Read Ariun Bible 2013 – Ариун Библи 2013 Дуулал 31 Bible Online

Дуулал 31 - Ariun Bible 2013 – Ариун Библи 2013 bible

Дуулал 31

¹Удирдаачид. Давидын дуулал. ЭЗЭН, Таны дотор би хоргодсон Намайг хэзээ ч ичгүүрт бүү унагаач, Зөв шударгаараа намайг авраач!

²Сонор юугаа над уруу хандуулан Намайг хурдан авраач! Миний хоргодох хад, Намайг аврах хүчирхэг бэхлэлт минь болооч!

³Учир нь Та миний хад, Бат цайз минь билээ. Нэрийнхээ төлөө Та Намайг удирдаач, хөтлөөч!

⁴Тэдний надад нууцаар тавьсан Торноос намайг гаргаач! Учир нь Та миний хамгаалалт болой.

⁵Таны гарт би сүнсээ даатганам. Үнэний Бурхан ЭЗЭН, Та намайг зольсон.

⁶Хуурмаг хоосон шүтээнүүдийг хүндэтгэгсдийг Би үзэн ядна. Харин би ЭЗЭНд итгэдэг.

⁷Хайр энэрэлд тань би Баясан баярлах болой. Учир нь Та зүдүүрийг минь харсан. Та сэтгэлийн минь зовлон шаналанг мэдсэн.

⁸Та намайг дайсны гарт тушаагаагүй, Та хөлийг минь уудам газарт тавьсан билээ.

⁹ЭЗЭН, намайг нигүүлсээч, Учир нь би зовлон зүдүүр дунд байна. Уй гашуугаас болж Нүд, сэтгэл, бие минь сульджээ.

¹⁰Учир нь амьдрал минь гаслантай хамт, Он жилүүд минь Санаа алдалттай цуг өнгөрчээ. Миний хүч тэнхээ хилэнцээс[19] минь болж сулран Яс минь тамирдав.

¹¹Бүх өстнөөсөө болж Би хөршүүдийнхээ дунд доромжлол, Танилуудынхаа дунд айдас төрүүлэхээр болсон. Замд таарсан хүмүүс надаас зайлсхийнэм.

¹²Үхсэн хүн шиг би Санаанаас гаран мартагджээ. Хагарсан сав мэт болжээ, би.

¹³Учир нь, олны базаахгүй үгийг Би сонссон. Тал бүрд аймшиг байнам. Миний эсрэг тэд зөвлөлдөж байхдаа Амийг минь авахаар тэд хуйвалджээ.

¹⁴Харин, ЭЗЭН, Танд би итгэдэг, “Та миний Бурхан” хэмээн Би хэлдэг.

¹⁵Цаг хугацаа минь Таны гарт байна. Дайснуудын минь гараас Хавчигсдаас минь Намайг авраач!

¹⁶Зарцынхаа дээр Царайгаа гэрэлтүүлээч, Хайр энэрлээрээ намайг авраач.

¹⁷Таныг би дуудсан тул, Намайг ичгүүр бүү болгооч, ЭЗЭН, Буруутуудыг харин ичгүүр болгож Үхэгсдийн оронд тэднийг дуугүй байлгаач!

¹⁸Бардамнал, жигшилтэйгээр Зөв шударгын эсрэг ичгүүргүй ярьдаг Худалч уруулыг дуугүй болгооч!

¹⁹Танаас эмээгчдэд зориулан Таны хуримтлуулсан, Таны дотор хоргодогчдод Таны соёрхсон сайн сайхан Хүний хөвгүүдийн өмнө хичнээн агуу вэ!

²⁰Та тэднийг оршихуйнхаа нууц газарт Хүний хуйвалдаанаас нуун Та тэднийг хэл амны хараалаас Майхандаа нууцалж хамгаалдаг.

²¹ЭЗЭН магтагдах болтугай! Учир нь Тэрээр бүслэгдсэн хотод Энэрэл хайраа надад гайхамшигтайгаар үзүүлсэн

²²Би сандран байхдаа “Таны мэлмийн өмнөөс таслагдсан билээ, би” гэв. Гэсэн ч би Тан уруу хашхирахад Та миний гуйлтын дууг сонссон билээ.

²³Түүний бишрэлтнүүд ээ, Та бүгд ЭЗЭНийг хайрлацгаа! Итгэлтнийг ЭЗЭН хамгаалж, Бардамнан үйлдэгчдэд Хариуг нь элбэг төлмүй.

²⁴ЭЗЭНд найдагч бүгд ээ, Тууштай байж, Зүрхээ зоригтой байлгагтун.