Read Ariun Bible 2013 – Ариун Библи 2013 Дуулал 86 Bible Online

Дуулал 86 - Ariun Bible 2013 – Ариун Библи 2013 bible

Дуулал 86

¹Давидын залбирал. Аяа ЭЗЭН сонор тавин надад хариулаач. Учир нь би зовж, гачигдаж байна.

²Би бишрэлтэн тул Сэтгэлийг минь хамгаалаач! Аяа миний Бурхан, Танд итгэдэг зарцаа авраач!

³Аяа Эзэн, намайг нигүүлсээч! Учир нь Тан уруу би өдөржин хашхирдаг.

⁴Зарцынхаа сэтгэлийг баярлуулаач! Учир нь Эзэн Тан уруу би сэтгэлээ өргөдөг.

⁵Эзэн Та сайн бөгөөд уучлахад бэлэн, Таныг дуудагч бүгдэд хайр энэрлээр элбэг.

⁶Аяа ЭЗЭН, залбирлыг минь сонор тавин чагнаач! Миний гуйлтын дуунд анхаарал тавиач!

⁷Зовлон шаналангийнхаа өдөр Таныг би дуудна, Учир нь Та надад хариулна.

⁸Аяа ЭЗЭН, бурхдын дунд Тан шиг хэн ч үгүй, Таных шиг үйлс ч алга.

⁹Аяа ЭЗЭН, Таны бүтээсэн бүх улс үндэстэн ирж, Таны өмнө мэхийж, Таны нэрийг алдаршуулна.

¹⁰Учир нь Та аугаа бөгөөд гайхамшгийг үйлддэг. Та бол Бурхан, Та ганцаараа.

¹¹Аяа ЭЗЭН, замаа надад зааж өгөөч. Би Таны үнэнээр явах болно. Таны нэрээс эмээхэд Зүрхийг минь нэгтгээч!

¹²Бурхан ЭЗЭН минь, Бүх зүрхээрээ Танд би талархаж, Таны нэрийг мөнхөд алдаршуулна.

¹³Учир нь надад хандсан нигүүлсэл тань агуу бөгөөд Та сүнсийг минь Үхэгсдийн орны гүнээс аварсан.

¹⁴Өө Бурхан, бардамнагч хүмүүс миний эсрэг босож, Хүчирхийлэгчдийн бүлэглэл Амийг минь хайсан бөгөөд Тэд Таныг өөрсдийнхөө өмнө залаагүй.

¹⁵Харин ЭЗЭН Та өршөөлт, нигүүлсэлт, Уурлахдаа удаан, энэрэл хайр ба үнэнээр элбэг Бурхан юм.

¹⁶Над уруу эргэж, намайг нигүүлсээч! Өөрийн зарцад хүчээ өгч, Шивэгчнийхээ хүүг авраач!

¹⁷Намайг үзэн ядагчид хараад ичихийн тулд Сайны тэмдгийг надад үзүүлээч! Учир нь ЭЗЭН Та Надад туслан намайг тайвшруулсан.