Read Ariun Bible 2013 – Ариун Библи 2013 Дуулал 38 Bible Online

Дуулал 38 - Ariun Bible 2013 – Ариун Библи 2013 bible

Дуулал 38

¹Санамж өргөлд зориулсан Давидын дуулал. ЭЗЭН, хилэн дотроо Намайг бүү зэмлээч, Шатаж буй уурандаа Намайг бүү гэсгээгээч!

²Учир нь Таны сум намайг нэвт сүлбэж, Таны мутар намайг доош даржээ.

³Таны хилэгнэлээс болж Биед минь эрүүл газар үгүй Нүглээс минь болж Ясанд минь амар үгүй.

⁴Учир нь миний хилэнц Толгойноос минь давжээ Хүнд ачаа мэт тэд Надад дэндүү хүнд.

⁵Миний мунхгаас болж Шархнууд минь хувилж, Муухай үнэр ханхлуулна

⁶Би бөхийж, ихэд бэгцийжээ. Бүх л өдрийн турш Би гашуудан явнам.

⁷Ууц нуруу минь халуу шатаж, Махбодод минь эрүүл газар гэж үгүй

⁸Би доройтож, бүр зүдэрлээ. Зүрхнийхээ шаналлаас болж би бархирдаг.

⁹Эзэн, бүх хүсэл минь Таны өмнө байна Санаа алдах дуу минь Танаас нууцлагдаагүй.

¹⁰Зүрх минь давчдаж, чадал минь алдарч Нүдний минь гал ч бөхжээ.

¹¹Миний хайртай хүмүүс, Найз нөхөд минь Миний гамшгаас зугтана. Хамаатан садангууд минь ч холуур зогсоно.

¹²Миний амийг эрэгчид урхи тавина. Намайг шархлуулахыг хүсэгчид Хорлолын тухай ярилцаж, Өдөржингөө заль мэхийг сэднэ.

¹³Харин би дүлий хүн шиг үл сонсоно. Амаа эс нээх хэлгүй хүн шиг байна.

¹⁴Тийм ээ, би огт сонсдоггүй, Амандаа зэмлэлгүй хүн мэт байна.

¹⁵Учир нь, ЭЗЭН, би Танд найддаг Бурхан ЭЗЭН минь, Та хариулах болно

¹⁶Учир нь би “Хөл алдах үед минь Өөрсдийгөө миний эсрэг дөвийлгөх тэд Надаас болж бүү баярлаг” гэж хэлсэн

¹⁷Учир нь би бүдрэхгүй бэлэн хийгээд Өвчин шаналал минь үргэлж миний өмнө байна.

¹⁸Би хилэнцээ улайдаг Нүглээсээ болж би зовнидог.

¹⁹Харин бужигнасан дайснууд минь хүчтэй агаад Намайг утга учиргүйгээр үзэн ядагчид олон.

²⁰Би сайныг дагадаг тул Сайныг муугаар хариулагчид Надад дайсагнана.

²¹ЭЗЭН, намайг бүү орхиоч, Бурхан минь ээ, надаас Бүү хол байгаач!

²²Миний аврал Эзэн, Надад туслахаар хурдлаач!