Read Ariun Bible 2013 – Ариун Библи 2013 Дуулал 50 Bible Online

Дуулал 50 - Ariun Bible 2013 – Ариун Библи 2013 bible

Дуулал 50

¹Асафын дуулал. Хүчит Нэгэн, Бурхан ЭЗЭН айлдаж, Нар мандахаас жаргах хүртэл Дэлхийг дуудаж байна.

²Үзэсгэлэнгийн дээд болох Сионоос Бурхан гэрлээ цацруулж байна.

³Бидний Бурхан ирээд дуугүй байхгүй. Урд нь залгигч гал, Эргэн тойронд нь хүчтэй шуурга.

⁴Тэрээр ард түмнээ шүүхийн тулд Тэнгэр болон газар дэлхийг дээрээс дуудаж

⁵“Тахилаар дамжуулан Надтай гэрээ хийсэн Бишрэлтнүүдийг минь Над уруу цуглуул” гэдэг.

⁶Тэнгэрс зөвт байдлыг нь тунхагладаг. Учир нь Бурхан Өөрөө шүүгч юм. Села

⁷“Сонсогтун, ард түмэн минь ээ, Би ярина. Израиль аа, Би чиний эсрэг гэрчилнэ Би Бурхан, чиний Бурхан.

⁸Би тахилуудаас чинь болж чамайг зэмлэхгүй. Шатаалт тахилууд чинь үргэлж Миний өмнө болой.

⁹Би гэрээс чинь бухыг ч, Хашаанаас чинь хуцыг ч авахгүй.

¹⁰Учир нь ойн амьтад бүгд, Мянган толгод дээрх мал сүрэг Минийх.

¹¹Би уулын шувуу бүрийг мэдэх бөгөөд Хээр талд хөдлөх бүхэн Минийх.

¹²Би өлссөн байлаа ч чамд хэлэхгүй байсан. Учир нь ертөнц хийгээд Түүнийг дүүргэдэг бүхэн Минийх.

¹³Би бухнуудын махыг идэж, Хуцнуудын цусыг уух гэж үү?

¹⁴Бурханд талархлын тахилыг өргөж, Хамгийн Дээд Нэгэнд амлалтуудаа биелүүл.

¹⁵Зовлон шаналангийн өдөр Намайг дууд. Би чамайг аврах бөгөөд Чи Намайг хүндэтгэнэ.”

¹⁶Харин буруутад Бурхан айлдахдаа “Зарлигуудыг минь зарлан Гэрээг минь амандаа Юунд чи тээж байна вэ?

¹⁷Үнэндээ чи сахилгажуулалтыг үзэн ядаж, Үгсийг минь арагшаа хаядаг.

¹⁸Чи хулгайчийг харахдаа түүнийг сайшаадаг. Чи завхайрагчидтай нэгддэг.

¹⁹Чи амаа ёрын муугаар явуулдаг бөгөөд Чиний хэл мэхлэлийг найруулдаг.

²⁰Чи сууж, ах дүүсээ муулан ярьж, Эхийнхээ хүүг гүтгэдэг.

²¹Эдгээрийг хийхэд чинь Би дуугүй байсан. Намайг өөртэйгөө адил гэж Чи бодсон. Одоо Би чамайг зэмлэж, Нүдний чинь өмнө чамайг буруутгана.

²²Бурханыг мартагч нар аа, ухаарагтун, Эс бөгөөс Би тасчин хаяна. Та нарыг аврах хүн үгүй.

²³Талархлын тахилыг өргөгч нь Намайг хүндэтгэдэг. Зөв замаар замнагчдад Бурханы авралыг Би үзүүлнэ.”