Read Ariun Bible 2013 – Ариун Библи 2013 Дуулал 78 Bible Online

Дуулал 78 - Ariun Bible 2013 – Ариун Библи 2013 bible

Дуулал 78

¹Асафын маскил. Хүмүүс минь ээ, хуулийг минь сонс. Амны минь үгэнд чих тавигтун.

²Сургаалт зүйрлэлээр амаа нээнэ, Эртний таавар үгсийг би хэлнэ.

³Тэдгээрийг бид сонссон, мэдсэн бөгөөд Эцэг өвгөд маань ч бидэнд хэлж өгсөн.

⁴Тэдгээрийг хүүхдүүдээс нь бид нуухгүй. Харин ирэх үеийнхэнд ЭЗЭНий магтаалыг, Түүний хүч чадал Үйлдсэн гайхамшигт ажлуудыг нь тунхаглан ярина.

⁵Учир нь Тэрээр Иаковын дотор гэрчлэлийг тавьж, Израилийн дотор хуулийг тогтоосон. Тэдгээрийг үр хүүхдүүддээ мэдүүлэхийг Эцэг өвгөдөд маань Тэр тушаасан.

⁶Энэ нь ирэх үеийнхэн, Хойшид төрөх хүүхдүүд мэдээсэй гэсэндээ Мөн босож, өөрсдийн хүүхдүүдэд Тунхаглан ярихын тулд буюу.

⁷Энэ нь тэд Бурханд итгэлээ өгч, Бурханы ажлуудыг үл мартаж, Харин тушаалуудыг нь сахихын тулд юм.

⁸Түүнчлэн эцэг өвгөд шигээ Зөрүүд, тэрслүү үеийнхэн буюу Зүрхээ шулуутгаагүй, Сүнс нь Бурханд үнэнч байгаагүй үеийнхэн болохгүйн тулд юм.

⁹Нум сумаар зэвсэглэсэн харваачид, Ефраимын хөвгүүд тулалдааны өдөр ухарсан.

¹⁰Бурханы гэрээг тэд сахин биелүүлээгүй, Хуулиар нь алхахаас ч татгалзсан.

¹¹Түүний үйлсийг болоод Өөрсдөд нь үзүүлсэн гайхамшгуудыг тэд мартсан.

¹²Тэрээр Египет нутагт, Зоаны хээр талд Эцэг өвгөдийнх нь өмнө Гайхамшгуудыг үйлдсэн билээ.

¹³Далайг хувааж, тэднийг дундуур нь гатлуулж, Их усыг ч овоо мэт Тэр зогсоосон.

¹⁴Тэднийг өдөр үүлээр, Шөнөжин галын гэрлээр Тэр удирдсан.

¹⁵Цөлд хад чулуунуудыг Тэр хагалан Оёоргүй гүнийх мэт арвин их усыг тэдэнд уулгасан.

¹⁶Бас хаднаас урсгал ус гаргаж, Усыг гол мөрөн шиг урсгасан.

¹⁷Гэсэн ч тэд Түүний эсрэг Ахин дахин нүгэл үйлдэж, Цөлд Хамгийн Дээд Нэгэний эсрэг тэрсэлсэн.

¹⁸Өөрсдөдөө хоол хүнсийг гуйснаар Зүрхэндээ Бурханыг тэд сорьсон.

¹⁹Тэд Бурханы эсрэг ярьж, хэлэхдээ “Бурхан цөлд ширээ засаж чадах уу?

²⁰Харагтун, Тэрээр ус урстал хадыг цохиж, Голыг цутгасан хэдий ч Талх өгч бас чадах болов уу? Тэрээр ард түмэндээ мах бэлтгэж өгнө гэж үү?” хэмээсэн.

²¹Тиймээс ЭЗЭН сонсож, хилэгнэсэн. Иаковын эсрэг галыг ноцоож, Израилийн эсрэг уурыг нэмэгдүүлсэн.

²²Учир нь тэд Бурханд үл итгэсэн, Авралд нь ч эс найдсан.

²³Гэлээ ч дээр буй үүлсэд Тэр тушаан Тэнгэрийн хаалгуудыг ч онгойлгосон.

²⁴Тэдэнд идүүлэх маннагаар Дээрээс нь бороо оруулан Тэр тэдэнд тэнгэрийн тариаг өгсөн.

²⁵Тэнгэрэлч нарын талхыг хүн идсэн. Тэдэнд хүнсийг Тэрээр бялхам ихээр илгээсэн.

²⁶Тэнгэрт дорнын салхийг үлээлгэж, Хүч чадлаараа өмнөдийн салхийг ч Тэрээр тууж авчирсан.

²⁷Тэдэн дээр махыг тоос шороо мэт, Шувуудыг далайн элс мэт Тэр буулгасан.

²⁸Хуарангийнх нь дунд, Суудаг газрынх нь эргэн тойронд унагаасан.

²⁹Тэр тэдэнд шунан хүссэнийг нь өгсөн тул Ийнхүү тэд идэж, сайн цадацгаасан.

³⁰Харин шунал хүсэл нь эс хангагдсан. Хоол нь тэдний аманд байх зуур л

³¹Бурханы уур хилэн тэдний дээр ирж, Тэднээс хамгийн тарганыг нь алсан бөгөөд Израилийн шилдэг эрчүүдийг цохиж унагасан.

³²Ийм боловч тэд нүгэл үйлдсээр, Гайхамшгуудад нь эс итгэсэн.

³³Тиймээс Тэрээр өдөр хоногуудыг нь утгагүй хоосноор, Он жилүүдийг нь гэнэтийн аймшгаар дуусгасан.

³⁴Өөрсдийг нь алах цагт тэд Түүнийг хайж, Түүнийг дахин чин сэтгэлээс хайсан.

³⁵Бурхан тэдний хад байсныг, Хамгийн Дээд Бурхан тэдний Аврагч байсныг Тэд санадаг байсан.

³⁶Харин тэд амаараа Түүнд бялдуучилж, Хэлээрээ Түүнд худал ярьсан.

³⁷Учир нь тэдний зүрх Түүнд шударга бус, Түүний гэрээнд тэд үнэнч бус байсан.

³⁸Харин Тэр өршөөнгүй байж Хилэнц нүглийг уучилж, эс устгасан. Уураа олонтаа эргүүлэн авч, Бүхий л хилэнгээ Тэр эс хөдөлгөсөн.

³⁹Учир нь тэд махбод төдий, Нэг өнгөрөөд эргэн ирдэггүй салхи болохыг нь Тэрээр санасан билээ.

⁴⁰Цөлд Түүнтэй тэд хичнээн их тэрсэлж, Зэлүүд талд Түүнийг хичнээн их гашуудуулсан бэ!

⁴¹Дахин дахин Бурханыг сорьж, Израилийн Ариун Нэгэнийг тэд өвтгөсөн.

⁴²Түүний мутрыг, Өөрсдийг нь өстнөөс аварсан өдрийг нь ч тэд санаагүй.

⁴³Тэр тэмдгүүдээ Египетэд, Гайхамшгуудаа Зоаны хээр талд хэрхэн харуулж,

⁴⁴Тэдний гол мөрнүүдийг, Усны урсгалуудыг хэрхэн цус болгон хувиргаж, Тэднийг ууж чадахгүй болгосныг ч эс санасан.

⁴⁵Тэднийг залгисан бөөн ялааг Мөн тэднийг устгасан мэлхийнүүдийг Тэрээр дунд нь илгээсэн.

⁴⁶Бас үр тариаг нь төөлүүр хорхойд, Хүч хөдөлмөрийг нь царцаанд Тэр өгсөн.

⁴⁷Усан үзмийн моддыг нь мөндөрт, Ялам моддыг нь хяруунд Тэр цохиулсан.

⁴⁸Бас мал сүргийг нь мөндөрт, Хонин сүргийг нь аянганд Тэр ниргүүлсэн,

⁴⁹Гай зовлонгийн тэнгэрэлч нар дээр Шатаж буй уур, хилэн, зэвүүцэл Зовлон шаналанг Тэр илгээсэн,

⁵⁰Тэрээр хилэнгийнхээ замыг тэгшилсэн. Сэтгэлийг нь үхлээс хэлтрүүлээгүй, Амийг нь Тэрээр гай гамшигт тушаасан.

⁵¹Египетийн бүх ууганыг, Хамын майхан дахь чадлынх нь охийг цохисон.

⁵²Харин Өөрийн ард түмнийг Хонь шиг хөтлөн гаргаж, Хонин сүрэг мэт цөлд удирдсан.

⁵³Тэднийг айхгүй байхаар, аюулгүйгээр Тэр удирдсан. Харин дайснууд нь далайн усанд автсан.

⁵⁴Ингээд Тэр тэднийг ариун нутаг дэвсгэртээ, Баруун мутрынхаа арилжин авсан Энэ ууланд авчирсан.

⁵⁵Бас үндэстнүүдийг өмнөөс нь хөөн зайлуулж, Тэдэнд газрыг шавгаар хуваарилан Израилийн овгуудыг Тэрээр Өөр өөрсдийнх нь майхнуудад суулгасан.

⁵⁶Гэвч тэд Хамгийн Дээд Бурханыг сорин Түүнтэй тэрсэлж, Гэрчлэлүүдийг нь эс сахисан.

⁵⁷Харин урваж эцэг өвгөд шигээ мэхэлсэн. Онигүй нум шиг тэд хазгай туссан.

⁵⁸Учир нь тэд мөргөлийн өндөрлөгүүдээрээ Түүнийг уурлуулж, Сийлмэл хөргүүдээрээ хардалтыг нь хөдөлгөсөн.

⁵⁹Бурхан сонсоод, уур хилэнгээр дүүрч, Израилийг ихэд жигшсэн.

⁶⁰Ингээд Тэр Шило[47] дахь асрыг, Хүмүүсийн дунд босгосон майхныг орхиж,

⁶¹Хүч чадалаа олзлолд, Сүр жавхлангаа өстний гарт өгсөн.

⁶²Тэрээр ард түмнээ илдэнд тушааж, Өөрийн өвд уурлан хилэгнэсэн.

⁶³Залуусыг нь гал залгиж, Онгон охидод нь хуримын дуу үгүй болсон.

⁶⁴Тахилч нар нь илдэнд унаж, Бэлэвсэн эмэгтэйчүүд нь эс гашуудсан.

⁶⁵Дараа нь Эзэн нойрноос мэт, Дарсанд согтууран агсганагч дайчин мэт сэржээ.

⁶⁶Өстнүүдээ араас нь цохиж, Үүрдийн шившигт тэднийг Тэр оруулсан,

⁶⁷Тэрээр Ефраимын овгийг сонголгүй Иосефын майхныг хаясан.

⁶⁸Харин Иуда овгийг, Өөрийн хайрласан Сион уулыг сонгосон.

⁶⁹Ариун газраа тэнгэр мэт, Мөнхөд тогтоосон газар шиг Тэр барьж босгосон.

⁷⁰Бас зарц Давидыгаа сонгон Хонины хашаанаас авсан, Тэр.

⁷¹Хургатай хоньдыг даган явахаас болиулан Өөрийн ард түмэн Иаковыг, Өөрийн өв Израилийг хариулуулахаар түүнийг Тэр авчирсан.

⁷²Ингээд Давид тэднийг үнэнч сэтгэлээр хариулж, Гарынхаа ураар удирдсан.