Read Ariun Bible 2013 – Ариун Библи 2013 Дуулал 102 Bible Online

Дуулал 102 - Ariun Bible 2013 – Ариун Библи 2013 bible

Дуулал 102

¹ЭЗЭНий өмнө гомдол шаналалаа уудлах зовлонт хүний залбирал. Аяа ЭЗЭН, залбирлыг минь сонсооч! Миний хашхираан Танд хүрэг.

²Зовлон шаналлын минь өдөр Нүүрээ надаас бүү нуугаач. Над уруу чихээ хандуулаач. Миний дуудах өдөр Надад даруйхан хариулаач.

³Учир нь өдрүүд минь утаа болон замхарч Яснууд минь ч цуцал мэт төөнөнө.

⁴Зүрх минь дарагдаж Зүлэг ногоо шиг хагдрав. Би талхаа идэхээ ч мартжээ.

⁵Ёолох дуунаас минь болж Яс минь махандаа наалдав.

⁶Цөлийн бэгбаатартай ижилсэж, Зэлүүд нутгийн шар шувуу шиг болжээ би.

⁷Сэрүүн хэвтэж Дээвэр дээрх ганцаардсан шувуу шиг болжээ, би.

⁸Дайснууд минь намайг өдөржингөө доромжилж, Надад хорссон хүмүүс Миний эсрэг харааж байна.

⁹Үнсийг талх шиг идэж, Уух усаа нулимстайгаа би хольсон нь

¹⁰Зэвүүцэл ба хилэнгээс тань болсон юм. Учир нь Та намайг дээш өргөөд, шидсэн.

¹¹Өдрүүд минь уртассан сүүдэр адил, Өвс шиг гандан хатаж байна, би.

¹²Харин ЭЗЭН Та мөнхөд оршино. Нэр тань үеийн үед байх болой.

¹³Та босож, Сионыг өрөвдөнө. Учир нь түүнийг нигүүлсэх цаг Тогтоосон цаг ирлээ.

¹⁴Зарц нар тань түүний чулуунуудад баярлаж, Тоос шороог нь ч нигүүлсдэг.

¹⁵Ингээд үндэстнүүд ЭЗЭНий нэрээс, Дэлхийн бүх хаад алдраас тань эмээнэ.

¹⁶Учир нь ЭЗЭН Сионыг босгон байгуулж, Цог жавхлангийнхаа дунд үзэгдэнэ.

¹⁷Үгээгүйчүүдийн залбирлыг анхаарч, Залбирлыг нь Тэрээр жигшихгүй.

¹⁸Хожим бүтээгдэх ард түмэн ЭЗЭНийг магтахын тулд Энэ нь ирэх үеийнхэнд бичигдэнэ.

¹⁹Учир нь Тэрээр ариун өндөрлөгөөсөө өнгийн Тэнгэрээс ЭЗЭН дэлхийг ширтсэн нь

²⁰Хоригдлын ёолохыг сонсож, Үхэх хөвүүдийг чөлөөлж,

²¹Сионд ЭЗЭНий нэрийг, Иерусалимд Түүний магтаалыг тунхаглахын тулд билээ.

²²ЭЗЭНд үйлчлэхээр ард түмэн болоод Хаанчлалууд хамтдаа цуглахад

²³Зам зуур тэрээр чадлыг минь сулруулж, Өдрүүдийг минь богиносгов.

²⁴Би хэлэхдээ “Бурхан минь ээ, Өдрүүдийн минь дундаас намайг бүү аваач. Жилүүд тань үеийн үед билээ.

²⁵Эрт үед дэлхийн суурийг Та тавьсан. Тэнгэрс ч мутрын тань бүтээл юм.

²⁶Тэд мөхөх боловч Та мөнх оршино. Тэдгээр нь бүгд өмсгөл адил элэгдэнэ. Тэднийг Та хувцас шиг сольж, Тэд солигдоно.

²⁷Харин Та хэвээрээ, Таны он жилүүдэд эцэс үгүй.

²⁸Зарц нарын тань хөвгүүд амьдарсаар, Үр удам нь Таны өмнө бат зогсоно” гэлээ.