Read Ariun Bible 2013 – Ариун Библи 2013 Дуулал 132 Bible Online

Дуулал 132 - Ariun Bible 2013 – Ариун Библи 2013 bible

Дуулал 132

¹Өгсөх дуу. Аяа ЭЗЭН, Давидын төлөө Бүх зовлон шаналлыг нь санаач.

²ЭЗЭНд тэрээр хэрхэн тангараглан Иаковын Төгс хүчит Нэгэнд андгайлсан билээ дээ!

³“Үнэхээр би гэртээ ч орохгүй, Орон дээрээ ч хэвтэхгүй.

⁴Би унтахаар нүдээ ч анихгүй, Зовхио ч буулгахгүй.

⁵Энэ нь ЭЗЭНд зориулсан газрыг, Иаковын Төгс хүчит Нэгэнд орших газрыг би олох хүртэл болой” гэж байсныг нь санаач.

⁶Харагтун, бид үүний талаар Ефратад сонсож, Бид үүнийг Иаарын талбайгаас олсон.

⁷Түүний орших газарт очицгооё Түүний хөлийн гишгүүрийн хажууд мөргөцгөөе.

⁸Аяа ЭЗЭН, хүч чадлынхаа авдартай хамт Амралтдаа орохоор Та босооч!

⁹Тахилч нар чинь зөвт байдлаар хувцаслаг. Таны бишрэлтнүүд баяр хөөр болон хашхираг.

¹⁰Зарц Давидынхаа төлөө Тослогдсон нэгнээсээ нүүр бүү буруулаач!

¹¹ЭЗЭН эргэж буцахгүй үнэнийг Давидад тангарагласан нь “Биеийн чинь үр жимснээс Би чиний сэнтийд зална.

¹²Хөвгүүд чинь Миний гэрээг, Миний тэдэнд сургадаг гэрчлэлийг минь сахивал Тэдний хөвгүүд ч бас сэнтийд чинь мөнхөд залрах болно” хэмээсэн нь билээ.

¹³Учир нь ЭЗЭН Сионыг сонгож, Орших газраа хэмээн Түүнийг хүсэв.

¹⁴“Мөнхөд амрах газар минь энэ болой. Үүнийг хүссэн тул Би энд амьдран сууна.

¹⁵Би хоол хүнсийг нь элбэгээр ерөөж, Гачигдагсдыг нь талхаар хангана.

¹⁶Бас тахилч нарыг нь Би авралаар хувцаслах бөгөөд Бишрэлтнүүд нь баярлан чангаар дуулна.

¹⁷Тэнд Би Давидад эврийг ургуулна. Би тослогдогчдоо дэнлүү бэлтгэнэ.

¹⁸Түүний дайснуудыг Би ичгүүрээр хувцаслана. Харин өөрийнх нь дээр титэм нь гялбах болно.”