Read Ariun Bible 2013 – Ариун Библи 2013 Дуулал 109 Bible Online

Дуулал 109 - Ariun Bible 2013 – Ариун Библи 2013 bible

Дуулал 109

¹Удирдаачид: Давидын дуулал. Миний магтаалын Бурхан, Бүү нам гүм байгаач.

²Учир нь буруутууд ба мэхлэгчид Миний эсрэг амаа нээж, Миний эсрэг тэд Худалч хэлээр ярьж байна.

³Бас үзэн ядалтын үгсээр намайг тойруулж, Миний эсрэг тэд шалтгаангүйгээр довтлов.

⁴Хайрын минь хариуд тэд намайг буруутгаж байна. Харин би залбирна.[56]

⁵Надад сайныг муугаар, Хайрыг минь үзэн ядалтаар тэд хариуллаа.

⁶Буруутыг түүний дээр томилж, Сөргөлдөгчийг баруун гар талд нь зогсоогтун.

⁷Шүүгдэх үед нь буруутай гээд түүнийг урагш гаргаж, Залбирлыг нь ч хүртэл нүгэл болгооч.

⁸Хоног өдрүүд нь цөөхөн байг, Харгалзах үүргийг нь өөр нэгэн аваг.

⁹Хүүхдүүдийг нь өнчин, Эхнэрийг нь бэлэвсэн болгооч!

¹⁰Хүүхдүүдийг нь хэсүүлэн тэнүүчлүүлж, гуйлгачлуулаач! Сүйрсэн гэрүүдээс нь тэднийг холдуулан гаргаач!

¹¹Өөрт нь байгаа бүхнийг зээлдүүлэгч хүнд олзлуулж, Хүч хөдөлмөрийг нь хөндлөнгийнхөнд тонуулаач!

¹²Түүнд өршөөл хүртээх хэнийг ч, Өнчин хүүхдүүдийг нь ч өрөвдөх хэнийг ч үгүй болгооч!

¹³Хойчийг нь таслаач. Ирэх үед нэрсийг нь арчуулаач!

¹⁴Эцэг өвгөдийнх нь хилэнцийг ЭЗЭНий өмнө сануулж, Эхийнх нь нүгэл арчигдахыг Бүү зөвшөөрөөч!

¹⁵Тэдний тухай дурсамжийг дэлхийгээс арилгуулахаар ЭЗЭНий өмнө тэднийг байнга байлгаач!

¹⁶Учир нь тэрээр хайр энэрлийг үйлдэхээ эс санав. Харин зүдрэгчийг болон гачигдагчийг, Мөн зүрхэндээ шаналсан хүнийг үхтэл хавчив.

¹⁷Бас хараах дуртай байсан бөгөөд тэр нь буцаж бууг. Ерөөлд баярлаагүй бөгөөд Тэр нь ч түүнээс хол байг.

¹⁸Хараалыг тэр өөртөө Хувцас шиг өмсөж байсан. Дотор нь тэр ус шиг, Ясанд нь тэр тос шиг шингэг.

¹⁹Тэр нь өмсдөг хувцас нь мэт, Үргэлж бүсэлдэг бүс нь мэт болох болтугай.

²⁰Энэ нь намайг буруутгагчдад хийгээд Миний сэтгэлийн эсрэг муучлан яригчдад ЭЗЭНээс өгөх шан болог.

²¹Харин БУРХАН Эзэн, Нэрийнхээ төлөө надад Та үйлдээч, Хайр энэрэл тань сайн учраас намайг авраач.

²²Учир нь би зүдрэгч ба гачигдагч бөгөөд Зүрх минь миний дотор шархадсан байна.

²³Би уртсаж буй сүүдэр мэт алга болж, Царцаа мэт хийсэн туугдаж байна.

²⁴Мацгаас болж өвдөг минь сулран Мах бие минь ч өөх тосоор дутагдлаа.

²⁵Би бас тэдэнд шившиг болсонд Тэд намайг хараад, толгойгоо сэгсэрч байна.

²⁶Бурхан ЭЗЭН минь, надад туслаач. Хайр энэрлийнхээ ёсоор авраач, намайг.

²⁷Энэ Таны мутар гэдгийг Тэдэнд мэдүүлээч. ЭЗЭН Та үүнийг үйлдсэн билээ.

²⁸Тэд харааг, харин Та ерөөгөөч! Босохдоо тэднийг ичгүүрт оруулж, Боолыгоо харин баярлуулаач!

²⁹Өөрийг минь буруутгагчдыг ичгүүрээр хувцаслаж, Өөрсдийнх нь шившгээр тэднийг нөмрөг мэт ороогооч!

³⁰ЭЗЭНд би үлэмж талархлыг өргөнө. Олны дунд би Түүнийг магтана.

³¹Учир нь тэдний сэтгэлийг Буруушаагчаас аврахын тулд Тэрээр гачигдагчийн баруун гар талд зогсдог.