Read Ariun Bible 2013 – Ариун Библи 2013 Дуулал 139 Bible Online

Дуулал 139 - Ariun Bible 2013 – Ариун Библи 2013 bible

Дуулал 139

¹Удирдаачид: Давидын дуулал. Аяа ЭЗЭН, Та намайг судлан намайг мэдлээ.

²Миний сууж, босохыг Та мэддэг бөгөөд Хаа холоос санаа бодлуудыг минь ойлгодог.

³Та миний зам мөр хийгээд Хэвтэхийг минь ч нарийвчлан үзэж, Замнал бүрийг минь сайн мэддэг.

⁴Хэлэн дээр минь ганц үг ч байхаас өмнө, Харагтун, ЭЗЭН Та бүгдийг мэддэг.

⁵Та хойноос ба урдаас минь нөмөрлөж, Миний дээр мутраа тавьсан.

⁶Мэдлэг нь надад дэндүү гайхамшигтай, Өндөр бөгөөд би түүнд хүршгүй билээ.

⁷Таны Сүнснээс би хаашаа одох вэ? Эсвэл Таны оршихуйгаас би хаашаа зугтах вэ?

⁸Хэрэв би тэнгэр өөд очвол, Та тэнд, Хэрэв би Үхэгсдийн оронд ор дэрээ засвал, Харагтун, Та тэнд.

⁹Үүрийн гэгээгээр жигүүрлэн Далайн хамгийн алсын хэсэгт суувал

¹⁰Тэнд ч мутар тань намайг удирдаж, Баруун мутар тань надаас зуурна.

¹¹Хэрэв би “Харанхуй үнэхээр намайг нөмөрнө. Намайг хүрээлэгч гэрэл нь шөнө” гэвэл

¹²Харанхуй ч Танд харанхуй биш бөгөөд Шөнө ч өдөр мэт гэрэлтэнэ. Гэрэл харанхуй адил юм.

¹³Учир нь Та гэдэс дотрыг минь хэлбэржүүлж Эхийн минь хэвлийд намайг бүрдүүлжээ.

¹⁴Би аймшигтай болоод гайхамшигтай бүтээгдсэн тул Танд талархал өргөнө. Таны үйлс гайхалтай бөгөөд Сэтгэл минь ч сайн мэднэ.

¹⁵Намайг нууц дотор бүрэлдэж, Газрын гүнд урнаар шаглагдаж байхад ч Яс минь Танаас нууцлагдаагүй.

¹⁶Төрхөө олоогүй хөврөл байхад минь Таны нүд харж л байсан. Надад тогтоогдсон өдрүүд болоогүй байхад Бүгд номд тань бичигдсэн байжээ.

¹⁷Аяа Бурхан, надад хандсан бодлууд тань Хичнээн нандин бэ![62] Нийлбэр нь хичнээн их вэ!

¹⁸Би тэдгээрийг тоолбол Тэд элсний ширхгээс ч даван гарна. Сэрэхдээ ч би Тантай хамт билээ.

¹⁹Аяа Бурхан, Та буруутыг хөнөөх болтугай. Тиймээс цуст хүмүүс ээ, надаас холдогтун.

²⁰Учир нь тэд Таны эсрэг баширыг ярьж Таны эсрэг нүглийн учир өөрсдийгөө өргөмжилдөг.

²¹Аяа ЭЗЭН, Таныг үзэн ядагчдыг би үзэн яддаггүй гэж үү? Таны эсрэг босогчдыг би жигшдэггүй гэж үү?

²²Би туйлын үзэн ядалтаар тэднийг үзэн яддаг. Тэд дайснууд минь болов.

²³Аяа Бурхан, намайг судлан зүрхийг минь мэдээч. Намайг шалган, бодлуудыг минь мэдээч.

²⁴Миний дотор хөнөөлт зам буй эсэхийг харж, Мөнхийн[63] замаар намайг удирдаач!