Read Ariun Bible 2013 – Ариун Библи 2013 Дуулал 80 Bible Online

Дуулал 80 - Ariun Bible 2013 – Ариун Библи 2013 bible

Дуулал 80

¹Удирдаачид: Шошанним Едутийн дагуу. Асафын дуулал. Иосефыг хонин сүрэг мэт удирддаг Израилийн хоньчин оо, чих тавиач. Херубуудын дээр залрагч аа, гэрэлтээч.

²Бениамин, Ефраим, Бас Манассегийн өмнө хүчээ босгож Биднийг аврахаар ирээч!

³Бурхан, биднийгээ дахин босгооч, Нүүр царайгаа гэрэлтүүлээч, Тэгвэл бид аврагдана.

⁴Түг түмдийн Бурхан ЭЗЭН, Хэдий болтол хүмүүсийнхээ залбиралд Та уураа уугиулах вэ?

⁵Тэднийг нулимсан талхаар хооллож, Тэдэнд нулимсыг ихээр Та уулгалаа.

⁶Та биднийг хөршийн маань маргааны бай болгожээ. Дайснууд маань дундаа шоолон хөхөрлөө.

⁷Түг түмдийн Бурхан, Биднийгээ дахин босгооч, Нүүр царайгаа гэрэлтүүлээч, Тэгвэл бид аврагдана.

⁸Усан үзмийн модыг Египетээс Та гаргасан. Үндэстнүүдийг хөөн гаргаж, Та түүнийг суулгасан.

⁹Өмнийг нь Та түүний тул цэвэрлэсэн. Үндсийг нь үндэслүүлж өнөөх нутгийг дүүргэсэн.

¹⁰Түүний сүүдэр уулсыг бүрхсэн, Мөчрүүд нь Бурханы хуш шиг байсан.

¹¹Мөчрөө далай хүртэл, Салаагаа мөрөн хүртэл сунгасан.

¹²Замаар явж өнгөрөгч бүхэн түүнийг зулгааж болохуйцаар Юунд Та хашлагыг нь нураав?

¹³Ойн зэрлэг гахай түүнийг тасчиж, Хээрийн амьтан бүхэн түүгээр хооллож байна.

¹⁴Түг түмдийн Бурхан, Эргэн ирээч, гуйя. Тэнгэрээс өнгийн хараач! Энэ усан үзмийн модыг,

¹⁵Таны баруун мутрын тарьсан усан үзмийн нахиаг хараач! Өөртөө бат бэх болгосон мөчрөө харан айлчлаач!

¹⁶Тэрээр галд шатаж, цавчигдсан. Нүүрний тань зэмлэлээс болж тэд сөнөнө.

¹⁷Мутар тань Таны баруун гар дахь хүний дээр, Таны Өөртөө бат бэх болгосон хүний хүүгийн дээр байх болтугай.

¹⁸Тэгвээс бид Танаас ухрахгүй. Биднийг амилуулаач, Бид нэрийг тань дуудна.

¹⁹Түг түмдийн Бурхан ЭЗЭН, Биднийгээ дахин босгооч! Нүүр царайгаа гэрэлтүүлээч! Тэгвэл бид аврагдана.