясыг минь доргиов.

¹⁵Тэгээд нүүрэн дээгүүр минь сүнс өнгөрсөнд, Биеийн минь үс арзайн босов.

¹⁶Эс хөдлөвч төрхийг нь би Ялгаж эс танив. Нэгэн дүрс нүдний минь өмнө байв. Чимээ ч алга атал Нэгэн дуун надад сонсогдлоо.

¹⁷“Бурханы өмнө хүмүүн зөвт[8] байж чадах уу? Бүтээгчийнхээ өмнө хүн гэгч цэвэр[9] байж чадах уу?

¹⁸Зарц нартаа Тэрээр итгэдэггүй, Тэнгэрэлч нарынхаа ч эсрэг Тэрээр алдаа юуг нь тулгадаг атал

¹⁹Шавар сууцанд амьдардаг, Суурь үндэс нь шороо тоосонд байдаг, Хивэн эрвээхэй адил бяцлагддаг хүмүүст Тэр яаж найдах юм!

²⁰Өглөөнөөс үдшийн зуурт л бяцлагддаг билээ, тэд Хүндэтгэл ч үгүйгээр мөнхөд мөхдөг билээ, тэд.

²¹Майхнуудынх нь оосор тэдний дотор тасран унаж, Мэргэн ухаанаас ангид үхдэг юм, тэд!”