Read Ariun Bible 2013 – Ариун Библи 2013 Дуулал 135 Bible Online

Дуулал 135 - Ariun Bible 2013 – Ариун Библи 2013 bible

Дуулал 135

¹ЭЗЭНийг магтагтун! ЭЗЭНий нэрийг магтагтун ЭЗЭНий зарц нар аа, магтагтун,

²ЭЗЭНий өргөөнд, Бурханы маань өргөөний хашаанд зогсогч та нар.

³ЭЗЭН сайн учир ЭЗЭНийг магтагтун. Тааламжтай сайхан тул Түүний нэрд магтан дуулагтун.

⁴Учир нь ЭЗЭН Өөртөө Иаковыг, Өмчөө болгон Израилийг сонгосон.

⁵ЭЗЭН аугаа бөгөөд Эзэн маань хамаг бурхдаас Илүү дээгүүр гэдгийг би мэднэ.

⁶ЭЗЭН таалдаг аливаа зүйлээ Тэнгэрт, газарт, далайнуудад хийгээд бүх оёоргүй гүнд үйлддэг.

⁷Дэлхийн зах хязгааруудаас Уур мананг дээш хөөргөж, Бороонд зориулан аянга цахилгааныг бүтээж, Агуулахуудаасаа салхийг Тэрээр гаргадаг.

⁸Египетийн уугануудыг, Хүн, амьтныхыг аль алиныг нь цохисон.

⁹Египет ээ, чиний дунд тэмдэг ба гайхамшгуудыг Фараон болон бүх түшмэдийнх нь дээр илгээсэн.

¹⁰Олон үндэстнийг бут цохиж, Хүчтэй хаадыг алсан.

¹¹Аморичуудын хаан Сихон, Башаны хаан Ог болон Канааны бүх хаанчлал болой.

¹²Газар нутгийг нь өв болгон Өөрийн ард түмэн Израильд өв болгон өгсөн.

¹³Аяа ЭЗЭН, нэр тань мөнхөд Аяа ЭЗЭН, Таны тухай дурсгал Бүх үед байна.

¹⁴Учир нь ЭЗЭН ард түмнээ өмгөөлж, Зарц нарынхаа төлөө харамсана.

¹⁵Улс үндэстнүүдийн шүтээн нь алт, мөнгө, хүний гарын бүтээл юм.

¹⁶Тэд амтай боловч ярьдаггүй. Нүдтэй боловч хардаггүй.

¹⁷Чихтэй боловч сонсдоггүй, Аманд нь амьсгал алга.

¹⁸Тэднийг бүтээгчид Тэдэнд итгэгчид бүгд тэдэнтэйгээ адилхан.

¹⁹Израилийн гэр ээ, ЭЗЭНийг магтагтун. Аароны гэр ээ, ЭЗЭНийг магтагтун.

²⁰Левийн гэр ээ, ЭЗЭНийг магтагтун. ЭЗЭНээс эмээгчид ээ, ЭЗЭНийг магтагтун.

²¹Иерусалимд оршин суудаг ЭЗЭН Сионоос магтагдах болтугай. ЭЗЭНийг магтагтун!