Read Ariun Bible 2013 – Ариун Библи 2013 Дуулал 118 Bible Online

Дуулал 118 - Ariun Bible 2013 – Ариун Библи 2013 bible

Дуулал 118

¹ЭЗЭНд талархал өргө. Тэрээр сайн сайхан бөгөөд, Түүний хайр энэрэл мөнхийнх.

²Израилиар “Түүний хайр энэрэл мөнхийнх” гэж хэлүүл.

³Аароны гэрээр, “Түүний хайр энэрэл мөнхийнх” гэж хэлүүл.

⁴ЭЗЭНээс эмээгчдээр, “Түүний хайр энэрэл мөнхийнх” гэж хэлүүл.

⁵Зовол хавчил дундаас ЭЗЭНд би хашхирав. Зоо тэнүүн газраар ЭЗЭН надад хариулав.

⁶ЭЗЭН миний талд, би айхгүй. Хүн надад юу хийж чадах вэ?

⁷ЭЗЭН надад туслагчдын дунд байна. Тиймээс намайг үзэн ядагсад уруу би харах болно.

⁸Хүнд итгэхээс ЭЗЭНий дотор хоргодох нь дээр.

⁹Ноёдод итгэхээс ЭЗЭНий дотор хоргодох нь дээр.

¹⁰Бүх үндэстэн намайг бүсэлжээ. ЭЗЭНий нэрээр би тэднийг тас цохино.

¹¹Тэд намайг хүрээлжээ, Тийм ээ, намайг хүрээлжээ. ЭЗЭНий нэрээр би тэднийг тас цохино.

¹²Тэд намайг зөгийнүүд мэт хүрээлэв. Өргөст бутны дундах гал мэт тэд унтарчээ. ЭЗЭНий нэрээр би тэднийг тас цохино.

¹³Та нар намайг унагахаар хүчээр түлхсэн боловч ЭЗЭН надад тусалжээ.

¹⁴ЭЗЭН миний хүч ба миний дуу, Тэр миний аврал болсон.

¹⁵Зөвтүүдийн майханд уухайн чимээ хийгээд аврал байна. ЭЗЭНий баруун мутар эрэлхэгээр үйлддэг.

¹⁶ЭЗЭНий баруун мутар өргөгдсөн байна. ЭЗЭНий баруун мутар эрэлхэгээр үйлддэг.

¹⁷Би үхэхгүй, харин амьдрах бөгөөд ЭЗЭНий үйлсийг тунхаглах болно.

¹⁸ЭЗЭН намайг гэсгээн гэсгээв. Гэлээ ч үхэлд хүргээгүй.

¹⁹Надад зөвтийн үүд хаалгыг нээгээч. Би түүгээр орж, би ЭЗЭНд талархал өргөнө.

²⁰ЭЗЭНий үүд хаалга энэ юм. Зөвт нэгэн түүгээр орно.

²¹Та надад хариулж, Аврал минь болсон учраас Би Танд талархана.

²²Барилгачдын голсон чулуу Булангийн тулгуур чулуу болов.

²³Энэ нь ЭЗЭНээс ирсэн бөгөөд Бидний нүдэнд гайхалтай.

²⁴Энэ нь ЭЗЭНий бүтээсэн өдөр Үүнд хөгжилдөн баярлацгаая.

²⁵Аяа ЭЗЭН, гуйж байна, авраач. Аяа ЭЗЭН, гуйж байна, амжилтыг соёрхооч!

²⁶ЭЗЭНий нэрээр Ирэгч нь ерөөлтэй еэ! Бид ЭЗЭНий өргөөнөөс чамайг ерөөлөө.

²⁷ЭЗЭН бол Бурхан бөгөөд бидэнд гэрлийг өгсөн. Тахилын ширээний эвэрт тахилыг уяагаар холбогтун.

²⁸Та миний Бурхан, би Танд талархал өргөе. Бурхан минь, би Таныг өргөмжилье.

²⁹ЭЗЭНд талархал өргө Тэрээр сайн сайхан бөгөөд Түүний хайр энэрэл мөнхийнх.