Read Ariun Bible 2013 – Ариун Библи 2013 Дуулал 79 Bible Online

Дуулал 79 - Ariun Bible 2013 – Ариун Библи 2013 bible

Дуулал 79

¹Асафын дуулал. Бурхан, үндэстнүүд Таны өвд иржээ. Таны ариун сүмийг бузарлаж, Иерусалимыг тэд балгас болгов,

²Зарц нарын тань цогцсуудыг Тэнгэрийн шувуудад хоол болгож Ариун хүмүүсийн тань махыг Газрын араатнуудад тэд өгчээ,

³Иерусалимын эргэн тойронд Тэдний цусыг ус мэт урсгахад Оршуулах хэн ч байгаагүй.

⁴Бид хөршүүддээ шившиг, Эргэн тойронд байгсдадаа доог тохуу болсон.

⁵ЭЗЭН, хэдий болтол вэ? Та мөнхөд уурласаар байх уу? Хардалт тань гал шиг шатах уу?

⁶Уур хилэнгээ Таныг мэддэггүй үндэстнүүд дээр, Нэрийг тань дууддаггүй хаанчлалууд дээр асгаач.

⁷Учир нь тэд Иаковыг залгиж, Орших газрыг нь эзгүйрүүлсэн.

⁸Эцэг өвгөдийн маань хилэнцийг Бидний эсрэг бүү санаач. Бид маш дор орсон учир Өөрийнхөө өршөөлөөр биднийг даруй угтаж аваач.

⁹Авралын маань Бурхан, Алдар нэрийнхээ төлөө бидэнд туслаач. Нэрийнхээ төлөө биднийг аварч, Нүглүүдийг маань уучлаач.

¹⁰Юунд үндэстнүүд “Тэдний Бурхан хаана байна?” гэж хэлэх ёстой вэ? Таны зарц нараас урссан цусны өс авалт Бидний нүдэнд үндэстнүүдийн дунд мэдэгдэх болтугай.

¹¹Хоригдлын ёолох дуу Таны өмнө ирэг. Үхэхээр яллагдагсдыг хүчнийхээ аугаагаар хамгаалаач.

¹²Эзэн, Таныг зүхсэн хөршүүдийн маань зүхлийг Өвөрт нь долоо дахин илүүгээр буцаагаач.

¹³Тэгвэл Таны ард түмэн, Таны бэлчээрийн хонин сүрэг бид Танд мөнхөд талархана. Магтаалыг тань бид үеийн үед тунхаглана.