Read Ariun Bible 2013 – Ариун Библи 2013 Дуулал 73 Bible Online

Дуулал 73 - Ariun Bible 2013 – Ариун Библи 2013 bible

Дуулал 73

¹Асафын дуулал. Үнэндээ Бурхан Израильд, Зүрх цэвэртэнд бас сайн.

²Хөл минь, гэтэл бараг бүдрэв. Ул минь, тэгтэл хариугүй халтирав.

³Гэм буруутны амжилтыг хараад Сайрхагчид би атаархав.

⁴Тэд үхэх цагтаа зүдүүргүй агаад Бие хаа нь тарган юм.

⁵Тэд бусад хүмүүс шиг зовлонгүй, Хүн төрөлхтөн шиг ч гай гамшиггүй.

⁶Тиймээс бардамнал нь Тэдний хүзүүний зүүлт болж, Хүчирхийллийн хувцас тэднийг нөмөрдөг.

⁷Таргалснаас болж нүд нь бүлтэрчээ Зүрхний нь төсөөллүүд хүслээс нь илүү.[43]

⁸Тэд элэглэж, Дарангуйллын талаар хорсолтой өгүүлж, Ихэмсгээр бас ярьцгаана.

⁹Тэд амаараа тэнгэрсийг эсэргүүцэж, Хэл нь газар дэлхийгээр сэлгүүцнэ.

¹⁰Тиймээс түүний хүмүүс Энэ газарт эргэн ирж, Бялхам их усыг ууна.

¹¹Тэд “Бурхан яаж мэддэг юм бэ? Хамгийн Дээд Нэгэнд мэдлэг байдаг уу?” гэцгээнэ.

¹²Харагтун, эдгээр нь буруутууд юм Үргэлж санаа амар байж Эд хөрөнгөө тэд арвижуулна.

¹³Үнэндээ би зүрхээ Дэмий л зэмгүй цэвэр байлгаж, Гараа гэмгүй байдал дотор угаалаа.

¹⁴Учир нь би өдөржин сахилгажуулагдаж, Өглөө бүр гэсгээл хүртдэг байжээ.

¹⁵Хэрвээ би “Би ингэж ярина” гэсэн бол, Харагтун, би Таны хүүхдүүдийн үе удмаас урвах байсан.

¹⁶Үүнийг ойлгохоор бодох үед минь Надад маш хэцүү байв.

¹⁷Бурханы ариун газарт орох хүртэл минь Ийн үргэлжлэв. Тэгэхэд л би тэдний эцсийг ухаарсан

¹⁸Үнэндээ Та тэднийг Халтиргаатай газар байлган Та тэднийг мөхөл уруу хаясан

¹⁹Тэд хоромхон зуур ингэж сүйрэх гэж! Тэд гэнэтийн аймшгаар Бүрмөсөн сүйтгэгдсэн билээ!

²⁰Зүүднээс сэрэх мэт тэднийг босгохдоо, ЭЗЭН Та, Дүр төрхийг нь ч үл ойшооно.

²¹Зүрх минь гашуудан Дотроо би цоо хатгагдахдаа

²²Би тэнэг, ухвар мөчид байж Таны өмнө би адгуус адил байжээ.

²³Гэсэн ч би үргэлж Тантай хамт байна Та баруун гараас минь барьсан.

²⁴Та намайг зөвлөгөөгөөрөө удирдаж, Хожим намайг сүр жавхланд угтан авна.

²⁵Тэнгэрт Танаас гадна Хэн надад байгаа вэ? Танаас өөр юуг ч Газар дээр би үл хүснэ.

²⁶Бие махбод хийгээд зүрх минь Үгүй болж болох ч, Бурхан мөнхөд зүрхний минь хад Хувь ногдол минь юм.

²⁷Учир нь, харагтун, Танаас хол байгчид нь сөнөх болно. Танд итгэлгүй бүгдийг Та устгасан билээ.

²⁸Харин Бурханд ойр байх нь надад сайн. Таны бүх үйлсийг тунхаглахын тулд Би БУРХАН Эзэнийг Хоргодох газраа болгосон.