Read Ariun Bible 2013 – Ариун Библи 2013 Дуулал 147 Bible Online

Дуулал 147 - Ariun Bible 2013 – Ариун Библи 2013 bible

Дуулал 147

¹ЭЗЭНийг магтагтун! Бурханыгаа магтан дуулах нь Юутай сайн бэ! Учир нь Тэрээр тааламжит бөгөөд магтаалд зохистой.

²ЭЗЭН Иерусалимыг босгон барьж, Тэрээр Израилийн дүрвэгсдийг цуглуулж байна.

³Эмтэрсэн зүрхтэй хүмүүсийг анагааж, Шархыг нь боож байна.

⁴Тэрээр оддыг тоогоор нь дугаарлаж, Бүгдийг нь нэрлэн дууддаг.

⁵Эзэн маань аугаа, ихэд хүчтэй бөгөөд Оюун ухаан нь хязгааргүй.

⁶ЭЗЭН, дорой нэгнийг өргөн түшиж, Муу буруу хүнийг газарт унагадаг.

⁷ЭЗЭНд талархалтайгаар дуулагтун. Бидний Бурханд ятгаар магтан дуулагтун.

⁸Тэрээр тэнгэрийг үүлсээр бүрхэн Газар дэлхийд бороог бэлтгэж, Уулсын дээр зүлэг ногоог ургуулдаг.

⁹Араатан амьтанд хийгээд Гуагалан буй залуу хэрээнүүдэд Тэрээр хоол хүнсийг нь өгдөг.

¹⁰Тэрээр морины чадалд бахаддаггүй, Хүний хөлд ч баярладаггүй.

¹¹ЭЗЭН Өөрөөс нь эмээгчийг, Энэрэл хайранд нь найдагчдыг таалдаг.

¹²Иерусалим аа, ЭЗЭНийг магтагтун! Сион оо, Бурханаа магтагтун!

¹³Тэрээр гулдан хаалгануудын чинь хөндлүүдийг бэхжүүлэн Та нарын дундах хөвгүүдийг чинь ерөөж байна.

¹⁴Тэр танай хил хязгаарт амар тайвныг тогтоон Хамгийн сайн буудайгаар та нарыг хангаж байна.

¹⁵Тэр тушаалаа дэлхийд илгээж, Үг нь маш хурдан тархаж байна.

¹⁶Цасыг Тэр ноос шиг буулгадаг. Цан хярууг Тэр үнс шиг тараадаг.

¹⁷Мөндрөө Тэр үйрмэг шиг цацдаг. Хэн жаврыг нь сөрөн зогсож чадах вэ?

¹⁸Тэр үгээ илгээж, тэдгээрийг хайлуулдаг. Тэр салхиа үлээлгэж, их усыг урсгадаг.

¹⁹Тэр, үгээ Иаковт, Зарлиг, шийдвэрүүдээ Израильд тунхагладаг.

²⁰Тэр, аль ч үндэстэнд ийнхүү эс хандана. Тэд тогтоолуудыг нь ч үл мэднэ. ЭЗЭНийг магтагтун!