Read Ariun Bible 2013 – Ариун Библи 2013 Дуулал 10 Bible Online

Дуулал 10 - Ariun Bible 2013 – Ариун Библи 2013 bible

Дуулал 10

¹ЭЗЭН, Та яагаад тэртээ хол зогсном бэ? Бэрх цагт Та яагаад нуугднам бэ?

²Бардам зангаараа гэм буруутан нь Зовлонт нэгнийг мөшгөдөг. Өөрсдийнх нь сэдсэн башир явуулгад нь Тэднийг унагаач.

³Гэм буруутан хүсэл тачаалаараа сайрхах агаад Шунахай нэгэн, ЭЗЭНийг хараан үл ойшоодог.

⁴Гэм буруутан бардам нүүрлэж, эс хайдаг агаад Түүний бүхий л санаа бодолд “Бурхан байдаггүй”.

⁵Түүний зам ямагт бат бэх байж, Таны шийтгэлүүд өндөрт, Тэдний хараанаас гадуур билээ. Бүх дайснуудаа тэр доромжилдог юм.

⁶Тэрээр зүрхэндээ “Би огт ганхахгүй, үеэс үед зовлон бэрхшээлтэй би учрахгүй” гэдэг.

⁷Тэдний аманд хараал болон ов мэх, дарамтлал дүүрэн Тэдний хэлэнд төвөг садаа, ёс бус нь байдаг.

⁸Тэрээр тосгодын нуувчуудад суудаг. Далдхан газруудад тэрээр гэмгүй хүнийг алдаг. Нүд нь, ядуу хүнийг нууцхан хайж байдаг.

⁹Арслан нүхэндээ мяраадаг шиг Тэрээр нууц газруудад хэвтдэг Ядарсан нэгнийг барихаар Тэрээр хүлээн хэвтдэг. Тэрээр ядарсан нэгнийг Торондоо оруулж барьдаг.

¹⁰Тэр мяраан атийн хэвтдэг бөгөөд Ядуучууд түүний хүчирхийлэлд унадаг.

¹¹Тэгээд зүрхэндээ “Бурхан мартсан билээ. Нүүрээ Тэр нуусан, хэзээ ч үүнийг харахгүй” гэдэг.

¹²ЭЗЭН, босооч! Бурхан, мутраа өргөөч! Ядуусыг бүү мартаач.

¹³Бурханыг юунд буруут нь харааж, Зүрхэндээ тэрээр “Та буцааж нэхэхгүй” гэдэг вэ?

¹⁴Харин Та харсан билээ. Учир нь мутраараа хариулахын тулд Та зовлон зүдүүр, уур унтууцлыг ажигласан билээ. Ядуу нэгэн Танд даатгадаг. Та өнчин хүмүүсийн туслагч байсаар ирсэн билээ.

¹⁵Буруутан хийгээд ёр мууг үйлдэгчийн гарыг хугалж, Юу ч олохгүй болтлоо Гэм бурууг нь хайн илрүүлээч.

¹⁶ЭЗЭН үүрд мөнхөд Хаан юм Газар нутгаас нь үндэстнүүд устгагдсан билээ.

¹⁷ЭЗЭН, Та даруу хүний хүсэлтийг сонссон билээ. Зүрхийг нь батжуулж, чихээ тавин сонсооч.

¹⁸Ингэснээр дэлхий дээрх хүмүүсээс Дахин давтан сүрдэхгүй болгож Өнчин хийгээд хэлмэгдсэн хүнийг зөвтгөөч.