Read Ariun Bible 2013 – Ариун Библи 2013 Иов 5 Bible Online

Иов 5 - Ariun Bible 2013 – Ариун Библи 2013 bible

Иов 5

¹Одоо дуудаач, хариулах хэн нэгэн байна уу? Олон ариун хүний алинд нь чи хандах вэ?

²Түргэн уур мунхагийг алж, Гэнэн хүнийг атаархал хөнөөдөг.

³Үндэслэж буй мунхгийг би харж Орон гэрийг нь шууд хараав.

⁴Аюулгүй байдал үр хүүхдээс нь хол бөгөөд Дааман хаалган дотор тэднийг бяцлагдахад Аврагч үгүй аж.

⁵Өлөн хүмүүс тэдний ургацыг цөлмөж, Өргөст бутнууд дундаас ч түүж хамдаг агаад Цангагчид эд хөрөнгөнд нь санаархдаг.

⁶Золгүй явдал шорооноос гардаггүй, Зовлон гамшиг ч газраас ургадаггүй юм.

⁷Дээш үсчих оч[10] адил Зовлонгийн төлөө л хүн төрдөг.

⁸Харин би Бурханыг эрэлхийлж, Бурханы өмнө өөрийн хэргийг тавихсан.

⁹Тэрээр аугаа, ухааршгүй зүйлсийг болон Тоо томшгүй гайхамшгуудыг үйлддэг.

¹⁰Тэрээр газар дэлхий дээр хур бороо өгч, Талбайнуудад ус илгээдэг бөгөөд

¹¹Дорой хүмүүсийг Тэр өндөрт тавьж, Гашуудагсдыг аюулгүй байдалд өргөх ажээ.

¹²Тэрээр башир хүмүүсийн хуйвалдааныг тасалснаар Тэдний гар амжилт олж эс чадна.

¹³Тэрээр цэцдийг баширлал дээр нь барьж авдаг Зальтнуудын зөвлөгөө даруй хүчингүй болдог.

¹⁴Өдрөөр тэд харанхуйтай учирч, Үд дунд ч шөнө мэт тэмтэчдэг.

¹⁵Тэрээр харин ядуусыг тэдний амны сэлэм[11] Хүчтэний савраас авардаг.

¹⁶Иймд ядууст найдвар байгаа бөгөөд Шударга бус явдал амаа хамхидаг.

¹⁷Үзэгтүн, Бурханаар сургамжлагддаг хүн Юутай жаргалтай вэ, Тиймээс Төгс Хүчит Нэгэний гэсгээлтийг бүү жигш.

¹⁸Тэрээр шархлуулдаг ч боож өгдөг. Тэрээр цохидог ч Түүний мутар эдгээдэг.

¹⁹Зургаан гайгаас Тэр чамайг аварч, Долоон хорлол чамд үл хүрнэ.

²⁰Өлсгөлөнгийн үед үхлээс, Дайны үед илдний хүчнээс Тэр чамайг золино.

²¹Чи хэлний ташуураас халхлагдаж, Сүйрэл ирэхэд эс айна.

²²Сүйрэл ба өлсгөлөн болоход чи инээж, Хээрийн араатнуудаас ч эс айна.

²³Учир нь чи талын чулуунуудтай холбоотон болж, Хээрийн араатнууд ч чамтай эвтэй байх болно.

²⁴Сууцаа нягтлахад чинь алдагдсан зүйл үгүй тул Майхан чинь аюулгүй болохыг чи мэднэ.

²⁵Үр удмууд чинь олширч, Үр хүүхэд чинь газар дэлхийн өвс мэт болохыг Чи бас мэдэх болно.

²⁶Цагт нь хурааж юүжлээд үтрэмд аваачсан тариа мэт Сайхан өндөр наслаад булшиндаа чи орно.

²⁷Үзэгтүн, энэ үнэн, бид шалгасан билээ. Сонсогтун, өөрөө ухагтун гэв.