Read Ariun Bible 2013 – Ариун Библи 2013 Дуулал 107 Bible Online

Дуулал 107 - Ariun Bible 2013 – Ариун Библи 2013 bible

Дуулал 107

¹ЭЗЭНд талархагтун! Тэрээр сайн сайхан бөгөөд Түүний хайр энэрэл мөнхийнх.

²Өстний гараас Түүний зольсон, ЭЗЭНээр золигдсон хүмүүс ийн өгүүлэг.

³Өрнө хийгээд дорно, Өмнө хийгээд умар, Нутаг бүрээс тэднийг цуглуулсан билээ.

⁴Тэд цөлд зэлүүд замаар тэнэж, Оршин суугчидтай хотыг эс олов.

⁵Өлсөж, цангаад Тэдний сэтгэл нь сульджээ.

⁶Шаналал дундаа тэд ЭЗЭНд хашхирсанд Шахаанаас нь Тэр сулласан.

⁷Оршин суугчидтай хот уруу нь явуулахаар Тэр бас тэднийг шулуун замаар хөтөлсөн.

⁸Энэрэл хайрынх нь төлөө, Хүний хөвгүүдэд үйлдсэн гайхамшгуудынх нь төлөө ЭЗЭНд талархагтун!

⁹Учир нь цангасан хүнийг Тэрээр хангалуун болгож, Өлссөн хүнийг сайн зүйлсээр дүүргэдэг билээ.

¹⁰Зарим нь харанхуйд болон Үхлийн харанхуйд суусан агаад Зовлон зүдүүр, төмөр гинжний хоригдлууд юм.

¹¹Учир нь тэд Бурханы үгэнд тэрслэн Хамгийн Дээд Нэгэний зөвлөгөөг зэвүүцсэн билээ.

¹²Тэдний зүрх хүчир хөдөлмөрт номхров. Тэд бүдрэн унасан бөгөөд хэн ч эс туслав.

¹³Шаналал дундаа ЭЗЭНд тэд хашхирсанд Шахаанаас нь Тэр аварчээ.

¹⁴Тэднийг харанхуйгаас ба Үхлийн харанхуйгаас Тэр гаргаж, Хүлээсийг нь таслав.

¹⁵Энэрэл хайрынх нь төлөө, Хүний хөвгүүдэд үйлдсэн гайхамшгуудынх нь төлөө ЭЗЭНд талархагтун!

¹⁶Учир нь Тэрээр хүрэл дааман хаалгыг хэмхэлж, Хөндөл төмрийг нь хугалсан.

¹⁷Тэрслүү зам, хилэнцээсээ болж Тэнэгүүд зовжээ.

¹⁸Тэдний сэтгэл бүхий л хоолонд дургүйцэж Үхлийн үүд хаалганд ойртжээ.

¹⁹Шаналал дундаа тэд ЭЗЭНд хашхирсанд Шахаанаас нь Тэр аварчээ.

²⁰Үгээ илгээн тэднийг эдгээж, Мөхлөөс нь аврав,

²¹Энэрэл хайрынх нь төлөө, Хүний хөвгүүдэд үйлдсэн гайхамшгуудынх нь төлөө ЭЗЭНд талархагтун!

²²Тэд бас талархлын тахилуудыг өргөг! Түүний үйлсийг уухайн дуугаар тунхаглаг!

²³Усан онгоцоор далайд гарагчид, Их усан дээр наймаа эрхлэгчид

²⁴ЭЗЭНий үйлсийг хийгээд Гүнд буй гайхамшгуудыг нь харж байна.

²⁵Учир нь Тэр тушаан салхи шуургыг босгоод, Түүгээр давалгааг хуйлруулав.

²⁶Тэд тэнгэр өөд гарч, Оёоргүй гүнд эргэн буужээ. Гамшгийн улмаас сэтгэл нь мохжээ.

²⁷Тэд согтуу хүн шиг дороо эргэлдэн гуйвж, Оюун ухаан нь самуурав.

²⁸Шаналал дундаа тэд ЭЗЭНд хашхирсанд Шахаанаас нь Тэр гаргаж авав.

²⁹Далайн давалгаануудыг нам гүм болгохоор Тэрээр шуургыг аядуулав.

³⁰Тэдгээр нь нам гүм болсонд Тэд баярласан бөгөөд Тэр тэднийг хүссэн боомт уруу нь газарчилжээ.

³¹Энэрэл хайрынх нь төлөө, Хүний хөвгүүдэд үйлдсэн гайхамшгуудынх нь төлөө ЭЗЭНд талархагтун!

³²Тэд бас ард түмнүүдийн цуглаанд Түүнийг өргөмжилж, Ахмадуудын чуулаанд Түүнийг магтаг.

³³Тэрээр гол мөрнүүдийг цөл, Усан булгуудыг улайдмал шороо,

³⁴Шимтэй газрыг хужиртай болгодог нь Тэнд оршин суугчдын ёрын муугаас болдог юм.

³⁵Цөлийг усны цөөрөм, Тэрээр хагсмал газрыг усны булгууд болгодог.

³⁶Тэнд өлссөн хүмүүсийг суулгадаг бөгөөд Тэднээр оршин суугчидтай хот босгуулан

³⁷Талбайд тариа тариулж, Үр жимс арвинтай ургацыг хураалгахын тулд Усан үзмийн талбай байгуулуулдаг.

³⁸Машид олшруулахаар тэднийг бас ерөөдөг бөгөөд Мал сүргийг нь ч Тэрээр эс хорогдуулдаг.

³⁹Дарамт, арчаагүйдэл, уй гашуугаар Тэд цөөрч, доройтсон үед нь

⁴⁰Тэрээр ноёдод зэвүүцэлээ юүлж, Замгүй, зэлүүд газраар тэднийг тэнүүчлүүлдэг.

⁴¹Харин Тэрээр гачигдагсдыг Зовлон зүдүүрээс өндөрт өргөж, Тэдний гэрийнхнийг хонин сүрэг мэт өсгөдөг.

⁴²Чигч шударга хүн үүнийг хараад баяртай байна. Хамаг гэмт байдал амаа хамхина.

⁴³Мэргэн хэн боловч Эдгээр зүйлийг анхаарч, ЭЗЭНий хайр энэрлийг ойлгогтун!