Read Ariun Bible 2013 – Ариун Библи 2013 Дуулал 25 Bible Online

Дуулал 25 - Ariun Bible 2013 – Ариун Библи 2013 bible

Дуулал 25

¹Давидын дуулал. ЭЗЭН, Танд би сэтгэлээ өргөдөг.

²Бурхан минь ээ, би Танд найддаг. Намайг ичгүүр бүү болгооч Дайснуудыг минь надаас болж Бүү баярлуулаач!

³Таныг хүсэн хүлээгчдээс Хэн нь ч ичгүүр эс болно. Шалтгаангүйгээр итгэл эвдэгчид л ичгүүр болно.

⁴ЭЗЭН, надад замуудаа мэдүүлээч! Жимүүдээ надад зааж өгөөч!

⁵Үнэнээрээ намайг дагуулж, Намайг сургаач! Учир нь, Та авралын минь Бурхан юм Таныг би бүхэл өдөржин хүсэн хүлээнэм.

⁶ЭЗЭН, өршөөлөө болон хайр энэрэлээ Дурсан санаач! Учир нь тэдгээр нь мөнхөөс байсан билээ.

⁷Залуу насны минь нүглийг, Эсвэл алдаа зөрчлийг минь Бүү санаач! Хайр энэрлийнхээ дагуу Намайг санаач! ЭЗЭН, сайн чанарынхаа учир санаач!

⁸ЭЗЭН сайн, зөв шударга юм Тиймээс Тэрээр нүгэлтнүүдэд Замыг зааварлах буюу.

⁹Тэрээр даруу хүнийг шударгаар удирдаж, Тэдэнд замаа сургадаг.

¹⁰Гэрээг нь бас гэрчлэлийг нь сахигчдын хувьд ЭЗЭНий бүх жим нь Энэрэл хайр ба үнэн юм.

¹¹ЭЗЭН, нэрийнхээ төлөө Хилэнцийг минь уучлаач! Учир нь, энэ нь үлэмж билээ.

¹²ЭЗЭНээс эмээдэг хүн хэн юм бэ? Түүнд тэрээр сонгох ёстой замыг нь зааварчилна.

¹³Сэтгэл нь сайнд оршиж, Үр удам нь газар нутгийг эзэгнэх болно.

¹⁴ЭЗЭНий андлал Өөрөөс нь эмээгчидтэй хамт байдаг. Тэр тэдэнд гэрээгээ мэдүүлнэ.

¹⁵Нүд минь үргэлж ЭЗЭН өөд хардаг Учир нь Тэр миний хөлийг урхинаас суллана.

¹⁶Би ганцаардан шаналсан тул Над уруу эргэж, намайг нигүүлсээч!

¹⁷Зүрхний минь зовлон шаналан ихэслээ. Шахаанаас минь намайг гаргаач!

¹⁸Шаналал, зовлон зүдүүрийг минь харж, Нүгэл бүхнийг минь уучлаач!

¹⁹Дайснуудыг минь хараач! Учир нь тэд олуулаа бөгөөд Тэд намайг асар их хорслоор үзэн яддаг.

²⁰Сэтгэлийг минь хамгаалж, Намайг авраач! Би Таны дотор хоргоддог тул Намайг ичгүүрт бүү оруулаач!

²¹Би Таныг хүсэн хүлээдэг учир Үнэнч шулуун шударга нь Намайг хамгаалаг.

²²Бурхан, Израилийг Зовлон шаналан бүхнээс нь авраач!