Read Ariun Bible 2013 – Ариун Библи 2013 Дуулал 45 Bible Online

Дуулал 45 - Ariun Bible 2013 – Ариун Библи 2013 bible

Дуулал 45

¹Удирдаачид. Шошаннимаар. Корагийн хөвгүүдийн маскил. Хайрын дуу. Зүрх минь сайн үгээр бялхму Шүлгээ би Хаанд зориулму. Хэл минь чадварлаг бичээчийн бийр амуй.

²Та хүний хөвгүүдээс гойд сайхан Таны уруулаас нигүүлсэл дусална. Тиймээс Таныг Бурхан мөнхөд ерөөсөн.

³Хүчит Нэгэн, цог жавхлан болоод сүр хүчтэйгээ Ташаандаа илдээ зүү.

⁴Үнэн, дөлгөөн хийгээд зөвийн хэргээр Сүр хүч дотроо ялгууснаар мордооч. Баруун гар тань сүрдэм үйлсийг Танд заана.

⁵Таны сумнууд Хааны дайснуудын зүрхэнд хурц. Ард түмнүүд Таны өмнө унана.

⁶Бурхан, Таны сэнтий мөнхийн мөнх. Таны хаанчлалын очирт таяг нь Шударга ёсны очирт таяг мөн.

⁷Та зөвт байдлыг хайрлаж, Буруу явдлыг үзэн яддаг. Тиймээс Бурхан, Таны Бурхан, Нөхдийн тань дээгүүр Таныг баяр баяслын тосоор тослов.

⁸Таны бүх хувцас мирр, Зуун наст ба могойн зүрхэн зандан мэт. Зааны ясан ордны Утсан хөгжмийн зэмсгүүд Таныг баясгана.

⁹Хаадын охид Таны Хатагтай нарын дунд бий. Баруун гар талд тань Офирын алт зүүсэн хатан зогсоно.

¹⁰Сонс, охин оо, хараад чихээ тавь. Ард түмнээ хийгээд эцгийнхээ гэрийг март.

¹¹Тэгвэл Хаан гоо үзэсгэлэнг чинь хүсэмжилнэ. Тэр чиний Эзэн учир Түүнд мөргө.

¹²Тир охин бэлэгтэй ирнэ Тааллыг чинь ард түмний баячууд гуйна

¹³Хааны охин бүх цог жавхлан дотроо бөгөөд Хувцас нь алтан хатгамалтай.

¹⁴Алаг эрээн хувцастай түүнийг Хаанд хүргэж ирнэ. Араас нь бараа бологч охидыг нь Танд аваачна.

¹⁵Тэд баяр болоод баясгалантайгаар хүргэгдэн Хааны ордонд орно.

¹⁶Эцэг өвгөдийн тань байранд Таны хөвгүүд байх бөгөөд Та тэднийг бүх дэлхийд ноёд болгоно.

¹⁷Би нэрийг тань үеийн үед сануулна Тиймээс ард түмэн өнө мөнхөд Таныг магтана.