Read Ariun Bible 2013 – Ариун Библи 2013 Иов 6 Bible Online

Иов 6 - Ariun Bible 2013 – Ариун Библи 2013 bible

Иов 6

¹Тэгэхэд Иов хариулж

²Өө, уй гашуу минь хэмжигдэж, Бүх гай түйтгэр минь Жинлүүр дээр тавигддаг ч болоосой!

³Тэгвэл тэр нь далай тэнгисийн элснээс ч илүү хүнд байхсан. Тиймээс үгс минь тэвдүү байна.

⁴Төгс Хүчит Нэгэний сумнууд миний дотор орж Тэдний хорыг сүнс минь ууж байна. Бурханы аймшгууд миний эсрэг жагсжээ.

⁵Өвс ногоотой байж хулан орилох уу? Өл тэжээлтэй байтлаа үхэр мөөрөх үү?

⁶Амтгүй юмыг давслахгүйгээр идэж чаддаг бил үү? Замба цэцгийн шүүсэнд амт буй гэж үү?

⁷Тэдгээрт хүрэхээс сэтгэл минь татгалзаж байна. Тэд надад муудсан хоол мэт юм.

⁸Өө, миний хүсэл биелэгдэж, Бурхан миний тэмүүллийг өгч соёрхоосой!

⁹Бурхан намайг няцлахыг хүссэн байгаад Тэрээр мутраа илүү сул тавин, Намайг тасчин хаяасай!

¹⁰Тэгвэл энэ нь надад тайтгарал болж, Хөнөөлт өвчиндөө ч би баярлахсан. Учир нь би Ариун Нэгэний үгсээс урваагүй юм.

¹¹Хүлээхийн тулд надад ямар хүч байгаа вэ? Миний төгсгөл ямар болоод би тэсэх ёстой билээ?

¹²Хад чулууны хүч надад бий бил үү? Хүрлээр махбод минь бүтээ юү?

¹³Өөрийгөө гэх тус надад үгүй нь үнэн Бүх арга надад барагджээ.

¹⁴Анд нөхрөө үл энэрэгч нь Төгс Хүчит Нэгэнээс эмээхийг умартдаг.

¹⁵Ах дүүс минь цөөрөм мэт, Цөөрмийн ширгэдэг горхи мэт хуурмаг ажээ.

¹⁶Энэ нь мөстсөн үедээ булингартай бөгөөд Дотроос нь цас хайлдаг.

¹⁷Усгүй болохдоо эд дуугүй болж, Халуун болоход тэд бүр замхран алга болдог.

¹⁸Тэдний замналын жимүүд муруй тахир бөгөөд Тэд цөл уруу явж, ор сураггүй алга болдог билээ.

¹⁹Темагийн жинчид тэднийг харж, Шебагийн аянчид тэдгээрт найдаж байсан.

²⁰Найдлага тавьж байсан учраас Тэд гонсойсон бөгөөд Тэнд очоод тэд улайцгаасан.

²¹Үнэхээр та нар одоо тийм болцгоожээ. Та нар аймшгийг хардаг бөгөөд айн дагжиж байна.

²²Би “Надад бэлэг өгөөч” эсвэл “Эд хөрөнгөнөөсөө миний төлөөсийг өргөөч” гэж,

²³эсвэл “Өстний савраас намайг чөлөөлөөч” гэж, эсвэл “Харгис догшин хүмүүсийн савраас намайг авраач” гэж хэлсэн үү?

²⁴Надад сургаач, тэгвэл би дуугүй байя. Хэрхэн алдсаныг минь харуулаач.

²⁵Шударга үгс юутай хүчтэй вэ? Гэвч та нарын залруулга юуг залруулдаг вэ?

²⁶Цөхөрсөн нэгний үгс салхи мэт байдаг байхад Та нар үгсийг буруутгах гэж байна уу?

²⁷Та нар өнчин хүмүүсийн төлөө ч шавга хаяж, Анд найзаа арилжих байсан.

²⁸Та нарын нүүрний өмнө би худал ярьж байгаа эсэхийг Надаас одоо хараач.

²⁹Эргэгтүн, би гуйж байна, бурууг бүү байлга. Эргэгтүн, миний шударга нь үүнд байна.

³⁰Хэлэн дээр минь буруу юм байна уу? Тагнай минь хорлолыг ялгаж чадахаа больсон уу?