Read Ariun Bible 2013 – Ариун Библи 2013 Дуулал 55 Bible Online

Дуулал 55 - Ariun Bible 2013 – Ариун Библи 2013 bible

Дуулал 55

¹Удирдаачид: утсан хөгжим дээр. Давидын маскил. Бурхан, залбиралд минь чих тавиач Намайг гуйхад бүү нуугдаач

²Намайг анхаараач, надад хариулаач. Би шаналал дотроо ёолон, үнэхээр үймэрч байгаа нь

³Дайсны дуу хийгээд Буруутын дарамтаас болсон болой. Тэд над дээр хөнөөл авчирч Уурандаа тэд намайг үзэн ядаж байна.

⁴Миний дотор зүрх минь дэлсэж, Үхлийн айдас намайг нөмөрчээ.

⁵Айдас, дагжил надад ирж, Би аймшигт автжээ.

⁶“Би тагтаа шиг жигүүртэй ч болоосой! Тэгвэл нисэн одож, амрахсан.

⁷Харагтун, алс хол дайжиж, Цөлд хоноглохсон. Села

⁸Салхи, шуурга, хуй салхинаас Зугтах газартаа яарахсан” гэж би хэлэв.

⁹Би хотод хүчирхийлэл хийгээд тэмцлийг харлаа. Үймүүлээч, Эзэн, хэлүүдийг нь хутгалдуулаач

¹⁰Өдөр, шөнөгүй тэд тэндхийн хэрмэн дээгүүр тойрон явж байна. Түүн дотор нь ёсон бус ба зовлон бий.

¹¹Түүн дотор нь хорлол бий. Худал болон мэхлэл гудамжнаас нь үл сална.

¹²Учир нь намайг доромжилдог нэгэн нь дайсан минь биш. Тийм байсан бол би тэсэхсэн. Миний эсрэг өөрийгөө өргөмжилдөг нэгэн нь намайг үзэн ядагч биш. Тийм байсан бол би түүнээс нуугдахсан.

¹³Гэвч надтай ижил тэгш хүн, Миний анд ба дотнын найз минь билээ.

¹⁴Бид хамтдаа таатай чуулал хийж, Бурханы өргөөнд олны дунд алхаж байсан.

¹⁵Үхэл тэднийг залгин хоосруулаг Үхэгсдийн орон уруу амьдаараа яваг. Учир нь амьдардаг газар нь ч, тэдний дотор ч ёрын муу юм.

¹⁶Харин би Бурханыг дуудаж, ЭЗЭН намайг аварна.

¹⁷Үдэш, өглөө болон үд дунд ч би үглэн гонгинох бөгөөд Тэрээр дууг минь сонсоно.

¹⁸Миний эсрэг олноороо эгнэсэн тул Тэрээр тулаанаас амийг минь амар тайвнаар аварна.

¹⁹Эртнээс оршигч нэгэн болох Бурхан сонсоод тэдэнд хариулна Села Тэд үл өөрчлөгдөх бөгөөд Бурханаас ч эс эмээнэ.

²⁰Өөртэй нь тайван байгчдын эсрэг тэрээр гараа сунгаж, Тэрээр гэрээгээ зөрчжээ.

²¹Түүний ам хэл цөцгийн тосноос ч ялдам байсан, Харин зүрхэнд нь дайсагнал байв. Үгс нь чидун тосноос ч уян зөөлөн байсан, Гэвч тэд илд сугалсан байв.

²²Ачаагаа ЭЗЭНд даатга, Тэр чамайг түшин тэтгэнэ. Зөвтийн ганхахыг Тэр хэзээ ч зөвшөөрөхгүй.

²³Бурхан, Та тэднийг сүйрлийн нүхэнд унагана. Цуст, мэхлэгч хүмүүс өдрүүдийнхээ хагаст ч хүрэхгүй. Харин би Танд итгэх болно.