Read Ariun Bible 2013 – Ариун Библи 2013 Иов 9 Bible Online

Иов 9 - Ariun Bible 2013 – Ариун Библи 2013 bible

Иов 9

¹Тэгэхэд Иов хариулан

²—Тийм байдаг гэдгийг би үнэхээр мэднэ. Бурханы өмнө хүн хэрхэн зөвт байж чадах билээ?

³Хэрэв хэн нэгэн Түүнтэй зөвийн тухайд маргахыг хүсвэл, Мянгаас ганц удаад ч Түүнд хариулж эс чадна.

⁴Зүрх мэргэн, хүч төгөлдөр Түүнийг Эсэргүүцчихээд[14] амжилт олсон хэн байна?

⁵Уулсыг нүүлгэдэг Тэрээр Уурандаа тэднийг хөмрүүлэхэд нь Тэд яаж гэдгийг нь мэддэггүй билээ.

⁶Тэрээр газар дэлхийг ч байрнаас нь сэгсэрч, Баганануудыг нь ганхуулдаг.

⁷Түүнийг тушаахад нар манддаггүй бөгөөд Тэрээр оддыг лацаддаг.

⁸Тэр Өөрөө тэнгэрүүдийг сунган татаж, Далайн давалгаануудыг доош гишгэчдэг.

⁹Тэрээр Баавгайн орд, Маралын орд болон Долоон од, Мөн өмнөдийн ордуудыг бүтээсэн билээ.

¹⁰Тэрээр ухааршгүй агуу зүйлс хийгээд Тоо томшгүй гайхамшгуудыг бүтээж байдаг.

¹¹Тэр миний хажуугаар өнгөрсөн бол Түүнийг би харахгүй байх байсан. Тэрээр цаашаа өнгөрсөн бол Түүнийг би ажиглахгүй байх байсан.

¹²Тэрээр шүүрэн авахад Хэн Түүнийг саатуулж чадах вэ? Хэн Түүнд “Та юу хийж байна вэ?” гэж хэлж чадах байсан бэ?

¹³Бурхан уураа буцаахгүй. Рахабын[15] туслагч нар Түүний дор сөхөрдөг юм.

¹⁴Тэгэхээр би Түүнд хэрхэн хариулж, Түүний өмнө үгсээ сонгох вэ?

¹⁵Хэдийгээр би зөв байсан ч Хариулж чадахгүй байсан. Шүүгчийнхээ өршөөлийг би гуйх ёстой байж.

¹⁶Хэрэв би дуудаж, Тэр надад хариулсан бол Дуу хоолойг минь Тэр сонссон гэдэгт Би итгэж чадахгүй байх байсан.

¹⁷Учир нь Тэр намайг шуургаар довтолж, Шалтгаангүйгээр шархнуудыг минь олшруулав.

¹⁸Тэрээр амьсгаа авахыг ч надад зөвшөөрөлгүй, Харин уй гашуугаар намайг дүүргэдэг.

¹⁹Хүчний тухайд, Харагтун, Тэрээр Хүчит Нэгэн юм! Шударга ёсны хувьд, Түүнийг[16] хэн дуудаж чадах вэ?

²⁰Би хэдий зөвт ч гэсэн Миний ам намайг буруутгах болно. Би хэдийгээр өөлөх өөгүй ч Тэр намайг буруутай гэж тунхаглах болно.

²¹Би гэм буруугүй. Амь голоо үл бодов, би Амьдрал юугаа жигшив, би

²²Энэ бүгд нэг бус уу. Иймээс би “Тэрээр өөлөх өөгүйг ч, гэм буруутанг ч устгадаг” гэж хэлдэг.

²³Хэрэв гамшиг гэнэтийн үхлийг авчирдаг бол Гэмгүй нэгний цөхрөлийг Тэр элэглэдэг юм.

²⁴Газар дэлхий буруутуудын гарт өгөгдсөн юм. Тэрээр шүүгч нарынх нь нүүрийг бүтээдэг. Хэрэв Тэр л биш бол Өөр хэн байх билээ?

²⁵Миний өдрүүд ямар ч гүйгчээс илүү хурдан урсана. Тэд зугтан одож, сайныг эс үзнэ.

²⁶Энэ нь хулсан завинууд мэт хурднаар, Олзонд шумбан дайрах бүргэд мэт шалмагаар өнгөрөн оддог.

²⁷Хэдийгээр би “Би гомдолоо мартаж, Гунигт төрхөө орхиж, хөгжөөнтэй байя” гэж хэлдэг ч

²⁸Би бүх өвчин зовлонгоосоо айдаг. Учир нь Та намайг гэмгүй гэж тооцохгүй гэдгийг би мэднэ.

²⁹Би шийтгэгдэнэ, Тэгэхээр дэмий зүтгэж яах юм?

³⁰Өөрийгөө цас мэт хөөсрүүлэн угааж, Гараа шүлтээр цэвэрлэлээ ч,

³¹Та намайг нүхэнд унагаж Хувцас минь надаас ой гутах биз ээ.

³²Учир нь Тэрээр хүний хүү биш ээ. Миний асууж болох, Хамтдаа тэгээд шүүх уруу явж болох Над шиг хүн биш билээ.

³³Бид хоёрын аль алин дээр гараа тавих Шүүгч гэж бидний дунд үгүй.

³⁴Тэр саваагаа надаас холдуулж, Түүний аюумшиг намайг эс түгшүүлэг!

³⁵Тэгвэл би Түүнээс эмээлгүй ярихсан. Учир нь би дотроо иймэрхүү биш гэдгээ мэдэх билээ.