Read Ariun Bible 2013 – Ариун Библи 2013 Дуулал 18 Bible Online

Дуулал 18 - Ariun Bible 2013 – Ариун Библи 2013 bible

Дуулал 18

¹Удирдаачид. ЭЗЭН өөрийг нь хамаг дайснуудаас нь мөн Саулын гараас аварсан тэр өдөр энэ дууны үгээр ЭЗЭНд хандсан, ЭЗЭНий зарц Давидын дуулал. Хүч минь болдог ЭЗЭН, Тандаа би хайртай.

²ЭЗЭН бол миний хад, Миний цайз, Миний аврагч, Миний Бурхан, Миний хоргодох хад, Миний бамбай, Миний авралын эвэр, Миний бэхлэлт юм.

³Магтуулах учиртай ЭЗЭНийг би дуудаад, Дайснуудаасаа би аврагдсан.

⁴Үхлийн хүлээс намайг хэрж, Мөхлийн урсгал намайг дайрч

⁵Үхэгсдийн орны уяа намайг хэрж Үхлийн урхинууд миний өмнө тулгарахад

⁶Зовлон шаналан дотроо ЭЗЭНийг би дуудаж, Бурхандаа би хашхирсан. Тэрээр сүмээсээ дуу хоолойг минь сонсож, Түүний сонорт хашхираан минь хүрсэн билээ.

⁷Түүнийг хилэгнэхэд газар хөдлөв. Уулсын суурь ч доргив.

⁸Хамраас нь утаа суунаглаж, Амнаас нь цөлмөгч гал гарч, Цогшсон нүүрс асан дүрэлзэж байв.

⁹Тэнгэрсийг бөхийлгөж Түнэр харанхуйг хөлдөө дэвссээр Тэр бууж ирэв.

¹⁰Херуб хөлөглөн нисэв. Салхин жигүүр дээгүүр элин халив.

¹¹Усан хар үүлсийг Өөрийгөө тойруулсан харанхуйн бүрхүүл болгов.

¹²Түүний өмнөх гялбаанаас, Мөндрийн үүлс цахилж, галтай нүүрс асан шатав.

¹³ЭЗЭН бас тэнгэрт хүнгэнэж, Хамгийн Дээд Нэгэн нь дуугаа хүнгэнүүлэв.[9] Мөндөр болон галтай нүүрс буусан юм.

¹⁴Тэрээр сум тавьж тэднийг бутрааж, Аянга цахилуулж тэднийг бут ниргэжээ.

¹⁵Тэгээд ЭЗЭН, Таны зэмлэлд хийгээд Хамрын тань амьсгалын хүчит цохилтоор Далайн ёроол үзэгдэж, Ертөнцийн сууриуд ил гарчээ.

¹⁶Тэр дээрээс сунган, намайг авч, Их уснаас татан гаргав

¹⁷Тэр намайг хүчит дайснаас минь, Намайг үзэн ядагчдаас аврав. Учир нь тэд миний хувьд үлэмж хүчтэй байв.

¹⁸Тэд миний зовлонт өдөр надтай тулгарсан. Гэвч ЭЗЭН миний түшиг байлаа.

¹⁹Тэр намайг таалсан учир Намайг уудам газарт авчран аварсан билээ.

²⁰Зөв шударга явдлын минь дагуу Намайг ЭЗЭН шагнаж Гар минь цэвэр ариун байсны төлөө намайг урамшуулав.

²¹Учир нь би ЭЗЭНий замыг баримталсан. Бурууг үйлдэж Бурханаасаа салаагүй.

²²Бүх тогтоол нь миний өмнө байсан. Би зарлигуудыг нь өөрөөсөө холдуулаагүй.

²³Би Түүний өмнө гэм зэмгүй байж нүглээс өөрийгөө хол байлгав.

²⁴Түүний мэлмийн өмнө гар минь Зөв шударга бөгөөд цэвэр ариун байсан тул ЭЗЭН надад хариулсан юм.

²⁵Итгэмжтэнд итгэмжээ үзүүлдэг Та Гэм зэмгүйд гэмгүй л ханддаг.

²⁶Цэвэр ариунд Та цэврээ, Цэх шударга биш хүнд Та тэрс байдлаа харуулдаг.

²⁷Дорой ядууг Та авардаг, Ихэмсэг харцыг Та номхтгодог.

²⁸Дэнлүүг минь Та асаадаг билээ. Миний Бурхан ЭЗЭН Миний харанхуйг гэрэлтүүлдэг билээ.

²⁹Танаар би их цэргийг дайрч Бурхандаа түшиглээд би хэрмийг давж чаддаг.

³⁰Бурханы зам төгс төгөлдөр, ЭЗЭНий амлалт шалгагдсан. Түүнд хоргоддог бүхэнд Тэрээр бамбай болдог.

³¹ЭЗЭНээс өөр хэн Бурхан юм бэ? Бидний Бурханаас өөр хэн хад вэ?

³²Хүч чадлаар намайг бүсэлдэг Бурхан Замыг минь төгс болгодог.

³³Тэр хөлийг минь гөрөөснийх мэт болгон, Намайг өндөрлөг газарт аюулгүй суулгадаг.

³⁴Тэр гарыг минь тулалдаанд бэлтгэдэг. Ингэснээр гар шуу минь хүрэл нумыг тахийлгаж чаддаг.

³⁵Та авралынхаа бамбайг надад өгсөн билээ. Таны баруун мутар намайг түшдэг Таны тусламж намайг агуу болгосон билээ.

³⁶Та алхааг минь өргөсгөдөг, Тиймээс хөл минь халтирсангүй.

³⁷Би дайснаа хөөж гүйцээд Тэднийг сөнөх хүртэл нь эргэж буцсангүй.

³⁸Тэднийг би цохив. Тиймээс тэд босож чадахгүй болсон Тэд миний хөл доор унасан билээ.

³⁹Тулалдахад минь Та намайг хүч чадлаар хувцаслаж, Намайг эсэргүүцэн босогчдыг миний доор хөсөр унагав.

⁴⁰Та дайснуудын минь нурууг надад харуулав. Намайг үзэн ядагчдыг би устгав.

⁴¹Тэд тусламж эрэн хашхирсан боловч аврах хэн ч байсангүй, Тэд ЭЗЭНд хашхирсан боловч, Тэр хариу өгсөнгүй.

⁴²Тэгээд би тэднийг салхин дахь тоос шороо мэт бутаргав. Би тэднийг гудамжны шавар шалбааг шиг цацав.

⁴³Та намайг ард олны минь маргаанаас аварч, Намайг үндэстнүүдийн тэргүүн болгов. Миний үл мэдэх хүмүүс ч надад үйлчлэв.

⁴⁴Гаднынхан над дээр хулмалзсаар ирж, Намайг сонсмогцоо тэд үг дуугүй дагадаг.

⁴⁵Гаднынхан зүрх алдсаар Бат цайзуудаасаа чичрэн гарч ирдэг.

⁴⁶ЭЗЭН амьд![10] Ерөөгдөх болтугай, миний хад! Авралын минь Бурхан өргөмжлөгдөх болтугай!

⁴⁷Миний төлөө өшөө авдаг Бурхан, Хүмүүсийг миний дор захируулдаг.

⁴⁸Тэр намайг дайснуудаас минь авардаг Эсэргүүцэгчдийн минь дээгүүр Намайг Та үнэхээр өргөдөг юм Хүч хэрэглэгчдээс Та намайг аварсан билээ.

⁴⁹Тиймээс ЭЗЭН Танд үндэстнүүдийн дундаас талархлыг өргөж, Таны нэрийг би магтан дуулна.

⁵⁰Тэрээр хаандаа агуу ялалтыг өгч, Өөрийнхөө тосолсон нэгэн болох Давид болон түүний үр удамд хайр өршөөлийг үүрд мөнх үзүүлдэг болой.