Read Ariun Bible 2013 – Ариун Библи 2013 Дуулал 69 Bible Online

Дуулал 69 - Ariun Bible 2013 – Ариун Библи 2013 bible

Дуулал 69

¹Удирдаачид: Шушанимын дагуу. Давидаас. Бурхан, намайг авраач. Учир нь их ус аминд минь заналхийлжээ.

²Гүн намагт би живж Тэнд хөл тогтох газар үгүй. Гүн усанд би орж, үерт автлаа.

³Хашхирсаар байгаад би ядарчээ Хоолой минь хатжээ. Бурханаа хүлээсээр Нүд минь гархилжээ.

⁴Шалтгаангүйгээр намайг үзэн ядагчид Толгойн үснээс минь ч олон Утгагүйгээр дайсагнагч Устгах гэж оролдогсод хүчтэй байна. Би хулгайлаагүй зүйлээ Буцааж өгөх ёстой болж байна.

⁵Аяа Бурхан, мунхаглалыг минь Та мэддэг нь бөгөөд Ял зэм минь Танаас нууцлагдаагүй.

⁶Түг түмдийн БУРХАН Эзэн, Таныг хүлээгчдийг надаас болж Ичгүүрт бүү оруулаач! Израилийн Бурхан, Таныг эрэн хайгчдыг надаас болж Шившигт бүү оруулаач!

⁷Учир нь Таны төлөө би Жигшил зэвүүцлийг үүрчээ. Нүүрийг минь ичгүүр нөмөрлөө.

⁸Би ах дүүстээ харийн хүн болж, Эхийнхээ хөвгүүдэд ч гаднын хүн болсон.

⁹Таны өргөөний төлөөх зүтгэл Намайг залгиж, Таныг буруутгасан хүмүүсийн буруутгал Над дээр буув.

¹⁰Мацаг барин сэтгэлдээ уйлаад[38] Буруушаал болов би.

¹¹Тааран хувцас өмсөөд Ёгт үг болов би тэдэнд.

¹²Гулдан хаалганы дэргэд суугчид Миний тухай ярьж Би согтуурагчдын элэглэл дуу болжээ.

¹³ЭЗЭН, залбирал минь тааламжтай цагт Танд хандана. Бурхан, хайр энэрлийнхээ аугаагаар Авралынхаа үнэнээр надад хариулаач!

¹⁴Намгаас татан гаргаж, Намайг бүү живүүлээч, Үзэн ядагсад хийгээд Усны гүнээс намайг авраач!

¹⁵Усны үерт намайг үл автуулж, Гүн усанд эс залгиулж, Нүхний амыг ч дээр минь Бүү хаагдуулаач!

¹⁶ЭЗЭН, хайр энэрэл тань сайн учир Хариулаач надад. Өршөөлийнхөө үлэмжээр над уруу эргэж,

¹⁷Зарцаасаа нүүрээ бүү нуугаач. Учир нь би хавчлага дунд байна. Надад даруйхан хариулаач!

¹⁸Сэтгэлд минь ойртон ирж, Түүнийг авраач ээ! Дайснуудын минь учир Намайг золиоч!

¹⁹Надад ирсэн буруутгал, Ичгүүр, доромжлолыг Та мэднэ. Бүх өстөн минь Таны өмнө байна.

²⁰Буруутгал зүрхийг минь эмтэлж, Би маш их өвчтэй байна. Би өрөвдөгчийг хүлээсэн ч Хэн ч байсангүй. Тайтгаруулагчийг ч бас эс олов.

²¹Тэд бас надад хүнсэнд минь цөс, Цангахад минь уулгахаар цуу өгөв.

²²Тэдний ширээ нь тэдэнд урхи болог. Тэднийг амар тайван байхад Энэ нь хавх болог.

²³Харж чадахгүйн тулд Тэдний нүд харанхуйлаг. Ууц нуруу нь үргэлж Дагжин чичрэг.

²⁴Хараалаа тэдний дээр асгаач Таны дүрэлзэж буй уур Тэднийг нөмрөг.

²⁵Тэдний хуаран эзгүйрэг! Майхнуудад нь хэн ч бүү сууг!

²⁶Учир нь тэд Таны бут цохисон хүнийг хяхан хавчсан. Таны шархдуулсан хүний өвчин шаналлыг хөөрөлддөг.

²⁷Тэдний хилэнц дээр хилэнц нэмээч. Тэд Таны зөвт байдалд бүү орог.

²⁸Тэд амийн номоос хасагдан арчигдаж, Зөвт хүмүүстэй хамт бүү бичигдэг!

²⁹Харин би зүдрүү агаад хөндүүрлэж байна. Аяа Бурхан, Таны аврал Намайг өндөрт өргөх болтугай!

³⁰Би Бурханы нэрийг дуугаар магтаж, Түүнийг талархлаар өргөмжилнө.

³¹Энэ нь ЭЗЭНд үхрээс илүүгээр Эвэр туурайтай залуу бухнаас илүүгээр таашаагдана.

³²Даруу хүмүүс үүнийг үзсэн бөгөөд баярлаж байна. Бурханыг эрэн хайгчид аа, Зүрх тань сэргэх болтугай.

³³Учир нь гачигдагсдыг ЭЗЭН сонсдог бөгөөд Хоригдлуудаа жигшдэггүй.

³⁴Тэнгэр ба газар, Далай ба тэдгээрийн дотор хөдөлж буй бүхэн Түүнийг магтаг.

³⁵Учир нь Сионыг Бурхан аварч, Иудагийн хотуудыг босгон байгуулна. Энэ нь тэднийг тэнд суулгаж, Тэдгээрийг эзэмшүүлэхийн тулд юм.

³⁶Зарц нарынх нь үр удам үүнийг өвлөж, Нэрийг нь хайрлагчид тэнд оршин суух болно.