Read Ariun Bible 2013 – Ариун Библи 2013 Дуулал 51 Bible Online

Дуулал 51 - Ariun Bible 2013 – Ариун Библи 2013 bible

Дуулал 51

¹Удирдаачид. Батшеба уруу орсных нь дараа Давид дээр эш үзүүлэгч Натан ирсэн үеийн Давидын дуулал. Бурхан, хайр энэрлийнхээ учир Намайг нигүүлсээч. Арвин их өршөөлийнхөө учир Гэмт үйлдлийг минь арилгаач.

²Хилэнцээс минь намайг олонтаа угааж, Нүглээс минь намайг цэвэрлээч.

³Би гэмт үйлдэлээ мэднэ. Нүгэл минь үргэлж миний өмнө.

⁴Таны, зөвхөн Таны эсрэг би нүгэл үйлдэж, Таны мэлмийд ёрын мууг хийлээ. Тийм болохоор Та айлдвараараа зөвтөж, Та шүүгдэхдээ зэмгүй болой.

⁵Харагтун, хилэнц дунд би төрж, Нүгэл дотор эх минь намайг олж тээсэн.

⁶Харагтун, сэтгэлийн гүнд үнэн байхыг Та хүсдэг бөгөөд Дотоод чанадад минь Та Мэргэн ухааныг мэдүүлнэ.

⁷Балуунаар гэмийг минь цэвэршүүлээч. Би цэвэр болно. Намайг угаагаач, Би цаснаас цагаан болно.

⁸Надад баяр хөөр, баясгаланг сонсгооч. Та яйруулсан ясаа баясгаач.

⁹Гэм нүглээс минь нүүрээ буруулж, Хилэнц бүхнийг минь арилгаач.

¹⁰Бурхан, миний дотор цэвэр зүрхийг бүтээж, Миний дотор зөв сүнсийг шинэчлэн авчраач.

¹¹Оршихуйгаасаа намайг бүү холдуулаач. Ариун Сүнсээ надаас бүү аваач.

¹²Авралынхаа баясгаланг надад сэргээж өгч, Хүсэл зоригийнхоо сүнсээр намайг тэтгээч.

¹³Би тэрслэгчдэд Таны замуудыг заах бөгөөд Нүгэлтнүүд Тан уруу буцах болно.

¹⁴Бурхан, авралын минь Бурхан, Намайг цус урсгалтаас авраач.[27] Хэл минь Таны зөвт байдлыг дуулна.

¹⁵ЭЗЭН, уруулыг минь нээгээч. Ам минь Таны магтаалыг тунхаглана.

¹⁶Учир нь Та тахилд баярлахгүй. Тийм бишсэн бол би түүнийг өргөхсөн. Та шатаалт тахилыг таалахгүй.

¹⁷Бурханы авах тахил нь эмтэрсэн сүнс юм. Эмтэрсэн, гэмшсэн зүрхийг Бурхан Та жигшихгүй.

¹⁸Өөрийн тааллаар Сионд сайныг үйлдээч. Иерусалимын хэрмийг барьж босгооч.

¹⁹Тэгэхэд Та зөвт тахилуудад, Шатаалт тахил ба Бүтэн шатаалт тахилд баярлана Тахилын ширээн дээр тань Залуу бухнууд тахигдана.