Read Ariun Bible 2013 – Ариун Библи 2013 Дуулал 105 Bible Online

Дуулал 105 - Ariun Bible 2013 – Ариун Библи 2013 bible

Дуулал 105

¹Аяа, ЭЗЭНд талархлыг өргөн Алдар нэрийг нь дуудан Ард түмний дунд үйлсийг нь мэдүүлэгтүн.

²Түүнд дуулж, Түүнд магтуу дууг дуулагтун. Түүний бүх гайхамшгуудыг яригтун.

³Түүний ариун нэрд алдар байг. ЭЗЭНийг эрэлхийлэгчийн зүрх баясах болтугай.

⁴ЭЗЭНийг хийгээд Түүний хүч чадлыг эрэлхийлэгтүн. Түүний нүүр царайг үргэлж хайгтун.

⁵ЭЗЭНий үйлдсэн гайхамшигт үйлсийг, Түүний тэмдгүүд болон Түүний амнаас гарах шүүлтүүдийг санагтун.

⁶Түүний зарц Абрахамын үр удам, Түүний сонгосон хүмүүс, Иаковын хөвгүүд ээ!

⁷Тэр бидний Бурхан ЭЗЭН. Түүний шүүлтүүд бүх дэлхийд байна.

⁸Мянга мянган үеийнхэнд Тушаасан үг, гэрээгээ Тэрээр мөнхөд санадаг.

⁹Абрахамтай тогтоосон гэрээ, Исаакт өгсөн амлалтаа

¹⁰Иаковт зарлиг, Израильд мөнхийн гэрээ болгож баталсан юм.

¹¹Ингэхдээ “Би та нарт Канаан нутгийг Өв залгамжлалын чинь хувь болгон өгнө” гэж айлдсан билээ.

¹²Тэгэхэд тэд тоогоор цөөн, дорой бөгөөд Тэнд харь хүмүүс байсан.

¹³Тэд нэг үндэстнээс нөгөө үндэстэн уруу, Нэг хаанчлалаас нөгөө ард түмэн уруу тэнүүчилсэн.

¹⁴Тэднийг дарлахыг Тэрээр хэнд ч үл зөвшөөрч, Тэдний төлөө хаадыг зэмлэсэн.

¹⁵“Миний тослогдсон хүмүүст бүү хүр, Эш үзүүлэгчдэд минь хор хөнөөл бүү учруул” гэсэн.

¹⁶Түүнчлэн тэр нутагт өлсгөлөнг дуудан ирүүлж, Талх тарианы иш бүрийг Тэр хугалсан.

¹⁷Үүнээс өмнө Тэрээр нэг хүнийг буюу Боол болон худалдагдсан Иосефыг илгээсэн.

¹⁸Хөлийг нь тэд дөнгөнд оруулж, Өөрийг нь төмрөөр гинжилсэн.

¹⁹Түүний үгс биелэгдэх хүртэл тийм байсан. ЭЗЭНий үг түүнийг шалгасан.

²⁰Хаан илгээж, түүнийг суллаж, Үндэстнүүдийн захирагчдыг явуулж түүнийг сул тавьсан.

²¹Тэр түүнийг гэрийн эзнээ, Бүх эзэмшлийн захирагчаа болгосон нь

²²Сэтгэлд нийцсэнээрээ ноёдыг хянахын тулд, Ахмадуудаа ухааруулахын тулд болой.

²³Израиль ч бас Египетэд ирж, Иаков, Хамын нутагт түр суусан.

²⁴Ард түмнээ өнөр өтгөн болгож, Тэднийг өстнүүдээс нь илүү хүчирхэгжүүлсэн, Тэр.

²⁵Өөрийнх нь хүмүүсийг үзэн ядахаар Зарц нарыг нь залилахаар тэр тэдний зүрхийг эргүүлсэн.

²⁶Тэрээр зарц Мосегээ, Өөрийн сонгосон Аароныг илгээсэн.

²⁷Хүмүүсийн дунд Түүний тэмдэг болох үйлсийг, Хамын нутагт гайхамшгуудыг үйлдсэн

²⁸Тэрээр харанхуйг илгээж, харанхуй болгосон бөгөөд Үгсэд нь тэд тэрсэлсэнгүй.

²⁹Усыг нь цус болгон хувиргаж, Загасыг нь Тэр үхүүлсэн.

³⁰Тэдний нутаг Хааных нь ордон ч хүртэл мэлхийгээр дүүрсэн.

³¹Түүнийг айлдсанд бөөн ялаа, Бүх нутаг дэвсгэрт нь дэлэнч орж ирсэн.

³²Тэр тэдэнд борооны оронд мөндрийг, Тэдний нутагт галтай дөлийг өгсөн.

³³Бас усан үзмийн модод, инжир моддыг нь Тэрээр хуга цохиж, Нутаг хязгаарынх нь моддыг цавчсан.

³⁴Түүнийг айлдсанд царцаа, Тоо томшгүй олон дэвхрэг ирж,

³⁵Нутгийнх нь бүх өвсийг, Газрынх нь үр жимсийг идэж цөлмөсөн.

³⁶Нутгийнх нь бүх ууган хөвгүүдийг, Тэдний хүчний анхны үр жимсийг Тэрээр цохин унагаасан.

³⁷Тэгээд тэднийг мөнгө ба алттай гаргасан бөгөөд Овгуудынх нь дотор дорой хэн ч байгаагүй.

³⁸Тэднийг гарч явахад Египет баярласан. Учир нь тэднээс айх айдаст тэд автсан.

³⁹Тэрээр хөшиг болгон үүлсийг, Мөн шөнөөр гэрэлтүүлэхээр галыг дэлгэсэн.

⁴⁰Гуйсанд Тэрээр бөднө шувууг авчирч, Тэнгэрийн талхаар тэднийг хангасан.

⁴¹Тэрээр хадыг нээсэнд ус олгойдон гарч, Хуурай газруудаар гол мэт урссан.

⁴²Учир нь Тэрээр ариун үгээ, Өөрийн зарц Абрахамыг дурсан санасан.

⁴³Ард түмнээ баяр хөөртэй нь, Сонгосон хүмүүсээ баярын уухайтай нь Тэр гарган авчирсан.

⁴⁴Бас тэдэнд үндэстнүүдийн нутгийг өгч, Улсуудын хөдөлмөрийг тэдэнд эзэмшүүлсэн нь

⁴⁵Тэднээр зарлигуудаа сахиулж, Хуулиудаа мөрдүүлэхийн тулд байв. ЭЗЭНийг магтагтун.